20.09.2017 | 
Մշակույթ
ԵՐԴՎԵՑԻՆ, ՈՐ ԲԱՐՁՐ ԵՆ ՊԱՀԵԼՈՒ ՄԱՅՐ ԲՈՒՀԻ ՈՒՍԱՆՈՂԻ ԲԱՐՁՐ ԿՈՉՈՒՄԸ
ԵՐԴՎԵՑԻՆ, ՈՐ ԲԱՐՁՐ ԵՆ ՊԱՀԵԼՈՒ ՄԱՅՐ ԲՈՒՀԻ ՈՒՍԱՆՈՂԻ ԲԱՐՁՐ ԿՈՉՈՒՄԸ
Սեպտեմբերի 19-ին Մայր բուհի կենտրոնական մասնաշենքի բակում տեղի ունեցավ ԵՊՀ մեծարման և առաջին կուրսեցիների երդման հանդիսավոր արարողությունը, որն այս տարի նվիրված էր Հայոց բանակի կազմավորման 25-ամյակին:

Հայոց անկախ պետականության կայացման ամենազորեղ կռվաններից մեկը սեփական ազգային բանակի ստեղծումն է եղել՝ մեր դարավոր երազանքի մարմնացումն ու մեր աղոթքի արձագանքը: Մարտունակ բանակի ստեղծումը ազգային պետության անվտանգության և անկախության պահպանման հարցի մեր միակ երաշխիքն էր, և պատահական չէ, որ առաջին կուրսեցիների հանդիսավոր մուտքը դեպի Մայր բուհ նվիրված էր հենց մեր բանակին:

 

Ինչպես ամեն տարի, այս տարի նույնպես հանդիսավոր արարողությունը կազմակերպել և օրը տոնական ու հիշարժան էին դարձրել ԵՊՀ ռեկտորատը, մշակույթի կենտրոնը և ուսանողական կառույցները:

 

Միջոցառման սկզբում ՀՀ և ԵՊՀ դրոշները բարձրացնելու համար բեմ հրավիրվեցին Միջազգային հարաբերությունների ֆակուլտետի 1-ին կուրսի ուսանող, Արցախյան քառօրյա պատերազմի ժամանակ «Լեռնային Ղարաբաղի Հանրապետության մարտական խաչ» 2-րդ աստիճանի շքանշանի արժանացած Ռաֆայել Հովհաննիսյանը,  Փիլիսոփայության և հոգեբանության ֆակուլտետի 4-րդ կուրսի ուսանող, ԵՊՀ-ի կողմից Արցախի Հանրապետությունում կազմակերպված «Ուսանողական ռազմական բանակում-2017»-ի հաղթող Գևորգ Արշակյանը, Իրավագիտության ֆակուլտետի 4-րդ կուրսի ուսանող, Գերմանիայի Նյուրնբերգ քաղաքում կայացած միջազգային քրեական իրավունքի դատախաղի կիսաեզրափակիչ փուլին մասնակցած ԵՊՀ թիմի անդամ Հարություն Հովհաննիսյանը ու Ինֆորմատիկայի և կիրառական մաթեմատիկայի ֆակուլտետի մագիստրատուրա 1-ին կուրսի ուսանող, ԱՄՆ-ում կայացած «ACM-ICPC» ծրագրավորման հեղինակավոր մրցույթի Հարավային Կովկասի հաղթող և եզրափակչի մասնակից ԵՊՀ թիմի անդամ Ալբերտ Սահակյանը:

 

ԵՊՀ ռեկտոր Արամ Սիմոնյանը, ողջունելով և շնորհավորելով Մայր բուհի նորեկներին, ասաց, որ երեկոն ավելի ջերմ է, քանզի այն նվիրված է Հայոց բանակին. «Մենք հպարտ ենք, որ ունենք ուժեղ բանակ ու առավել հպարտ և ուրախ ենք, որ ԵՊՀ ուսանողները հայրենիքի նկատմամբ իրենց պարտքը կատարում են անմնացորդ, բարձր պատասխանատվությամբ: Տարիների ու ամիսների ընթացքում ԵՊՀ ուսանողները ապացուցել են, որ նրանք, հիրավի, մեր ժողովրդի ու երկրի պաշտպաններն են: Սիրելի՛ համալսարանականներ, առաջին կուրսեցու մուտքը համալսարան միշտ էլ հուզիչ է, առանձնահատուկ ոչ միայն իրենց, այլև բոլորիս համար: Սիրելի՛ առաջին կուրսեցիներ, համոզված եմ, որ բարձր կպահեք Մայր բուհի պատիվը, չեք մոռանա ձեր Մայր օջախը»:

 

 

Առաջին կուրսեցիների հանդիսավոր մուտքը շնորհավորեց նաև ԵՊՀ ՈՒԽ նախագահ Արմեն Խաչիկյանը, ով առաջին կուրսեցիներին հագեցած և հետաքրքիր ուսանողական տարիներ մաղթեց. «Գիտելիքի ստացման ճանապարհին բազմաթիվ խոչընդոտների եք հանդիպելու, սակայն միայն դրանք հաղթահարելով՝ կարող ենք հասնել ցանկալի արդյունքի: Սիրելի՛ առաջին կուրսեցիներ, լա՛վ սովորեք, դարձե՛ք լավ մասնագետներ և արժանի քաղաքացիներ՝ դրանով ապահովելով մեր երկրի զարգացումն ու հզորացումը»:

 

Այս տարի երդման տեքստը կարդալու պատասխանատվությունն ու պատիվն ընձեռված էր Ժուռնալիստիկայի ֆակուլտետի 1-ին կուրսի ուսանողուհի Վարդուհի Տոնոյանին և Պատմության ֆակուլտետի 1-ին կուրսի ուսանող Տիգրան Բարսեղյանին:

 

 

Համերգի ընթացքում իրենց կատարումներով հանդես եկան ԵՊՀ մշակույթի կենտրոնի սաները և Վ. Սարգսյանի անվան ռազմական համալսարանի նվագախումբն ու երգչախումբը: Առաջին կուրսեցիներին շնորհավորելու էին եկել նաև հայտնի ու սիրված երգիչ Արսեն Սաֆարյանը և «Էմփիրեյ» ռոք խումբը: Շնորհավորելու էր եկել նաև ԱՄՆ-ից ժամանած ԵՊՀ շրջանավարտ Թագուհի Արզումանյանը, ով ներկայացրեց հատված Գևորգ Էմինի «Մենք ենք» ստեղծագործությունից:

 

 

Միջոցառման ընթացքում յուրօրինակ համարով հանդես եկան նաև ԵՊՀ «Ապառաժ» լեռնագնացության ակումբի անդամները, ովքեր ԵՊՀ տանիքից իջեցրին Հայաստանի Հանրապետության, Արցախի Հանրապետության և ԵՊՀ դրոշները:

 

Միջոցառման ավարտին հանդիսավարները շնորհակալություն հայտնեցին ԵՊՀ ռեկտորատին՝ հանձին ռեկտոր Արամ Սիմոնյանի, ՀՀ ՊՆ Վազգեն Սարգյսանի անվան ռազմական համալսարանին՝ հանձին ղեկավար գեներալ-մայոր Արմեն Ղահրամանյանին, միջոցառման գաղափարի հեղինակ և ռեժիսոր, ԵՊՀ մշակույթի կենտրոնի տնօրեն Կարինե Դավթյանին և Հայաստանի երիտասարդական հիմնադրամին՝ միջոցառման իրականացմանը աջակցություն ցուցաբերելու համար: 

Այլ նորություններ
ՇԱՐՈՒՆԱԿՎՈՒՄ Է ԵՊՀ ՏԱՂԱՆԴՆԵՐԻ ԲԱՑԱՀԱՅՏՈՒՄԸ. ՏԵՂԻ ՈՒՆԵՑԱՎ «ԱՐԻ ՄՐՑԵՆՔ» ԱՌԱՋՆՈՒԹՅԱՆ ՊԱՐԻ ՄՐՑՈՒՅԹԸ
«Արի մրցենք» առաջնության շրջանակում ԵՊՀ ՈւԽ մշակույթի հանձնաժողովն այսօր կազմակերպել էր պարի միջֆակուլտետային մրցույթ։
«ՍՊԵՂԱՆԻ» ԵՐԳՉԱԽՈՒՄԲԸ՝  ԵՊՀ ՄՇԱԿՈՒՅԹԻ ԿԵՆՏՐՈՆՈՒՄ
ԵՊՀ հիմնադրման 100-ամյակին ընդառաջ ՀՀ մշակույթի նախարարության աջակցությամբ այսօր ԵՊՀ մշակույթի կենտրոնում կայացավ «Սպեղանի» երգչախմբի համերգը: