08.04.2019 | 
Քաղաքականություն
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԸ ԿՇԱՐՈՒՆԱԿԻ ՂԵԿԱՎԱՐԵԼ ԳԱԳԻԿ ՂԱԶԻՆՅԱՆԸ
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԸ ԿՇԱՐՈՒՆԱԿԻ ՂԵԿԱՎԱՐԵԼ ԳԱԳԻԿ ՂԱԶԻՆՅԱՆԸ
ԵՊՀ իրավագիտության ֆակուլտետի գիտխորհրդի նիստում այսօր 39 կողմ և 1 անվավեր ձայների հարաբերակցությամբ ֆակուլտետի դեկան է ընտրվել Գագիկ Ղազինյանը:

Իրավագիտության ֆակուլտետի գիտխորհրդի նիստին, բացի անդամներից, ներկա էին նաև ԵՊՀ գիտական քաղաքականության և միջազգային համագործակցության գծով պրոռեկտոր Արսեն Բաբաջանյանը, պրոֆեսորադասախոսական կազմի ներկայացուցիչներ, ուսանողներ:

 

Կանոնակարգի համաձայն՝ ֆակուլտետի գիտխորհրդի անդամները նախևառաջ ընտրեցին նիստը նախագահող, որը ստանձնեց Քաղաքացիական իրավունքի ամբիոնի պատվավոր վարիչ Տարիել Բարսեղյանը:

 

Նա տեղեկացրեց, որ սահմանված ժամկետում ֆակուլտետի բոլոր ամբիոններում քննարկվել են դեկան առաջադրելու հարցը. «Բոլոր ամբիոնները, բացի ֆակուլտետի գործող դեկան Գագիկ Ղազինյանից, այլ թեկնածություն չեն առաջադրել: Այսօր մենք ունենք մեկ թեկնածու»:

 

Գագիկ Ղազինյանը, ներկայացնելով ֆակուլտետի առաջիկա հինգ տարիների զարգացման ծրագիրը, փաստեց, որ կրթության որակի բարելավման, այն ուսանողների և պրոֆեսորադասախոսական կազմի համար առավել գրավիչ դարձնելու նպատակով նախանշվում են կրթության ստացման և տրամադրման միջավայրի բարելավում, դասախոսի գիտամանկավարժական գործունեության խթանում, ուսանողի համար ուսումնառության գործընթացի գրավչության և արդյունավետության բարձրացում, կրթության մատուցման ձևի և բովանդակության բարեփոխում, ինչպես նաև ֆակուլտետի հնարավորությունների ընդարձակում:

 

 

«Ներկայացված ուղղություններից յուրաքանչյուրը բազմաշերտ է, սակայն յուրաքանչյուր միջոցառում միտված է ֆակուլտետում աշխատանքի և ուսումնառության գործընթացի գրավչության բարձրացմանը, կրթության և գիտական գործունեության որակական բարելավմանը, ֆակուլտետի ճանաչմանն ու միջազգայնացմանը»,- իր ելույթի ընթացքում ասաց Գագիկ Ղազինյանը:

 

Դեկանը նշեց, որ ըստ զարգացման ծրագրի՝ կրթության ստացման և տրամադրման միջավայրի բարելավման համար իրականացվելու են լսարանների ձևափոխում և տեխնիկական հագեցվածության ապահովում, մասնագիտական գրադարանի բարելավում, ծանուցման ճկուն համակարգերի ներդրում և այլն:

 

Գագիկ Ղազինյանը փաստեց, որ դասախոսի գիտամանկավարժական գործունեության խթանման համար իրագործվելու են դասախոսների համար մրցակցության կառուցակարգերի ներդրում, դասավանդման գործընթացում պրակտիկ աշխատողների ներգրավում, դասախոսի լսարանային և արտալսարանային ծանրաբեռնվածության նվազեցում, նրանց օգնականների ինստիտուտի ներդրում, պրոֆեսորադասախոսական կազմի վերապատրաստում և այլն:

 

 

Ուսանողի համար ուսումնառության գործընթացի գրավչության և արդյունավետության բարձրացման համար էլ, Գագիկ Ղազինյանի հավաստմամբ, նախատեսվում են ուսանողին կրթական միջավայրում ադապտացնելու և ճիշտ կողմնորոշելու կառուցակարգերի մշակում, իրավաբանական քոլեջի ստեղծում, ուսանողների պրակտիկայի կազմակերպման արդյունավետության բարձրացում, շրջանավարտների աշխատանքի տեղավորման աջակցություն և այլն:

 

Ֆակուլտետի զարգացման ծրագրի ներկայացումից հետո պրոֆեսորադասախոսական կազմի ներկայացուցիչները հանդես եկան ելույթներով և նշեցին, որ Գագիկ Ղազինյանը  միանշանական արժանի է ընտրվելու և հետագա 5 տարիներին ևս իրագործելու ֆակուլտետի ղեկավարումը:

 

 

Այնուհետև Իրավագիտության ֆակուլտետի գիտխորհրդի անդամների փակ, գաղտնի քվեարկության արդյունքում 39 կողմ և 1 անվավեր ձայների հարաբերակցությամբ ֆակուլտետի դեկան ընտրվեց Գագիկ Ղազինյանը:

 

Քնար Միսակյան

Այլ նորություններ
ՎԱՐՉԱՊԵՏ ՆԻԿՈԼ ՓԱՇԻՆՅԱՆԸ ՀԱՆԴԻՊԵՑ ՏՆՏԵՍԱԳԵՏՆԵՐԻ ՀԵՏ
ԵՊՀ տնտեսագիտության և կառավարման ֆակուլտետում ՀՀ վարչապետ Նիկոլ Փաշինյանն այսօր հանդիպեց ֆակուլտետի պրոֆեսորադասախոսական կազմի ներկայացուցիչների և ուսանողների հետ։
ՄԱՐԴԻԿ ՄԻԱՀՅՈՒՍՎԵԼ ԵՆ ՀԱԿԱՄԱՐՏՈՒԹՅԱՆԸ. «ԽԱՂԱՂՈՒԹՅԱՆ ԸՆԿԱԼՈՒՄԸ. ԼՂ ՀԱԿԱՄԱՐՏՈՒԹՅԱՆ ՄՈՏԵՑՈՒՄՆԵՐԻ ՎԵՐԼՈՒԾՈՒԹՅՈՒՆԸ» ԹԵՄԱՅՈՎ ՔՆՆԱՐԿՈՒՄԸ ԵՊՀ-ՈՒՄ
ԵՊՀ Պալեանների անվան դահլիճում այսօր տեղի ունեցավ հանդիպում «Խաղաղության ընկալումը. ԼՂ հակամարտության մոտեցումների վերլուծությունը» թեմայով, որին ներկա էին լրագրող, զեկույցի համահեղինակ Մարկ Գրիգորյանը, ՀՀ ԱԺ «Իմ քայլը» խմբակցության անդամ, պատգամավոր Մարիա Կարապետյանը, Արցախի «Անալիտիկոն» հանդեսի գլխավոր խմբագիր, Ստեփանակերտի մամուլի ակումբի նախագահ Գեղամ Բաղդասարյանը, հայկական ուսումնասիրությունների «Անի» կենտրոնի համակարգող, «Սիվիլիթաս» հիմնադրամի մեկնաբան-վերլուծաբան Թաթուլ Հակոբյանը և «International alert» կազմակերպության Կովկասի տարածաշրջանային ղեկավար Սոֆիա Փագսլին: