10.10.2019 | 
Հասարակություն
ՀՆԴԿԱԳԻՏՈՒԹՅԱՆ ԶԱՐԳԱՑՄԱՆ ՆՈՐ ՀԵՌԱՆԿԱՐՆԵՐ ԵՊՀ-ՈՒՄ. ԳԵՂԱՄ ԳԵՎՈՐԳՅԱՆԸ ՀՅՈՒՐԸՆԿԱԼԵԼ Է ԴԵՍՊԱՆԻՆ
ՀՆԴԿԱԳԻՏՈՒԹՅԱՆ ԶԱՐԳԱՑՄԱՆ ՆՈՐ ՀԵՌԱՆԿԱՐՆԵՐ ԵՊՀ-ՈՒՄ. ԳԵՂԱՄ ԳԵՎՈՐԳՅԱՆԸ ՀՅՈՒՐԸՆԿԱԼԵԼ Է ԴԵՍՊԱՆԻՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում ընդունել է ՀՀ-ում Հնդկաստանի արտակարգ և լիազոր դեսպան Ն. Գ. պարոն Կիշան դան Դեվալին, որի հետ քննարկել է համագործակցության ոլորտները և ուղիները:

ՀՀ-ում Հնդկաստանի դեսպանի հետ տեղի ունեցած հանդիպմանը ներկա էին նաև ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանն ու Միջազգային համագործակցության վարչության պետ Ալեքսանդր Մարգարովը:

 

Գեղամ Գևորգյանը դեսպանին ներկայացրեց բուհի կառուցվածքը, գործունեության ոլորտները և իրականացվող աշխատանքները՝ փաստելով, որ այն ամենամեծ և ամենահին համալսարանն է Հայաստանում:

 

Պարոն Կիշան դան Դեվալը, շնորհակալություն հայտնելով ընդունելության համար, իր պատրաստակամությունը հայտնեց նպաստելու ԵՊՀ-ի արդյունավետ համագործակցությանը Հնդկաստանի համապատասխան կառույցների, ինչպես նաև դեսպանատան հետ:

 

Արթուր Իսրայելյանը փաստեց, որ Արևելագիտության ֆակուլտետում ուսուցանվել է հնդկերենը՝ որպես երկրորդ և երրորդ օտար լեզու: Ալեքսանդր Մարգարովն էլ հիշեցրեց, որ դեռևս մի քանի տարի առաջ Արևելագիտության ֆակուլտետում գործել է հնդկական հետազոտությունների կենտրոն-ամբիոն, որտեղ դասավանդում էր հնդիկ մասնագետ, սակայն հետագայում առաջ եկած կազմակերպչական խնդիրների պատճառով դրա գործունեությունը դադարեցվել է:

 

Պարոն Կիշան դան Դեվալը փաստեց, որ դեսպանատունը ցանկանում է վերականգնել այդ կենտրոնը, և Գեղամ Գևորգյանին փոխանցեց փոխըմբռնման հուշագրի նախնական տարբերակ՝ ծանոթանալու և հետագայում այն վավերացնելու համար:

 

Դեսպանը հետագա փոխհամագործակցության համար առաջարկեց քննարկել և հասկանալ, թե ինչ ոլորտներ կարող է այն ընդգրկել, և դրա իրականացման համար անհրաժեշտ քայլեր իրականացնել:

 

 

Ալեքսանդր Մարգարովը դեսպանին տեղեկացրեց, որ ԵՊՀ-ում գործում է Ֆարմացիայի ինստիտուտը, որտեղ ստեղծված են միջազգային չափորոշիչներին համապատասխան գիտակրթական գործունեություն ծավալելու իրական հնարավորություններ. «Ինստիտուտն առաջարկում է որակյալ կրթություն համեմատաբար ավելի ձեռնտու վարձավճարի դիմաց»:

 

«Բացի դրանից՝ ԵՊՀ ֆարմացիայի ինստիտուտում կազմակերպվում է ՌԴ Բելգորոդի պետական հետազոտական և Ռուսաստանի ժողովուրդների բարեկամության համալսարանների դեղագործական ֆակուլտետների հետ հաստատված համատեղ կրթական ծրագրերով ուսուցում, որի արդյունքում շրջանավարտներին շնորհվում է դեղագետի որակավորմամբ երկակի (երկու համալսարանների) դիպլոմներ»,- ասաց Ալեքսանդր Մարգարովը և հույս հայտնեց, որ դեսպանության միջոցով ինստիտուտի մասին կտեղեկացվի Հնդկաստանի հանրությանը:

 

Հանդիպման ընթացքում կողմերը քննարկեցին նաև ԵՊՀ-ի և Հնդկաստանի բուհերի միջև առկա համագործակցությունն ամրապնդելու և նոր համալսարանների հետ պայմանագրեր ու համաձայնագրեր կնքելու վերաբերյալ հարցեր:

 

Գեղամ Գևորգյանը դեսպանին տեղեկացրեց, որ ԵՊՀ-ում գործում է Հայ-հնդկական տեղեկատվական և հաղորդակցության տեխնոլոգիաների գերազանցության կենտրոնը, որի գործունեությունն ամրապնդում է հայ-հնդկական երկկողմ համագործակցությունը տեղեկատվական և հաղորդակցության տեխնոլոգիաների (ՏՀՏ) ոլորտում: Նա առաջարկեց այդ ուղղությամբ ևս խորացնել համագործակցությունը:

 

Պարոն Կիշան դան Դեվալը ցանկություն հայտնեց դասախոսությամբ հանդես գալու համալսարանի ուսանողների համար, ինչին ի պատասխան՝ Գեղամ Գևորգյանն ասաց, որ անպայման կտրվի նման հնարավորություն:

 

Հանդիպման ավարտին Գեղամ Գևորգյանը և պարոն Կիշան դան Դեվալը միմյանց գրքեր նվիրեցին, որից հետո Արթուր Իսրայելյանը և Ալեքսանդր Մարգարովը դեսպանին ուղեկցեցին Իսլամագիտության կենտրոն՝ ծանոթանալու դրա կառուցվածքին և այն՝ որպես օրինակ, դիտարկելու հետագայում հնդկական կենտրոն ստեղծելու համար:

 

Քնար Միսակյան

Այլ նորություններ
ԵՊՀ ԻՐԱՎԱԲԱՆԱԿԱՆ ԿԼԻՆԻԿԱՆ ՇՆՈՐՀԱՎՈՐԵԼ ԵՎ ՎԿԱՅԱԳՐԵՐ Է ՇՆՈՐՀԵԼ ԻՐ 20-ՐԴ ՏԱՐՎԱ ՇՐՋԱՆԱՎԱՐՏՆԵՐԻՆ
Իրավաբանական կլինիկան 2019-2020 ուսումնական տարում տոնում է իր 20-ամյակը։ Ինչպես նախորդ տարիներին, կլինիկան 20-րդ տարվա շրջանավարտներին ևս ճանապարհում է վկայագրերով, որոնք այս տարի ուսանողներին նախապես ուղարկվել էին փոստով։
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ԹԻՄԸ ՀԱՂԹԵԼ Է ԱՐԲԻՏՐԱԺ ԽԱՂ-ՄՐՑՈՒՅԹՈՒՄ
ԵՊՀ իրավագիտության ֆակուլտետի թիմը մասնակցել ու հաղթող է ճանաչվել Հայաստանի ամերիկյան համալսարանի մեդիացիոն և արբիտրաժային կլինիկայի և ՀՀ արբիտրների ասոցիացիայի կողմից կազմակերպվող ամենամյա դատախաղ-մրցույթին, որը գրավոր եղանակով անցկացվել է հունիսի 19-30-ը։