25.05.2018 | 
Կրթություն
«ԱՅՍ ՏԱՐԻՆ ՀՈԲԵԼՅԱՆԱԿԱՆ Է ԹԵ՛ ՎՐԱՍՏԱՆԻ ԵՎ ԹԵ՛ ՀԱՅԱՍՏԱՆԻ ՀԱՄԱՐ». ԴԵՍՊԱՆ ԳԵՈՐԳԻ ՍԱԳԱՆԵԼԻՁԵՆ
«ԱՅՍ ՏԱՐԻՆ ՀՈԲԵԼՅԱՆԱԿԱՆ Է ԹԵ՛ ՎՐԱՍՏԱՆԻ ԵՎ ԹԵ՛ ՀԱՅԱՍՏԱՆԻ ՀԱՄԱՐ». ԴԵՍՊԱՆ ԳԵՈՐԳԻ ՍԱԳԱՆԵԼԻՁԵՆ
Այսօր ԵՊՀ-ում Թբիլիսիի պետական համալսարանի պրոֆեսոր Գեորգի Օթխմեզուրին «Վրաստանի անկախության 100 տարվա ճանապարհ» խորագրով դասախոսություն ներկայացրեց:

Դասախոսությանը ներկա էին Միջազգային համագործակցության վարչության պետ Ալեքսանդր Մարգարովը, ինչպես նաև ՀՀ-ում Վրաստանի արտակարգ և լիազոր դեսպան Գեորգի Սագանելիձեն: Դեսպանը մեզ հետ զրույցում անդրադարձավ ինչպես հայ-վրացական հարաբերություններին, այնպես էլ Վրաստանի անկախության 100-ամյակին: 


«Այս տարին հոբելյանական է թե՛ Վրաստանի և թե՛ Հայաստանի համար: Երկու երկրներն էլ նշելու շատ կարևոր առիթ ունեն՝ անկախության 100-ամյակը: Մենք որոշեցինք դասախոսություն կազմակերպել «Վրաստանի անկախության 100 տարվա ճանապարհ» թեմայի շրջանակում, իսկ այս հարցում մեզ իր աջակցությունը ցուցաբերեց ԵՊՀ ռեկտոր Արամ Սիմոնյանը»,- ասաց Գեորգի Սագանելիձեն:

1918 թ.-ի մայիսին հռչակվել է Վրաստանի Դեմոկրատական Հանրապետությունը: Եվ այս տարեթիվը, իհարկե, Վրաստանի պատմության մեջ առանձնահատուկ է:

«Վրաց ժողովրդի համար 1918 թվականը շատ կարևոր տարեթիվ է, և Թբիլիսին այն առանձնահատուկ ճոխությամբ և ոգևորությամբ է նշում,- ասաց դեսպանը,- այս տարի ես հնարավորություն ունեմ տոնը նշելու մեր հարևան և բարեկամ երկրի՝ Հայաստանի հետ, քանի որ հայ ժողովուրդը մայիսի 28-ին նշում է իր անկախության հարյուրամյակը: Այս իմաստով, ինչպես նաև աշխարհագրորեն, մենք մոտ ենք իրար և կանգնած ենք կողք կողքի»:



Դասախոսության ընթացքում Թբիլիսիի պետական համալսարանի պրոֆեսոր Գեորգի Օթխմեզուրին անդրադարձավ երկու եղբայր երկրների անկախության հռչակման պատմական ժամանակահատվածին՝ ընդգծելով Հայաստանի և Վրաստանի պատմության առանձնահատկությունները:

Վրաց ժողովուրդը նույնպես ստիպված է եղել պայքարել օտար զավթիչների դեմ: Տարբեր ժամանակաշրջաններում Վրաստանի նկատմամբ քաղաքական հետաքրքրվածությունը մեծ է եղել, որովհետև վերջինս ունեցել է աշխարհագրական նպաստավոր դիրք: Վրաստանով է անցել «մետաքսե ճանապարհը», որը հին աշխարհի ամենահայտնի առևտրային ուղիներից էր:

Պատմական իրադարձությունները ցույց են տալիս, որ նաև առևտրային այս ճանապարհն է նպաստել, որ Վրաստանը միշտ լինի մեծ տերությունների ուշադրության կենտրոնում: Նախկինում այդ երկրներից են եղել Ասորեստանն ու Բյուզանդիան, իսկ հիմա՝ Ռուսաստանը, Իրանը և Ամերիկայի Միացյալ Նահանգները:

Եվ չնայած պատմական բազմաթիվ վտանգավոր մարտահրավերներին՝ Վրաստանն իր ազգային բարձր գիտակցման և միասնականության շնորհիվ կարողացել է պահել պետականությունը:

Միշտ էլ նվաճողների համար ծանոթ մարտավարություն է եղել «բաժանի՛ր, որ տիրես» սկզբունքը: Այդ պատճառով էլ պատմական տարբեր դարաշրջաններում վրաց ժողովրդի համար միասնական լինելը կենսական անհրաժեշտություն է եղել:

Վերջում բանախոսը նշեց, որ Վրաստանի պատմությունը լի է պայքարի, բայց նաև հաղթանակների մասին պատմող էջերով, որոնք առանձնահատուկ տեղն են գրավում համաշխարհային պատմության մեջ:


Անի Պողոսյան

Այլ նորություններ
ՎԱՆԱՁՈՐԻ ԱՇԱԿԵՐՏՆԵՐԻՆ ՆԵՐԿԱՅԱՑՎԵՑԻՆ ԵՊՀ ԿՐԹԱԿԱՆ ԾՐԱԳՐԵՐԸ
ԵՊՀ մաթեմատիկայի և մեխանիկայի, կենսաբանության, սոցիոլոգիայի, ֆիզիկայի և քիմիայի ֆակուլտետների պրոֆեսորադասախոսական կազմի ներկայացուցիչներն այսօր այցելել են Վանաձորի թիվ 5 և «Էվրիկա» բնագիտամաթեմատիկական թեքումով հատուկ դպրոցներ` համալսարանի կրթական ծրագրերը և ֆակուլտետները ներկայացնելու համար:
ԵՐԻՏԱՍԱՐԴ ԿԵՆՍԱԲԱՆՆԵՐԻ ՄԻՋԱԶԳԱՅԻՆ ԳԻՏԱԺՈՂՈՎ ԾԱՂԿԱՁՈՐՈՒՄ
Հոկտեմբերի 5-7-ը տեղ է ունեցել «Կենսաբազմազանություն ու վայրի բնության պահպանության էկոլոգիական հիմնախնդիրներ» թեմայով ԳԱԱ 75-ամյակին նվիրված երիտասարդ գիտնականների երկրորդ միջազգային գիտաժողովը, որն անցկացվել է Ծաղկաձորում: