06.09.2016 | 
Կրթություն
ԵՊՀ ՈՒՍԱՆՈՂՈՒՀԻՆ ԵՐԿՐՈՐԴ ՏԵՂՈՒՄ Է
ԵՊՀ ՈՒՍԱՆՈՂՈՒՀԻՆ ԵՐԿՐՈՐԴ ՏԵՂՈՒՄ Է
Օգոստոսի 24-ից սեպտեմբերի 3-ը Հունաստանում անցկացվել է նոր հունարենի համաշխարհային օլիմպիադա, որին մասնակցել է նաև ԵՊՀ ուսանողուհին:

Օլիմպիադան, որը նվիրված է եղել Արիստոտելի համալսարանի հիմնադրման 90-ամյակին, կազմակերպել են Պոնտական երիտասարդության համաշխարհային կորդինացիոն կոմիտեն և Սալոնիկի Արիստոտելի անվան համալսարանը: Այն անցկացվել է ՅՈՒՆԵՍԿՕ-ի գործերով հունական ազգային հանձնաժողովի հովանու ներքո: Մասնակցել են արտերկրում ապրող 18-25 տարեկան ուսանողներ և երիտասարդներ, ովքեր Հունաստանում չեն գտնվել ընդհանուր հաշվարկով 3 ամսից ոչ ավելի: Առաջին փուլում մասնակիցները մրցել են տեղային մակարդակով՝ հանձնելով Արիստոտելի համալսարանի նոր հունարենի դպրոցի կողմից պատրաստված քննությունը:

 

Քննություններն անցկացվել են ԱՄՆ-ի, Ուկրաինայի, Ռուսաստանի, Մոլդովայի, Ավստրալիայի, Ադրբեջանի, Վրաստանի, Գերմանիայի և Հայաստանի համալսարաններում: Հաջորդ փուլ են անցել 14 մասնակիցներ, որոնց թվում է եղել նաև ԵՊՀ ռուս բանասիրության ֆակուլտետի 4-րդ կուրսի ուսանողուհի Նարինե Հակոբյանը:

 

Երկրորդ փուլ անցած մասնակիցները հանդիպել են Սալոնիկում, որտեղից ուղևորվել են Արիստոտելի համալսարանի ճամբար: Այնտեղ անցկացվել են նոր հունարենի դասընթացներ: Դասախոսությունները  վարել են Արիստոտելի համալսարանի առաջատար մասնագետները: Կազմակերպվել են քննարկումներ, փորձի փոխանակում և այլն:

 

Միջազգային օլիմպիադայի փակումը տեղի է ունեցել սեպտմեբերի 3-ին: Առաջին տեղը գրավել է Ուկրաինան ներկայացող 23-ամյա Աննա Վիննիկը, երկրորդ տեղում Հայաստանը ներկայացնող 20-ամյա Նարինե Հակոբյանն էր, ով հաղթողին զիջում էր ընդամենը 1 միավորով: Երրորդ տեղում կրկին Ուկրաինայի ներկայացուցիչն էր, 23-ամյա Վալենտինա Օլեյնիկը: Հաղթողները պարգևատրվել են հավաստագրերով և դրամական միջոցներով:

 

ԵՊՀ ուսանողուհին մեզ հետ զրույցում նշեց, որ ծրագրին մասնակցելուց առաջ մեծ սպասելիքներ է ունեցել. «Մասնակցելով այս մրցույթին՝ հասկացա, որ հնարավորություն կա մագիստրատուրան շարունակելու հենց այդ ուղղությամբ: Հունարեն լեզուն ուսումնասիրում եմ արդեն երեք տարի. այն աշխարհի հնագույն լեզուներից է և լեզվաբանի համար մեծ արժեք ունի: Կարևոր է մասնակցել նմանաբնույթ միջոցառումներին, քանի որ և՛ լեզվի մակարդակն ես ստուգում, և՛ կիրառում այն գործնականում, և՛ շփվում լեզվի կրողների հետ»:

Այլ նորություններ
ՀԱՅՏԱՐԱՐՈՒԹՅՈՒՆ
2020/2021 ուսումնական տարվա առաջին կիսամյակի առաջին ընթացիկ քննությունների ժամկետը հետաձվգել է մեկ շաբաթով: Դրանք իրականացվելու են նոյեմբերի 2-7-ն ընկած ժամանակահատվածում:
ՆՈՐ ԳԻՏԵԼԻՔՆԵՐ ՄԵԴԻԱԴԱՇՏԻ ԻՐԱՎԱԿԱՆ ԿԱՐԳԱՎՈՐՈՒՄՆԵՐԻ ՎԵՐԱԲԵՐՅԱԼ. ՄԵԿՆԱՐԿԵԼ Է «ՄԵԴԻԱ ԻՐԱՎՈՒՆՔ» ԴԱՍԸՆԹԱՑԸ
ԵՊՀ իրավագիտության ֆակուլտետի նախաձեռնությամբ և «Կոնրադ Ադենաուեր» գերմանական քաղաքական հիմնադրամի աջակցությամբ մեկնարկել է «Մեդիա իրավունք» կրթական ծրագիրը, որը նպաստելու է մասնակիցների իրավական գրագիտության բարձրացմանը: