15.07.2014 | 
Գիտություն
ԱՐՅՈՒՆԱԲԱՆՈՒԹՅՈՒՆԸ ԵՊՀ-ՈՒՄ ԿԴԱՍԱՎԱՆԴՎԻ ՆՈՐ ՄԱԿԱՐԴԱԿՈՎ
ԱՐՅՈՒՆԱԲԱՆՈՒԹՅՈՒՆԸ ԵՊՀ-ՈՒՄ ԿԴԱՍԱՎԱՆԴՎԻ ՆՈՐ ՄԱԿԱՐԴԱԿՈՎ
ԵՊՀ կենսաբանության ֆակուլտետում «Հեմատոլոգիա» (արյունաբանություն) դասընթացը ևս 3 տարի ուսումնասիրվելու է «TEMPUS» ծրագրի օգնությամբ:

Այս օրերին Հայաստանում են ծրագրի համակարգող թիմի անդամները, ովքեր քննարկումների և մշտադիտարկման միջոցով կհստակեցնեն, թե ինչ է հարկավոր անել դասընթացը զարգացնելու և ավելի արդյունավետ դարձնելու համար: Այսօր էլ նրանք հյուրընկալվել էին ԵՊՀ կենսաբանության ֆակուլտետում (աշխատաժողովի ժամանակացույցը կցվում է): 

 

Նշենք, որ Հայաստանից ծրագրում ընդգրկված են ԵՊՀ-ն, Երևանի Մ. Հերացու անվան պետական բժշկական համալսարանը և Պրոֆեսոր Ռ. Յոլյանի անվան արյունաբանական կենտրոնը: Իսկ եվրոպական երկրներից ծրագիրը համակարգում է Մեծ Բրիտանիայի Վեստմայնստերի համալսարանը: Մինչ ԵՊՀ կենսաբանության ֆակուլտետում հյուրընկալվելը ծրագրի համակարգողները քննարկումներ են ունեցել նաև մյուս երկու կառույցներում:

 

«Իհարկե արյունաբանությունը շատ բնորոշ չէ համալսարանին, բայց Տ. Մուշեղյանի անվան մարդու և կենդանիների ֆիզիոլոգիայի ամբիոնում մենք ունենք այդպիսի դասընթաց (բակալավրիատում): Պետք է քննարկենք, թե ինչպիսին պետք է լինի դասընթացի ուսումնական պլանը, թե ինչ սարքավորումներ են անհրաժեշտ, որպեսզի լաբորատոր աշխատանքները պատշաճ մակարդակով կազմակերպվեն և այլն»,- ասում է ֆակուլտետի դեկան Էմիլ Գևորգյանը:

     

 

Ի դեպ, ֆակուլտետն արդեն առանձնացրել է լսարան, որտեղ պետք է անցկացվի արյունաբանության դասընթացը. այն մասնակիորեն ապահովված է լաբորատոր սարքավորումներով, որոնք, սակայն, բավարար չեն դասընթացը լիարժեք անցկացնելու համար:

 

Նախքան քննարկմանն անցնելը արտասահմանյան հյուրերը հանդիպեցին ԵՊՀ գիտական քաղաքականության և միջազգային համագործակցության գծով պրոռեկտոր Գեղամ Գևորգյանի, Կենսաբանության ֆակուլտետի դեկան Էմիլ Գևորգյանի և ԵՊՀ-ում ծրագրի համակարգող, Մարդու և կենդանիների ֆիզիոլոգիայի ամբիոնի դոցենտ Սուսաննա Սահակյանի հետ, շրջեցին արյունաբանության լսարանում, այնուհետև այցելեցին Կենսաբանության ֆակուլտետի կազմում ստեղծված Կիրառական կենսաբանության գերազանցության կենտրոն, որի պաշտոնական բացումը կլինի այս տարվա նոյեմբերին:

 

 

«Ես և Փեթեր Լիլյարդը մեր հայ գործընկերների հետ աշխատելու փորձ ունենք դեռևս 2000 թ-ից. արդեն 3 ծրագիր ենք համակարգել: Այս անգամ էլ, օգտագործելով ուսուցման տարբեր մեթոդներ, փորձում ենք ներդնել արյունաբանության ուսումնասիրման նոր ծրագրեր»,- ասում է ծրագրի համակարգողներից մեկը՝ Վեստմայնստերի համալսարանի պրոֆեսոր Նինո Պորակիշվիլին:

 

Նույն համալսարանի մեկ այլ պրոֆեսոր Մայքլ Գորջն էլ, ով համակարգելու է ծրագիրը հենց ԵՊՀ-ի հետ, տպավորված է Կենսաբանության ֆակուլտետում կատարած շրջայցից. «Այն, որ դասընթացի համար տեղ է առանձնացված, շատ լավ է, մենք պետք է փորձենք բարելավել պայմանները: Քննարկումն էլ հենց նրա համար է, որ լսենք մեր գործընկերների առաջարկությունները»:

Ներկայումս ԵՊՀ ռեկտորատի կողմից հաստատված է մարդու և կենդանիների ֆիզիոլոգիայի ամբիոնում կարդացվող «Հեմատոլոգիա» դասընթացի նորացված ծրագիրը, որն ուժի մեջ կմտնի 2015-2016 ուս. տարուց:

Այլ նորություններ
ԵՊՀ-ՈՒՄ ՏԵՂԻ ՈՒՆԵՑԱՎ ECER 2022 ՀԱՄԱԺՈՂՈՎԻ ՇՐՋԱՆԱԿՈՒՄ ԿԱԶՄԱԿԵՐՊՎԱԾ ՄԱՄՈՒԼԻ ԱՍՈՒԼԻՍԸ
Ասուլիսի ժամանակ ներկայացվեցին համաժողովի կազմակերպման ընթացքը, ընտրված թեմայի արդիականությունը, ինչպես նաև ընդգծվեց համաժողովի կարևորությունը ՀՀ կրթական համակարգի զարգացման գործում։ Լրատվամիջոցների ներկայացուցիչներն ասուլիսի ավարտին տվեցին հարցեր՝ կապված համաժողովի, վերջինիս ընձեռած հնարավորությունների և ԵՊՀ-ում իրականացվող նկատելի բարեփոխումների վերաբերյալ։
ԵՊՀ-ՈՒՄ ԳՈՐԾՈՒՄ Է «ՎԻԶՈՒԱԼ ՀԱՇՎԱՐԿ» ՄԱԳԻՍՏՐՈՍԱԿԱՆ ԾՐԱԳԻՐԸ
Հայաստանում առաջին անգամ 2010 թվականին մեկնարկել է ԵՊՀ տեղեկատվական տեխնոլոգիաների կրթական և հետազոտական (ՏՏԿՀ) կենտրոնի և Գերմանիայի Ռոստոկի համալսարանի «Վիզուալ հաշվարկ» մագիստրոսական համատեղ կրթական ծրագիրը։ Այն իրականացվում է Գերմանական ակադեմիական փոխանակման ծառայության (DAAD) աջակցությամբ: