27.01.2021 | 
Կրթություն, Հասարակություն
«ՊԱՏՄՈՒԹՅՈՒՆԸ ՊԵՏՔ Է ՄՆԱ ՍԵՐՈՒՆԴՆԵՐԻՆ». ՀԱՆՐԱԳԻՏԱՐԱՆ՝ ՆՎԻՐՎԱԾ ԱՐՑԱԽՅԱՆ ԵՐԿՐՈՐԴ ՊԱՏԵՐԱԶՄԻ ԶՈՀԵՐԻՆ
«ՊԱՏՄՈՒԹՅՈՒՆԸ ՊԵՏՔ Է ՄՆԱ ՍԵՐՈՒՆԴՆԵՐԻՆ». ՀԱՆՐԱԳԻՏԱՐԱՆ՝ ՆՎԻՐՎԱԾ ԱՐՑԱԽՅԱՆ ԵՐԿՐՈՐԴ ՊԱՏԵՐԱԶՄԻ ԶՈՀԵՐԻՆ
Երևանի պետական համալսարանի պատմության ֆակուլտետի դեկան Էդիկ Մինասյանը նախաձեռնել է Արցախյան երկրորդ պատերազմում զոհվածների մասին «Հերոսապատում» հանրագիտարանային շարքի ստեղծումը։ Աշխատության մեջ ներկայացվելու են պատերազմի մասնակիցների կատարած սխրանքները, կենսագրությունը, լուսանկարները, նրանց մասին հուշերն ու պատմությունները։

Մեզ հետ զրույցում Է. Մինասյանն ասաց, որ Արցախյան առաջին և Քառօրյա պատերազմների մասին արդեն իսկ կան գրքեր, իսկ Արցախյան երկրորդ պատերազմում հերոսացած տղաների մասին սա առաջին մեծածավալ աշխատությունն է լինելու։

Դեկանը նշեց, որ «Հերոսապատում»-ը ստեղծելու աշխատանքներին մասնակցում է նաև ԵՊՀ դասախոս Մերի Հովհաննիսյանը։

Ըստ նախնական տվյալների՝ համալսարանն այս պատերազմում ունեցել է 55 զոհ։ Նրանց հերոսությունների մասին պատմությունն անհրաժեշտություն է:

Է․ Մինասյանի խոսքով, Արցախյան երկրորդ պատերազմի՝ համալսարանում ուսումը կիսատ թողած ուսանող և շրջանավարտ զոհերի մասին աշխատությունը լույս է տեսնելու այս տարի․ «Այն լայնածավալ հանրագիտարան է լինելու, որտեղ տեղ են գտնելու հերոսների մասին կենսագրական տվյալներ, հուշեր, լուսանկարներ և քաջագործությունների մասին պատմություններ»։

«Հերոսապատում» հանրագիտարանի առաջին հատորը նվիրվելու է համալսարանական հերոսներին, իսկ հաջորդիվ անդրադարձ է կատարվելու նաև մյուսներին՝ ըստ մարզերի։

«Այս ամենը կազմակերպելը բավականին ժամանակատար գործ է, պետք է դիմենք մարզերի, համայնքների ղեկավարներին, ուսուցիչներին, պատերազմի մասնակիցների ծնողներին, որպեսզի նրանց մասին մանրամասն տեղեկություններ հավաքենք»,- հավելեց Է․ Մինասյանը:

ԵՊՀ դեկանը նշեց նաև, որ շարքն ամբողջությամբ նախատեսվում է ավարտել առաջիկա 5 տարիների ընթացքում։

Այլ նորություններ
«ՔԱՂԱՔԱԿԱՆՈՒԹՅՈՒՆԸ ԵՎ ՔԱՂԱՔԱԿԱՆՈՒԹՅԱՆ ՀԵՏԵՎԱՆՔՆԵՐՆ ԻՐԱԿԱՆՈՒՄ ՇԱՏ ԽՈՐՔԱՅԻՆ ԳՈՐԾԸՆԹԱՑՆԵՐ ԵՆ, ՈՐՈՆՔ ԱՄԲՈՂՋՈՎԻՆ ՏԵՍԱՆԵԼԻ ՉԵՆ». ՍՈՖՅԱ ՀՈՎՍԵՓՅԱՆԸ ՀԱՆԴԵՍ Է ԵԿԵԼ ԲԱՆԱԽՈՍՈՒԹՅԱՄԲ
Միջազգային հարաբերությունների ֆակուլտետի ՈԻԳԸ-ի նախաձեռնությամբ այսօր ԵՊՀ Պալեանների անվան դահլիճում «Քաղաքական հոգեբանություն» խորագրով բանախոսությամբ է հանդես եկել քաղաքական գործիչ, 7-րդ գումարման ԱԺ պատգամավոր Սոֆյա Հովսեփյանը:
ՀԱՅ-ՌՈՒՍԱԿԱՆ ՌԱԶՄԱՔԱՂԱՔԱԿԱՆ ԶԱՐԳԱՑՈՒՄՆԵՐԸ ՎԵՐԼՈՒԾԱԲԱՆ ՆԻԿՈԼԱՅ ՍԻԼԱԵՎԻ ԴԻՏԱՐԿՄԱՄԲ
ԵՊՀ միջազգային հարաբերությունների ֆակուլտետում այսօր հյուրընկալվել էր ՌԴ ԱԳՆ համակարգում գործող միջազգային հետազոտությունների ինստիտուտի առաջատար գիտաշխատող, ինստիտուտի քաղաքական հետազոտությունների վերլուծական լաբորատորիայի տնօրեն Նիկոլայ Սիլաևը: