17.04.2014 | 
Գիտություն
ՍՈՒՐԲ ԶԱՏԻԿ. ՄԵԿՆԱԲԱՆՈՒՄ ԵՆ ՈՒՍԱՆՈՂՆԵՐԸ
ՍՈՒՐԲ ԶԱՏԻԿ. ՄԵԿՆԱԲԱՆՈՒՄ ԵՆ ՈՒՍԱՆՈՂՆԵՐԸ
Այսօր մամուլի ասուլիսով հանդես են եկել ԵՊՀ աստվածաբանության ֆակուլտետի ուսանողները:

Բանն այն է, որ մեկնարկում է ԵՊՀ ուսանողական գիտական ընկերության «Ուսանողական մամուլի ասուլիս» գիտահանրամատչելի միջոցառումների շարքը: Նախաձեռնողը ՈՒԳԸ տեղեկատվական հանձնաժողովն է:

 

«Որոշեցինք միջոցառումն անցկացնել մամուլի ասուլիսի ձևով, որովհետև այլ ձևաչափերում բանախոսը նյութը ներկայացնում է զեկույցի ձևով` մեկը խոսում է, մյուսները պարզապես լսում են: Իսկ այս դեպքում հենց սկզբից հարց ու պատասխան է լինում, ուսանողներն իրենց պատկերացնում են ԶԼՄ ներկայացուցիչների դերում: Փոքր-ինչ հնարված է, բայց կարծում ենք՝ ավելի նպատակահարմար է այս միջոցառումներն անցկացնելու համար»,- ասում է ՈՒԳԸ տեղեկատվական հանձնաժողովի քարտուղար Դիանա Եղիազարյանը:

 

Առաջին ասուլիսը նվիրված էր Հայ առաքելական եկեղեցու տաղավար տոներից մեկին՝ Սուրբ Հարության տոնին, իսկ բանախոսներն Աստվածաբանության ֆակուլտետի տարբեր կուրսերի ուսանողներն էին՝ Դավիթ Գրիգորյանը, Դիանա Գրիգորյանը, Մանե Ղևոնդյանը, Նելլի Մկրտչյանն ու Մարիամ Հարությունյանը: Նախ նրանցից յուրաքանչյուրը ներկայացրեց տոնի որևէ բաղկացուցիչ: Սկսելով Մեծ պահքից՝ նրանք խոսեցին պահոց կիրակիների նշանակության ու խորհրդի, Ավագ շաբաթվա օրերի, «Զատիկ» բառի նշանակության, ինչպես նաև Զատկի սեղանին բնորոշ ուտեստների մասին:

 

Այնուհետև ուսանող-բանախոսները սկսեցին պատասխանել ներկաների հարցերին, որոնք վերաբերում էին տոնի տարբեր մեկնաբանություններին, տոնը նշելիս ժողովրդական և եկեղեցական ընկալումներին, տարբեր ծիսակարգերի խորհուրդներին և այլն:

 

«Իմ տեսանկյունից՝ մարդկանց շրջանում ավելի շատ տարածված են տոները նշելու ժողովրդական, քան հոգևոր ընկալումները: Վերջին տարիներին է, որ ժողովուրդը սկսել է մոտենալ եկեղեցուն, ասենք` պատարագ գնալ»,- ասում է Մանե Ղևոնդյանը, իսկ Նելլի Մկրտչյանն էլ հավելում է, որ ԶԼՄ-ներն այսօր նպաստում են, որ տոները ոչ միայն ժողովրդական բնույթ կրեն, այլև հոգևոր. «Օրինակ Վարդենիսում կա միայն մեկ եկեղեցի, և ես մեկ քահանայի եմ ճանաչում: Վստահ չեմ, որ այդ քահանան բոլոր գյուղերով շրջում է ու հասցնում է բացատրել բոլոր տոների իմաստը»:

Այլ նորություններ
ԵՊՀ-ՈՒՄ ՊԱՀՊԱՆՎԱԾ ԳՐԱՆՑԱՄԱՏՅԱՆԸ՝ ԳԻՏԱԿԱՆ ԱՌԱՋԻՆ ԱՍՏԻՃԱՆՆԵՐԻ ՇՆՈՐՀՄԱՆ ՎԿԱՅԱԳԻՐ
ԵՊՀ-ում պահպանվում է թեկնածուական և դոկտորական ատենախոսությունների պաշտպանությունների վերաբերյալ տեղեկությունների առաջին գրանցամատյանը, ըստ որի՝ թեկնածուական ատենախոսության առաջին պաշտպանությունը տեղի է ունեցել 1938 թվականին, իսկ դոկտորական ատենախոսության պաշտպանությունը՝ 1943 թվականին:
«ՑԱՎՈՔ, ԱՅԺՄ ՀԱՄԱԼՍԱՐԱՆՆԵՐԸ ԵՎՍ ՇԱՐԺՎՈՒՄ ԵՆ ԴՊՐՈՑԻ ՕՐԻՆԱԿՈՎ, ԱՅՍԻՆՔՆ` ՄԵՆՔ ՄԱՐԴՈՒՆ ՍՈՎՈՐԵՑՆՈՒՄ ԵՆՔ ՈՉ ԹԵ ՄՏԱԾԵԼ, ԱՅԼ ԳՈՐԾԻՔ ԿԻՐԱՌԵԼ, ԲԱՅՑ ԳՈՐԾԻՔ ՍՏԵՂԾԵԼ ՉԵՆՔ ՍՈՎՈՐԵՑՆՈՒՄ». ԴԱՎԻԹ ՀԱՅՐԱՊԵՏՅԱՆ
ԵՊՀ փիլիսոփայության և հոգեբանության ֆակուլտետի ընդհանուր հոգեբանության ամբիոնի դոցենտ Դավիթ Հայրապետյանի հետ խոսել ենք ստեղծարարության (կրետիվության) զարգացման մեթոդների, հիմնախնդիրների և դպրոցի անհրաժեշտության մասին: