23.05.2018 | 
Քաղաքականություն
ԵՊՀ ԴԱՍԱԽՈՍԸ ՆԵՐԿԱՅԱՑՐԵՑ ԲԱՐՈՅԱԿԱՆ ՀԱՍԱՐԱԿԱՐԳ ԿԱՌՈՒՑԵԼՈՒ ՀԱՄԱՐ ԱՆՀՐԱԺԵՇՏ ՍԱՀՄԱՆԱԴՐՈՒԹՅԱՆ ՈՒՐՎԱԳԻԾԸ
ԵՊՀ ԴԱՍԱԽՈՍԸ ՆԵՐԿԱՅԱՑՐԵՑ ԲԱՐՈՅԱԿԱՆ ՀԱՍԱՐԱԿԱՐԳ ԿԱՌՈՒՑԵԼՈՒ ՀԱՄԱՐ ԱՆՀՐԱԺԵՇՏ ՍԱՀՄԱՆԱԴՐՈՒԹՅԱՆ ՈՒՐՎԱԳԻԾԸ
ԵՊՀ ֆիզիկայի ֆակուլտետի դասախոս Մերուժան Հարությունյանն այսօր ԵՊՀ-ում հանրային քննարկմանը ներկայացրեց իր կազմած «Բարոյակարգ հաստատելու դրույթները» վերնագրով 18-էջանոց առաջարկությունների ձեռնարկը:

Բանախոսը նշեց, որ արդեն 30 տարի է՝ զբաղվում է բարոյագիտության և սահմանադրագիտության հարցերով, և միշտ մտածել  է այն հարցի շուրջ, թե ինչպես պետք է սահմանադրությունը կազմված լինի, որ երկիրը ծաղկի:

 

«Ես ինքս մտածում էի, թե իմ այս ձեռնարկի հարկը չկա, մանավանդ որ արդեն 70 տարեկան եմ: Սակայն թավշյա իշխանափոխությունից հետո տեսնելով, որ հասարակական կոնֆլիկտներն ու ժողովրդի դժգոհությունը չեն մարում, մտածեցի ներկայացնել բարոյակարգ, այսինքն՝ բարոյական հասարակական կարգ կառուցելու համար անհրաժեշտ սահմանադրության ուրվագիծը»,- հավելեց Մերուժան Հարությունյանը:

 

Բանախոսի խոսքով, «Բարոյակարգ հաստատելու դրույթները» վերնագրով  առաջարկությունների ձեռնարկը ներկայացնում է ընդամենը հնարավոր նոր սահմանադրության էության ուրվագիծը: «Ես այն կազմել եմ՝ հաշվի առնելով մեր քաղաքակրթության կենսափորձը և գիտական տնտեսագիտությունն ու իրավագիտությունը մոտ 30 տարի ուշադիր ուսումնասիրելուց հետո»,- ասաց նա:

 

«Պետք է նշեմ, որ «Բարոյակարգ հաստատելու դրույթները» վերնագրով առաջարկությունների ձեռնարկում առաջարկում եմ, որ իշխանությունը պետք է բաժանվի երեք անկախ թևի՝ օրենսդիր ժողովի, կառավարության ու լրիվ անկախ դատարանների: Ազգային ժողովը պետք է զբաղվի միայն օրենսդրական հարցերով և չպետք է ունենա ոչ մի գործադիր ֆունկցիա, ՀՀ վարչապետի ղեկավարությամբ կառավարությունը պետք է զբաղվի այն հարցերով, որոնք չեն վերաբերվում ազատ շուկային, այլ պետք է հետևի օրենքի անխափան կատարմանը,  իսկ դատական իշխանությունը պետք է բացարձակ անկախ լինի:  Այս երեք թևերը պետք է իրարից բացարձակ անկախ լինեն և հսկելի՝ անկախ դատարանների միջոցով: Ինչպես նաև պետական աշխատողները սեփական բիզնես ունենալու իրավունք չպետք է ունենան: Կառավարության կազմը պետք է կրճատվի, իսկ նախարարությունների աշխատողների թվաքանակը պետք է խիստ կրճատվի, բյուջեից գումարները պետք է տրամադրվեն այն հարցերին, որոնք ավելի էական են: Սրանք այն հիմնական թեզերն են, որոնք ներկայացրել եմ իմ առաջարկությունների ձեռնարկում:  Բացի վերոնշյալից՝ իմ առաջարկություններում անդրադարձել եմ նաև մի շարք այլ խնդիրների»,- նկատեց ԵՊՀ դասախոսը:  

 

Ըստ Մերուժան Հարությունյանի՝ ժամանակավոր կառավարություն կազմելուց հետո առաջին հերթին պետք է  կազմվի նոր սահմանադրության այն հիմնական ուրվագիծը, ինչի հիման վրա էլ կկառուցվի նոր հասարակարգը:

 

«Ժողովուրդը պետք է իմանա, որ արվելիք փոփոխությունները պետք է անպայման օրինական հիմքեր ունենան, որոնք շրջելի չլինեն: Այդ ամենից հետո  նոր պետք է մի երկու ամսում կազմվի նոր սահմանադրությունը, իսկ հետո անհրաժեշտ է, որ այս սահմանադրությունը մեկ-երկու ամիս բացատրվի ժողովրդին, որպեսզի ժողովուրդը համոզվի, որ սա հենց իր ուզած հասարակական կարգն է»,- հավելեց Մ. Հարությունյանը:

 

Մերուժան Հարությունյանի համոզմամբ, առանց նոր սահմանադրության, օրենսդրական ցանկացած փոփոխություն կլինի կամ ոչ էական, կամ ոչ լեգիտիմ:

 

«Իմ կողմից առաջարկվող ուրվագծի դրույթները հիմնված են բարոյականության հիմնական նորմերի վրա, սրա համար էլ այս սահմանադրությունն անվանում եմ բարոյական սահմանադրություն, իսկ սրա հաստատած հասարակական կարգն էլ կոչում եմ բարոյակարգ: Իմ կողմից առաջարկվող սահմանադրության ուրվագծին համապատասխան սահմանադրություն չկա աշխարհի ոչ մի երկրում, այսինքն՝ աշխարհի ոչ մի երկրում էլ լիիրավ բարոյակարգ չկա: Կան բարոյակարգին քիչ թե շատ մոտ կարգեր միայն: Սա կնշանակի, որ Հայաստանի վիճակը եզակի է, որովհետև Հայաստանը կլինի մեր քաղաքակրթության պատմության մեջ առաջին երկիրը, որ ի վերջո կընդունի մի լիովին ժողովրդավարական սահմանադրություն»,- ասաց Մերուժան Հարությունյանը:

 

Մ. Հարությունյանը հայտնեց, որ նախատեսում է հանրային քննարկումից հետո իր առաջարկությունների ձեռնարկը ներկայացնել ՀՀ վարչապետին:

 

Նադեժդա Տեր-Աբրահամյան

 

Այլ նորություններ
ՀԱՄԱԼՍԱՐԱՆԱԿԱՆՆԵՐՆ ԱՅՑԵԼԵԼ ԵՆ ԱԶԳԱՅԻՆ ՀԵՐՈՍ ԹԱԹՈՒԼ ԿՐՊԵՅԱՆԻ ՀԱՅՐԵՆԻ ԳՅՈՒՂ
«Դասը վարում են համալսարանականները» ծրագրի շրջանակում ԵՊՀ մինչհամալսարանական կրթության վարչությունը կազմակերպել էր այցելություն Արագածոտնի մարզի Թաթուլ գյուղի միջնակարգ դպրոց, ինչպես նաև Հայաստանի Ազգային հերոս, ԵՊՀ զոհված ուսանող-ազատամարտիկ Թաթուլ Կրպեյանի տուն-թանգարան:
ԵՊՀ-ՈՒՄ ՆՇՎԵՑ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏԻ 50-ԱՄՅԱԿԸ
ԵՊՀ արևելագիտության ֆակուլտետը նշում է հիմնադրման 50-ամյակը, ինչի առթիվ նոյեմբերի 9-10-ը կազմակերպում է Հայկական արևելագիտական առաջին միջազգային կոնգրեսը (ACOS’18):