25.09.2018 | 
Հասարակություն
«ԻՆՉՊԵ՞Ս ԳՐԵԼ ԳԻՏԱԿԱՆ ՀՈԴՎԱԾ». ՊԱՏԱՍԽԱՆՈՒՄ Է ՆԱՐԵԿ ԳԱԼՍՏՅԱՆԸ
«ԻՆՉՊԵ՞Ս ԳՐԵԼ ԳԻՏԱԿԱՆ ՀՈԴՎԱԾ». ՊԱՏԱՍԽԱՆՈՒՄ Է ՆԱՐԵԿ ԳԱԼՍՏՅԱՆԸ
Այսօր ԵՊՀ միջազգային հարաբերությունների ֆակուլտետի ՈՒԳԸ-ն կազմակերպել էր «Ինչպե՞ս գրել գիտական հոդված» խորագրով սեմինար, որի բանախոսն էր Քաղաքական ինստիտուտների և գործընթացների ամբիոնի դոցենտ, քաղ. գիտ. թեկնածու Նարեկ Գալստյանը:

Սեմինարի ընթացքում Նարեկ Գալստյանն ուսանողներին ներկայացրեց, թե ինչ է գիտական հոդվածը, որոնք են դրա տեսակները,  ինչ կառուցվածքային մասերից է բաղկացած այն, ինչպես նաև հոդվածի գիտականության պահանջները, նախապատրաստական քայլերը և ստուգիչ հարցերը:

 

Մեզ հետ զրույցում Միջազգային հարաբերությունների ֆակուլտետի ՈՒԳԸ նախագահ Մելինե Պետրոսյանն ասաց, որ սեմինարը կազմակերպվել է հատկապես այն ուսանողների համար, որոնք պատրաստվում են գիտական գործունեություն ծավալել. «Հուսով եմ, որ այսօրվա դասընթացը կօգնի յուրացնել գիտահետազոտական աշխատանք կատարելու հմտությունները»:

 

Խոսելով գիտական հոդվածի սահմանման մասին՝ Նարեկ Գալստյանն ասաց, որ այն հրապարակախոսության տեսակ է, որը ենթադրում է որևէ նեղ թեմայով իրականացված գիտական փոքրածավալ հետազոտություն և դրա արդյունքների համառոտ շարադրանք. «Գիտական հոդվածը գիտական մեթոդի կիրառմամբ գիտական որևէ կոնկրետ խնդրի գիտական ավարտուն հետազոտություն է»:

 

Նարեկ Գալստյանն ուսանողներին ասաց, որ գիտական հոդվածը պետք է ունենա հստակ կառուցվածք, այն պետք է լինի ինքնուրույն վերլուծություն, դրա արդյունքները պետք է պարունակեն նորություն, լինեն ստուգելի և կիրառելի հետագա ուսումնասիրությունների համար:

 

«Գիտական հոդվածը պետք է շարադրված լինի գիտական բառապաշարով, մտքերը և պնդումները պետք է լինեն փաստարկված և հիմնավորված: Հոդվածի տեխնիկական ձևավորումը պետք է լինի անթերի և ակնահաճո, ինչպես նաև պետք է պարունակի օգտագործված աղբյուրների ճշգրիտ հղումներ և ցանկ»,- փաստեց Նարեկ Գալստյանը:

 

Անդրադառնալով հոդվածը նախապատրաստելու քայլերին՝ բանախոսը ասաց, որ նախևառաջ պետք է ծանոթանալ ամսագրի, ժողովածուի պահանջներին, սահմանել հոդվածը նախապատրաստելու ժամանակացույց, հստակեցնել թեման, նպատակը և խնդիրները, կազմել հոդվածի նախնական կառուցվածքը, այնուհետև համալրել, զտել և դասակարգել քննարկվող խնդիրների համար անհրաժեշտ գրականությունը, ընթերցել և մշակել հավաքած գրականությունը, ապա սկսել շարադրել հոդվածը:

 

Նարեկ Գալստյանը սեմինարի ընթացքում մանրամասնորեն անդրադարձավ նաև գիտական հոդվածի կառուցվածքին և պատասխանեց ուսանողների հարցերին:

Քնար Միսակյան

 

Այլ նորություններ
ԼՐԱԳՐՈՂ ԱՐՏՅՈՄ ԵՐԿԱՆՅԱՆՆ ՈՒՍԱՆՈՂՆԵՐԻՆ ՊԱՏՄԵԼ Է ՄԱՍՆԱԳԻՏԱԿԱՆ ԳԱՂՏՆԻՔՆԵՐԻ ՄԱՍԻՆ
ԵՊՀ ժուռնալիստիկայի ֆակուլտետի հեռուստաստուդիայում այսօր տեղի ունեցավ հանդիպում լրագրող, հաղորդավար Արտյոմ Երկանյանի հետ:
«ՀԱՋՈՂՈՒԹՅԱՆ ՊԱՏՄՈՒԹՅՈՒՆՆԵՐ». ՈՒՍԱՆՈՂՆԵՐԻ ՀՅՈՒՐԸ ԱՐԱ ԳԱԲՈՒԶՅԱՆՆ ԷՐ
ԵՊՀ իրավագիտության ֆակուլտետի ՈՒԳԸ-ի կողմից կազմակերպվող «Հաջողության պատմություններ» հանդիպումների շարքի շրջանակում այսօր ուսանողների հարցերին պատասխանեց Քրեական իրավունքի ամբիոնի վարիչ, իրավ. գիտ. դոկտոր, պրոֆեսոր Արա Գաբուզյանը: