12.03.2019 | 
Հասարակություն
ԿՐԹԱԹՈՇԱԿՆԵՐ ԵՊՀ ՈՒՍԱՆՈՂՆԵՐԻՆ՝ «ՀԱՅ ԿՐԹԱԿԱՆ ՀԻՄՆԱՐԿՈՒԹՅԱՆ» ԿՈՂՄԻՑ
ԿՐԹԱԹՈՇԱԿՆԵՐ ԵՊՀ ՈՒՍԱՆՈՂՆԵՐԻՆ՝ «ՀԱՅ ԿՐԹԱԿԱՆ ՀԻՄՆԱՐԿՈՒԹՅԱՆ» ԿՈՂՄԻՑ
ԵՊՀ Պալեանների անվան դահլիճում այսօր անցկացվեց տեղեկատվական հանդիպում կրթաթոշակային ծրագրերի վերաբերյալ։

Միջոցառումը կազմակերպել էր ԵՊՀ ուսանողական խորհուրդը:

«Հայ կրթական հիմնարկության» ծրագրերի համակարգող Տաթևիկ Մուրադյանը հանդիպման սկզբում ողջունեց ներկաներին ու կարճ ներկայացրեց հիմնարկության գործունեությունը: Նա ասաց, որ բացի կրթաթոշակների տրամադրումից՝ «Հայ կրթական հիմնարկություն»-ը զբաղվում է դպրոցաշինությամբ, իսկ Հայաստանում, Արցախում ու Ջավախքում հիմնարկության ջանքերով արդեն իսկ վերանորոգվել ու հիմնանորոգվել է ավելի քան 200 դպրոց:

Խոսելով կրթաթոշակի մասին՝ նա նշեց, որ այն հիմնականում տրամադրվում է ուսման վարձի չափով, եթե վերջինս չի գերազանցում 600 հազար դրամը:
«Հայ կրթական հիմնարկության» ծրագրերին այս տարի կարող են դիմել Երևանի պետական համալսարանի քիմիայի, ֆիզիկայի, տնտեսագիտության (բացառությամբ՝ կառավարում), մաթեմատիկայի և մեխանիկայի (այս բաժնի դիմումների ՄՈԳ-ը ընդունվում է 12-ից), կենսաբանության, աշխարհագրության և երկրաբանության (բացառությամբ սերվիսի), ինֆորմատիկայի և կիրառական մաթեմատիկայի, ռադիոֆիզիկայի ֆակուլտետների, ինչպես նաև ԵՊՀ իրանագիտության, թյուրքագիտության, արվեստաբանության բաժինների (Հայ արվեստի պատմության և տեսության ամբիոն) ուսանողները:



«Պետք չէ հուսահատվել, եթե ձեր ֆակուլտետը կրթաթոշակային այս տարվա ծրագրում ընդգրկված չէ, քանի որ ֆակուլտետների ցանկն ամեն տարի թարմացվում է ԱՄՆ-ի մեր գրասենյակի կողմից»,- ասաց Տաթևիկ Մուրադյանը:

Նա մանրամասն ներկայացրեց կրթաթոշակի համար դիմելու կարգը, այն փաստաթղթերը, որոնք անհրաժեշտ են, ինչպես նաև կրթաթոշակ ստանալու դեպքում ուսանողի պարտականությունները: Ուսանողները ստացան «Հայ կրթական հիմնարկության» կայքէջի հասցեն, որտեղ առկա է կրթաթոշակային ծրագրին դիմելու հայտադիմումի օրինակը:

«Մրցույթին կարող են մասնակցել ՀՀ պետական բուհերի վճարովի համակարգում 2019 թ. սեպտեմբերից 2-րդ կուրսում սովորող (դիմելու պահին 1-ին կուրսում սովորող) և բարձր կուրսերի ուսանողներ (այդ թվում՝ և՛ մագիստրանտներ, և՛ ասպիրանտներ),- ասաց Տաթևիկ Մուրադյանը և ավելացրեց,- կրթաթոշակ ստանալու դեպքում ուսանողը պարտավորվում է սովորել բարձր առաջադիմությամբ, մասնակցել կրթաթոշակ ստացած ուսանողների հանդիպումներին, ինչպես նաև տարեկան առնվազն 120 ժամ կամավորական աշխատանքներ իրականացնել որևէ հաստատությունում»:

 

Մարինա Առաքելյան

Այլ նորություններ
ԵՊՀ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏԻ ԵՐԵՔ ՈՒՍԱՆՈՂՆԵՐԸ՝ «ԼՐԱԳՐՈՂԱԿԱՆ ՄԵՆԱՄԱՐՏ» ՀԵՌՈՒՍՏԱՆԱԽԱԳԾԻ ՄԱՍՆԱԿԻՑՆԵՐ
ԵՊՀ ժուռնալիստիկայի ֆակուլտետի երեք ուսանողներ՝ Աննա Կոստանյանը, Էլեն Աղաջանյանը (4-րդ կուրս) և Ռիմա Գրիգորյանը (2-րդ կուրս), մասնակցել են Եվրոպական միության կողմից համաֆինանսավորվող «Տեղեկատվության մատչելիություն և հետաքննական լրագրություն առավել իրազեկված քաղաքացիների համար» ծրագրի շրջանակում իրականացվող «Լրագրողական մենամարտ» հեռուստանախագծին և հասել մինչև եզրափակիչ:
ՔՆՆԱՐԿՈՒՄ՝ ԲԱՐՁՐԱԳՈՒՅՆ ԿՐԹՈՒԹՅԱՆ ՀԻՄՆԱԽՆԴԻՐՆԵՐԻ, ՄԱՐՏԱՀՐԱՎԵՐՆԵՐԻ ԵՎ ԴՐԱՆՑ ՀՆԱՐԱՎՈՐ ԼՈՒԾՈՒՄՆԵՐԻ ՎԵՐԱԲԵՐՅԱԼ
ԵՊՀ Չարենցի անվան դահլիճում «Մեդիա կենտրոն»-ի նախաձեռնությամբ անցկացվեց «Բարձրագույն կրթության հիմնախնդիրները, առկա մարտահրավերներն ու դրանց հնարավոր լուծումները բարձրագույն կրթության զարգացման ռազմավարությունում» թեմայով քննարկում: