Այսօր ԵՊՀ-ում տեղի ունեցավ ԵՊՀ շրջանավարտների և կարիերայի կենտրոնի ու «Ինգո Արմենիա» ԱՓԲԸ-ի համագործակցության շրջանակում կազմակերպված հանդիպում: Այն վարեցին «Ինգո Արմենիա» ընկերության ներկայացուցիչներ Ռուբեն Հակոբյանն ու Վահան Օհանջանյանը:  

Շրջանավարտների և կարիերայի կենտրոնի տնօրեն Լիլիթ Հակոբյանն ողջույնի իր խոսքում ուրախությամբ արձանագրեց, որ համալսարանականները ուսման ընթացքում արդեն իսկ մտածում են, թե ինչով են հետագայում զբաղվելու և ինչ ապագա են կառուցելու:          

Հանդիպման ընթացքում «Ինգո Արմենիա» ապահովագրական ընկերության ներկայացուցիչները խոսեցին ապահովագրական շուկայի, գործակալի մասնագիտության հիմնական գործառույթների և եկամուտների մասին: Ներկայացվեց փոքրիկ պատմական ակնարկ ընկերության մասին, ինչպես նաև տարատեսակ ապահովագրությանն առնչվող հետաքրքիր փաստեր:            

«Մենք միշտ նկատում ենք, որ ԵՊՀ-ում հավաքվում են երիտասարդներ, ովքեր ավելի առողջ են դատում, մտածում: Ուսանող լինելով հանդերձ փորձում են վաստակել հավելյալ գումարներ: Սա ուրախությամբ եմ նշում: Այս ծրագրին մասնակցելով՝  գործակալի մասնագիտական հմտություններին ծանոթանալուց, հետագայում կայուն աշխատանք ձեռք բերելուց զատ՝ երիտասարդները ձեռք կբերեն նաև հատկանիշներ, որոնք կօգնենք նրանց կյանքի տարբեր ոլորտներում»,- նշեց Վահան Օհանջանյանը: 

Նշենք, որ համալսարանականները կարող են մասնակցել ապահովագրական ընկերության կողմից կազմակերպված ծրագրին, որի ընթացքում, ԱՊՊԱ համակարգի և ապահովագրության հիմունքների վերաբերյալ խորացված գիտելիքներ ստանալուց զատ, կտիրապետեն բանակցությունների, հանրային ելույթների և հաճախորդի կարիքները բացահայտելու հմտություններին: Դասընթացի մասնակիցները կշարունակեն աշխատանքը «Ինգո Արմենիա» ապահովագրական ընկերությունում որպես գործակալ: