02.10.2019 | 
Կրթություն
«ԷՔՍՏՐԵՄՈՖԻԼՆԵՐԻ ՈՒՍՈՒՄՆԱՍԻՐՈՒԹՅԱՆ ԵՎ ԿԵՆՍԱՏԵԽՆՈԼՈԳԻԱՅԻ ՆՈՐ ՆՎԱՃՈՒՄՆԵՐԸ». ԵՊՀ ՊԱՏՎԻՐԱԿՈՒԹՅՈՒՆԸ ԹԲԻԼԻՍԻՈՒՄ ՄԱՍՆԱԿՑԵԼ Է ՄԻՋԱԶԳԱՅԻՆ ԳԻՏԱԺՈՂՈՎԻՆ
«ԷՔՍՏՐԵՄՈՖԻԼՆԵՐԻ ՈՒՍՈՒՄՆԱՍԻՐՈՒԹՅԱՆ ԵՎ ԿԵՆՍԱՏԵԽՆՈԼՈԳԻԱՅԻ ՆՈՐ ՆՎԱՃՈՒՄՆԵՐԸ». ԵՊՀ ՊԱՏՎԻՐԱԿՈՒԹՅՈՒՆԸ ԹԲԻԼԻՍԻՈՒՄ ՄԱՍՆԱԿՑԵԼ Է ՄԻՋԱԶԳԱՅԻՆ ԳԻՏԱԺՈՂՈՎԻՆ
ԵՊՀ կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի դասախոսների, ասպիրանտների և մագիստրատուրայի ուսանողների մի խումբ Թբիլիսիում մասնակցել է «Էքստրեմոֆիլների ուսումնասիրության և կենսատեխնոլոգիայի նոր նվաճումները» խորագրով գիտաժողովին:

Գ. Էլիավայի անվան բակտերաֆագերի, մանրէաբանության և վիրուսաբանության ինստիտուտում սեպտեմբերի 24-28-ը տեղի ունեցած միջազգային գիտաժողովը կազմակերպվել էր Բարձրագույն կրթության բնագավառում միջազգային համագործակցության նորվեգական կենտրոնի կողմից տրամադրվող «Ընդհանուր և կիրառական մանրէաբանության բնագավառում գիտահեն բարձրագույն կրթության կատարելագործման եվրասիական ցանց» դրամաշնորհային ծրագրի շրջանակում:

 

Գիտաժողովի նպատակն էր ուսանողներին ծանոթացնել էքստրեմոֆիլ մանրէների կենսաբանությանն ու կենսատեխնոլոգիայում դրանց կիրառմանն առնչվող արդի հիմնախնդիրներին: 

 

ԵՊՀ կենսաքիմիայի, մանրէաբանության և կենսատեխնոլոգիայի ամբիոնի դոցենտ, դրամաշնորհային ծրագրի համակարգող Հովիկ Փանոսյանը, որը միջազգային գիտաժողովի կազմակերպիչներից էր, մեզ հետ զրույցում ասաց, որ այն կազմակերպվել էր նորվեգական և վրացական գործընկերների հետ համատեղ: 





Միջազգային գիտաժողովին մասնակցել են Նորվեգիայի, ԱՄՆ-ի, Ֆրանսիայի, Գերմանիայի, Չինաստանի, Բուլղարիայի, Վրաստանի, Ուզբեկստանի, Ղրղզստանի և Տաջիկստանի տարբեր բուհերի ուսանողներ և դասախոսներ:

 

 

«Էքստրեմոֆիլների ուսումնասիրության և կենսատեխնոլոգիայի նոր նվաճումները» խորագրով գիտաժողովին պլենար զեկուցումներով հանդես են եկել Հովիկ Փանոսյանը և ԵՊՀ կենսաքիմիայի, մանրէաբանության և կենսատեխնոլոգիայի ամբիոնի ասիստենտ Արմինե Մարգարյանը: 

 

Հովիկ Փանոսյանն ասաց, որ գիտաժողովին ակտիվ մասնակցություն են ցուցաբերել և բանավոր զեկուցմամբ ելույթ ունեցել ԵՊՀ կենսաբանության ֆակուլտետի մագիստրոսներ և հեռակա ուսուցման ասպիրանտներ Անի Սաղաթելյանը, Ռազմիկ Սարգսյանը, Իրինա Այվազյանը և Հեղինե Պողոսյանը, որոնք գիտահետազոտական աշխատանքներ են կատարել դրամաշնորհային ծրագրի շրջանակում, իսկ մագիստրատուրայի առաջին կուրսի ուսանողուհի Դիանա Ղևոնդյանը և երկրորդ կուրսի ուսանող Ռազմիկ Պապիկյանը ներկայացրել են իրենց գիտական հետազոտությունների արդյունքները ստենդային զեկուցմամբ: 


 

«Գիտաժողովի ընթացքում մասնակիցները հնարավորություն ունեցան իրենց գիտական հետազոտության արդյունքները ներկայացնելու և քննարկելու մանրէաբանության և կենսատեխնոլոգիայի բնագավառում միջազգային ճանաչում ունեցող գիտնականների հետ, խորհուրդներ ստացան հետազոտական աշխատանքն արդյունավետ կազմակերպելու համար»,- ասաց Հովիկ Փանոսյանը: 

 

 

Պատրաստեց Քնար Միսակյանը

Այլ նորություններ
ՄԱՍՆԱԳԻՏԱԿԱՆ ԳԻՏԵԼԻՔՆԵՐ ԵՎ ՓՈՐՁԻ ՓՈԽԱՆԱԿՈՒՄ ԵՊՀ ՖԱՐՄԱՑԻԱՅԻ ԻՆՍՏԻՏՈՒՏՈՒՄ
ԵՊՀ ֆարմացիայի ինստիտուտում այսօր «ԷՖ ԷՄ ԴԻ ՔԵՅ ԷԼ ԵՎՐՈՊԱ» (FMD K&L Europe) ՍՊԸ-ի ներկայացուցիչները հանդես են եկել մասնագիտական դասընթացով:
ԿՐԹԱԿԱՆ ՆՈՐ ԾՐԱԳԻՐ, ՈՐԸ ՆՊԱՍՏԵԼՈՒ Է ԼՐԱԳՐՈՂՆԵՐԻ ԻՐԱՎԱԿԱՆ ԳՐԱԳԻՏՈՒԹՅԱՆ ԲԱՐՁՐԱՑՄԱՆԸ
ԵՊՀ իրավագիտության ֆակուլտետի նախաձեռնությամբ և «Կոնրադ Ադենաուեր» գերմանական քաղաքական հիմնադրամի աջակցությամբ մեկնարկել է «Մեդիա իրավունք» կրթական ծրագիրը, որի նպատակն է նպաստել լրագրողների իրավական գրագիտության բարձրացմանը, այդ թվում՝ լրագրողների, իրավաբանների համար «Մեդիա իրավունք» մագիստրոսական կրթական ծրագրի միջոցով: