20.07.2020 | 
Կրթություն, Հասարակություն
ԵՊՀ «ԱՐՎԵՍՏԱԲԱՆՈՒԹՅՈՒՆ» ԿՐԹԱԿԱՆ ԾՐԱԳՐԻ ՈՒՍԱՆՈՂՆԵՐՆ ԱՌՑԱՆՑ ՊՐԱԿՏԻԿԱ ԵՆ ԱՆՑՆՈՒՄ ՌՈՒՍԱԿԱՆ ԱՐՎԵՍՏԻ ԹԱՆԳԱՐԱՆՈՒՄ
ԵՊՀ «ԱՐՎԵՍՏԱԲԱՆՈՒԹՅՈՒՆ» ԿՐԹԱԿԱՆ ԾՐԱԳՐԻ ՈՒՍԱՆՈՂՆԵՐՆ ԱՌՑԱՆՑ ՊՐԱԿՏԻԿԱ ԵՆ ԱՆՑՆՈՒՄ ՌՈՒՍԱԿԱՆ ԱՐՎԵՍՏԻ ԹԱՆԳԱՐԱՆՈՒՄ
Երևանի պետական համալսարանի պատմության ֆակուլտետի «Արվեստաբանություն» կրթական ծրագրի և Ռուսական արվեստի թանգարանի համագործակցության արդյունքում ԵՊՀ ուսանողները երեք տարի անընդմեջ մասնակցում են «Թանգարանային մենեջմենթ և թանգարանագիտություն» պրակտիկային: Պրակտիկայի և գրանցած արդյունքների մասին զրուցել ենք թանգարանի տնօրեն Մարինե Մկրտչյանի հետ:

Պատմության ֆակուլտետում արվեստաբանություն ուսումնասիրող երրորդ կուրսի ուսանողներն այս տարի ևս մասնակցում են Ռուսական արվեստի թանգարանի «Թանգարանագիտության հիմունքներ» ծրագրին և յուրացնում գործնական հմտություններ:

Թանգարանի տնօրեն Մարինե Մկրտչյանն ասաց, որ արտակարգ դրությամբ պայմանավորված՝ դասերն անցկացվում են առցանց, որը սակայն չի խանգարում գործնական առաջադրանքներ կատարելուն. «Օրինակ՝ այս տարի պրակտիկայի վերջում ուսանողների առաջին խմբին հանձնարարված է ստեղծել և ներկայացնել ռազմավարական, իսկ երկրորդ խմբին՝ կրթական ծրագիր թանգարանի համար»:



Նա նաև ավելացրեց, որ ՀՀ-ում հայտարարված արտակարգ դրությունից հետո իրենք պատրաստ են բացել թանգարանի դռները պրակտիկա անցած ուսանողների առջև ու տեղում ծանոթացնել բոլոր նմուշներին, ինչպես նաև թանգարանի գործառույթներին:

Թանգարանի տնօրենը նշեց, որ այս ծրագիրը գրանցում է դրական արդյունքներ. «Անցած տարի պրակտիկայի ընթացքում ԵՊՀ-ի ուսանողները պատրաստեցին դպրոցականների համար հատուկ կրթական ծրագիր, որն իրագործեցինք և դարձավ թանգարանի վճարովի ծառայություններից մեկը»:

«Բացի դրանից՝ պրակտիկայի ընթացքում ընտրվեցին երկու լավագույն ուսանող, որոնք այժմ աշխատում են թանգարանում»,- ասաց Մ. Մկրտչյանը:

Թանգարանի տնօրենը նաև հավելեց, որ այս կրթական ծրագրի ուսանողները շատ պատրաստակամ են, աշխատասեր, բավականին ակտիվ են ու ամենայն պատասխանատվությամբ կատարում են իրենց հանձնարարված աշխատանքները:



Նշենք, որ այս տարի ԵՊՀ պատմության ֆակուլտետի ուսանողների համար Ռուսական արվեստի թանգարանում պրակտիկան վարում է թանգարանի տնօրեն Մարինե Մկրտչյանը, իսկ կրթական ծրագրերը վարում են Կրթական ծրագրերի պատասխանատու Անի Աշուղ-Ղարիբյանը և Հանրային կապերի բաժնի վարիչ Օվսաննա Հարությունյանը:

Պատմության ֆակուլտետի «Արվեստաբանություն» կրթական ծրագրի երրորդ կուրսի ուսանող Արեն Խարազյանը մեզ հետ զրույցում պատմեց, որ, չնայած ստեղծված իրադրությանը, որը դժվարություններ է առաջ բերում, պրակտիկան բավականին արդյունավետ է ընթանում: Նրա հավաստմամբ, դասերը կազմակերպվում են շատ բովանդակալից, ձայնագրվում են և հասանելի դառնում ուսումնական գործընթացից ինչ-ինչ պատճառներով բացակայողների համար․ «Այս ընթացքում ծանոթանում ենք թանգարանների գործունեությանն ու գործառույթներին, առաջադրանքների շնորհիվ նոր տեղեկություններ հավաքագրում այլ թանգարանների մասին ու միասին յուրացնում դրանք»:

Արենը նաև նշեց, որ արտակարգ դրության ավարտից հետո իրենք դասախոսի ուղեկցությամբ կայցելեն Ռուսական արվեստի թանգարան՝ ստացած տեսական գիտելիքները գործնականում ամրապնդելու համար:

Իսկ ԵՊՀ պատմության ֆակուլտետի «Պատմություն», «Մշակութաբանություն», «Կովկասագիտություն» կրթական ծրագրերի ուսանողներն իրենց առցանց պրակտիկան անցկացնում են համապատասխանաբար Հայաստանի ազգային արխիվում, ՀՀ ԳԱԱ հնագիտության և ազգագրության ինստիտուտում, «Էրեբունի» պատմահնագիտական արգելոց-թանգարանում, Սարդարապատի հերոսամարտի հուշահամալիրի Հայաստանի ազգագրության և ազգային-ազատագրական պայքարի պետական թանգարանում (ՀԱԱՊՊԹ), Եղիշե Չարենցի անվան գրականության և արվեստի թանգարանում, Մեսրոպ Մաշտոցի անվան հին ձեռագրերի գիտահետազոտական ինստիտուտում, «Կովկասի ինստիտուտ» հիմնադրամում, «Արևելք» ռազմավարական վերլուծական կենտրոնում:

 

Մարինա Առաքելյան

Այլ նորություններ
ԻՍՊԱՆԱՑԻ ԳՐՈՂ, ԵՊՀ ՊԱՏՎԱՎՈՐ ԴՈԿՏՈՐ ԳՈՆՍԱԼՈ ԳՈՒԱՐՉԻ ԲԱՑ ՆԱՄԱԿՆ ԱՀ ՆԱԽԱԳԱՀ ԱՐԱՅԻԿ ՀԱՐՈՒԹՅՈՒՆՅԱՆԻՆ
Ղարաբաղի Հանրապետության նախագահ մեծարգո պարոն Արայիկ Հարությունյանին
ԵՊՀ-Ն ՇԱՐՈՒՆԱԿՈՒՄ Է ՄԱՍՆԱԿՑԵԼ ՀԱՄԱԶԳԱՅԻՆ ԴՐԱՄԱՀԱՎԱՔ-ԱՐՇԱՎԻՆ՝ ՓՈԽԱՆՑԵԼՈՎ ԱՎԵԼԻ ՔԱՆ 55 ՄԼՆ ԴՐԱՄ
ԵՊՀ-ն հատուկ բացված հաշվեհամարին փոխանցել է ևս 30 մլն դրամ, Իջևանի մասնաճյուղը՝ 5.5 մլն դրամ, իսկ աշխատակիցները՝ ավելի քան 20 մլն դրամ։