07.03.2018 | 
Հասարակություն
ՈՉ ԿԱՆԱՑԻ ՄԱՍՆԱԳԻՏՈՒԹՅՈՒՆՈՒՄ ԿԱՆԱՑԻ ՀՄԱՅՔ. ՀԱՍՄԻԿ ԹԵԼՈՒՆՑ
ՈՉ ԿԱՆԱՑԻ ՄԱՍՆԱԳԻՏՈՒԹՅՈՒՆՈՒՄ ԿԱՆԱՑԻ ՀՄԱՅՔ. ՀԱՍՄԻԿ ԹԵԼՈՒՆՑ
Դարեր շարունակ ընտանեկան դաստիարակության խնդիրը կնոջ ուսերին է եղել: Կինը եղել է տան ներսի պատը՝ ընտանիքում ունենալով ավելի մեծ հեղինակություն, քան տղամարդը: Հետագայում կնոջ դերն ու նշանակությունը էական փոփոխությունների ենթարկվեց, վերանայվեց և վերաիմաստավորվեց նրա գործառույթներն ինչպես ընտանիքում, այնպես էլ՝ հասարակաքաղաքական կյանքում:

Կանանց միջազգային տոնին ընդառաջ լրագրող Վարդուհի Զաքարյանը զրուցել է ԵՊՀ անվտանգության համար պատասխանատու «Ալֆա Դելտա» անվտանգության ծառայության աշխատակցուհի Հասմիկ Թելունցի հետ, ով բարեհամբույր ու ժպիտով ողջունում և համբերատար պատասխանում է բոլոր ելումուտ անողների հարցերին:

 

- Տիկի՛ն Թելունց, ի՞նչ մասնագիտություն ունեք:

 

- Ծնվել եմ Իջևանում և միջնակարգ կրթությունս ստացել եմ տեղի դպրոցում՝ միաժամանակ հաճախելով նաև երաժշտական դպրոցը:  Այնուհետև ավարտել եմ Գավառի երաժշտական ուսումնարանը, որտեղ էլ երկար տարիներ աշխատել եմ՝ որպես մանկավարժ և երգչախմբի խմբավար: Ամուսնանալուց հետո բավականին երկար ժամանակ չեմ աշխատել՝ դաստիարակել եմ երեխաներիս, ովքեր այժմ հասուն ու կայացած երիտասարդներ են: Կնոջ կյանքում, անկասկած, կարևորն ընտանիքն է, սակայն դա չի խանգարում կայանալ նաև այլ բնագավառներում:  

 

- Ինչպե՞ս եք սկսել ծառայությունն անվտանգության ոլորտում:

 

- Շատերը պնդում են (ես էլ կհամաձայնվեմ), որ բնավորության բավականին կայուն ու սկզբունքային գծեր ունեմ: Պատասխանատվության մեծ զգացում ունեմ ամեն  ինչի նկատմամբ, իսկ աշխատանքում կազմակերպված եմ և միշտ զգոն: Ամուսնուս ու երեխաներիս աջակցությամբ՝ որոշեցի ուժերս փորձել հենց այս ոլորտում: Չեմ զղջում ընտրությանս համար, քանի որ աշխատանքն ինձ դուր է գալիս: Ընտանիքիս բոլոր անդամները հատուկ կեցվածքով ողջունում են ինձ ամեն առավոտ, երբ համազգեստը հագիս դուրս եմ գալիս տանից (ծիծաղում է): Թոռնուհիս նույնպես շատ է սիրում համազգեստս: Նշեմ, որ շատ շնորհակալ եմ հարազատներիս՝ մասնավորապես ամուսնուս, ամեն հարցում ինձ հասկանալու ու սատար լինելու համար:

 

- Եղե՞լ են արդյոք լուրջ իրավիճակներ աշխատանքի ընթացքում և ինչպե՞ս եք հարթել դրանք:

 

- Արդեն 3 տարի է, ինչ աշխատում եմ անվտանգության ծառայությունում: Շատ արտառոց իրավիճակներ չեն եղել, սակայն փոքր միջադեպերի հաճախ եմ ականատես լինում: Ուսանողության արական սեռի ներկայացուցիչները բավականին տաքարյուն են և աղմկոտ: Վեճեր և տհաճ իրավիճակներ են եղել և՛ հարակից տարածքում, և՛ նույնիսկ գրադարանի մասնաշենքում, որտեղ էլ հիմնականում իրականացնում եմ ծառայությունս: Պետք է ասեմ, որ անվտանգության հատկապես կին աշխատակցից երիտասարդները շատ են սթափվում: Չի եղել մի դեպք, որ մոտենամ աղմկող երիտասարդների խմբին ու վեճերը չհարթվեն: Իսկ Գրադարանում նույնիսկ բավական է միայն ոտքի կանգնելը: Կարծում եմ՝ մասնագիտական հմտություններս ինձ օգնում են լեզու գտնել բոլորի հետ: Մեր երիտասարդների մեջ պահպանվում է հարգանքը մեծի՝ մանավանդ կնոջ հանդեպ: Ընդհանրապես, կարծում եմ՝ ցանկացած բնագավառում, հատկապես տղամարդկանց հատուկ մասնագիտական ոլորտներում, կանանց առկայությունն անհրաժեշտ է, քանի որ կանայք կարծես իրենց ներկայությամբ սաստում են տղամարդկային՝ երբեմն նույնիսկ անտեղի պոռթկումները: Այսօր կանանց իրավունքները լավ պաշտպանված չեն, չնայած որ սահմանափակումներն էլ շատ չեն, սակայն դեռ կատարելագործվելու երկա՜ր  ուղի ունենք անցնելու:

Այլ նորություններ
ԵՊՀ-ՈՒՄ ՆԵՐԿԱՅԱՑՎԵՑ «ՀԱՅԱՍՏԱՆԻ «ԿԱՆԱՉ» ԱՇԽԱՏԱՇՈՒԿԱՅԻ ԳՆԱՀԱՏՄԱՆ» ՀԱՇՎԵՏՎՈՒԹՅՈՒՆԸ
ԵՊՀ-ում այսօր ծավալվեց քննարկում «Ջի Այ Զեթ» ընկերություն կողմից ներկայացված «Հայաստանի «կանաչ» աշխատաշուկայի» հաշվետվության շուրջ։
ՍՈՑՑԱՆՑԵՐՈՒՄ ԿԵՂԾ ՆՈՐՈՒԹՅՈՒՆՆԵՐԻ ՏԱՐԱԾՈՒՄՆ ՈՒՍՈՒՄՆԱՍԻՐՈՒՄ ԵՆ ՄԱՍԱՉՈՒՍԵԹՍԻ ՏԵԽՆՈԼՈԳԻԱԿԱՆ ԻՆՍՏԻՏՈՒՏՈՒՄ
Մասաչուսեթսի տեխնոլոգիական ինստիտուտի (MIT) հետազոտողները փորձել են հասկանալ կեղծ լուրերի տարածման ծավալները և դրդապատճառները: Ավարտից հետո մարտին հանրայնացվել է նրանց հետազոտությունը: