25.05.2018 | 
Հասարակություն
«ՊԵՏՔ Է ԳՈՐԾԱՏՈՒՆԵՐԻ ՀԵՏ ՍԵՐՏ ԿԱՊԵՐ ՀԱՍՏԱՏԵՆՔ ԵՎ ԿԱՐՈՂԱՆԱՆՔ ՄԵՐ ՈՒՍԱՆՈՂՆԵՐԻ ԱՇԽԱՏԱՇՈՒԿԱՅԻՆ ԱՆՀՐԱԺԵՇՏ ԳԻՏԵԼԻՔՆԵՐՈՎ ԶԻՆԵԼ». ՆԱՐԵԿ ՀԱՐՈՒԹՅՈՒՆՅԱՆ
«ՊԵՏՔ Է ԳՈՐԾԱՏՈՒՆԵՐԻ ՀԵՏ ՍԵՐՏ ԿԱՊԵՐ ՀԱՍՏԱՏԵՆՔ ԵՎ ԿԱՐՈՂԱՆԱՆՔ ՄԵՐ ՈՒՍԱՆՈՂՆԵՐԻ ԱՇԽԱՏԱՇՈՒԿԱՅԻՆ ԱՆՀՐԱԺԵՇՏ ԳԻՏԵԼԻՔՆԵՐՈՎ ԶԻՆԵԼ». ՆԱՐԵԿ ՀԱՐՈՒԹՅՈՒՆՅԱՆ
ԵՊՀ սոցիալ-տնտեսական աշխարհագրության ամբիոնի դոցենտ, աշխարհ. գիտ. թեկնածու Նարեկ Հարությունյանն այս պահին ստանձնել է ամբիոնի վարիչի պաշտոնակատարի պաշտոնը: Մեզ հետ զրույցում պարոն Հարությունյանը ներկայացրել է ծրագրային հիմնական դրույթները, որոնք կիրագործի, եթե հայտարարված մրցույթի արդյունքներով ստանձնի ամբիոնի վարիչի պաշտոնը:

Նարեկ Հարությունյանը փաստեց, որ իր ծրագրային հատկանշական կետը ամբիոնն ուսանողակենտրոն դարձնելն է. «Կարծում եմ, որ ուսանողներն առավել շատ պիտի ընդգրկված լինեն ամբիոնի աշխատանքներում, հատկապես կուրսային կամ ավարտական աշխատանքների թեմաների ձևակերպման, ղեկավարների ընտրության հարցերում»:

 

Ամբիոնի զարգացման համար, ըստ Նարեկ Հարությունյանի, պետք է ստեղծել միջազգային համագործակցությունների լայն շրջանակ. «Մինչ այժմ մեր ամբիոնը լուրջ համագործակցության հիմք չի ստեղծել, բայց դա առաջնահերթ անելիքներից մեկը պիտի լինի, քանի որ այդ համագործակցությունների արդյունքում կարող ենք իրականացնել փորձի փոխանակում և վերապատրաստման դասընթացներ ոչ միայն ուսանողների, այլև երիտասարդ գիտնականների ու դասախոսների շրջանակում: Պետք է նաև մեծացնենք մեր մասնակցությունը դրամաշնորհային ծրագրերին, ընդ որում՝ ոչ միայն դասախոսների, այլև ուսանողների ակտիվ դերեկատարությամբ պիտի իրականացնենք այդ գործընթացը»:

 

Ամբիոնի վարիչի պաշտոնակատարը մեծ կարևորություն է տալիս նաև արտադրական պրակտիկաների և դրանց միտումների փոփոխությանը. «Դրանք բարեփոխելու անհրաժեշտությունը շատ մեծ է: Պետք է գործատուների հետ սերտ կապեր ամրագրենք և կարողանանք մեր ուսանողներին աշխատաշուկային անհրաժեշտ գիտելիքներով զինել: Պետք է կարողանանք ճիշտ վերլուծել և ըստ ոլորտների՝ օգտագործել մեր ներուժը: Մենք ունենք շատ լավ ուսանողներ, որոնք վստահաբար կարող են իրենց գիտելիքները ծառայեցնել ոլորտի հիմնախնդիրների լուծմանը»:

 

Ըստ Նարեկ Հարությունյանի՝ ամբիոնի ներկայիս մտահոգություններից է սերնդափոխության հարցը. «Բոլոր ժամանակներում էլ պետք է ճիշտ ժամանակին լուծել այս հարցը: Ամբիոնում պետք է կարողանանք ներգրավել երիտասարդ կադրերի, որոնք առավել տեղեկացված կլինեն ժամանակակից հիմնահարցերի և մարտահրավերների վերաբերյալ և կկարողանան ճիշտ ուղղորդել ամբիոնի աշխատանքները»:

 

Բացի այդ՝ մեզ հետ զրույցում Նարեկ Հարությունյանն ասաց, որ  հայտարարված մրցույթի արդյունքներով ամբիոնի վարիչի պաշտոնը ստանձնելու դեպքում պատրաստվում է դասախոսներին հորդորել, որ վերջիններս տպագրված տարբերակով ունենան իրենց դասախոսական նյութերը՝ ծրագրին համապատասխան. «Կարծում եմ, որ դա մեծ քայլ կլինի թելադրելու միջոցով անցկացվող դասախոսություններից հրաժարվելու համար, ինչն այսօր արդյունավետ չէ: Դասախոսական նյութերը տպագրված տեսքով ունենալը հնարավորություն կտա ժամանակն ավելի արդյունավետ ծախսելու»:

 

Քնար Միսակյան

 

 

Այլ նորություններ
«ՀԱՅԱԳԻՏՈՒԹՅՈՒՆԸ, ԼԻՆԻ ՀԱՅԱՍՏԱՆՈՒՄ, ԹԵ ԱՐՏԵՐԿՐՈՒՄ, ՊԵՏՔ Է ՇԱՐՈՒՆԱԿ ՆԵՐԿԱՅԱՑՆԻ ՄԵՐ ՀՈԳԵՎՈՐ ՈՒ ՆՅՈՒԹԱԿԱՆ ՄՇԱԿՈՒՅԹԻ ՄԱՐԳԱՐՏԱՀԱՏԻԿՆԵՐԸ». ՀԱՅԱԳԻՏԱԿԱՆ ԾՐԱԳՐԵՐԻ ՄԵԿՆԱՐԿ ԼՈՍ ԱՆՋԵԼԵՍՈՒՄ
Վերջերս Լոս Անջելեսում մեկնարկել են հայագիտական ծրագրերի լայն ուսումնասիրություններ։ ԱՄՆ-ի արևմտյան թեմի առաջնորդարանի հովանու ներքո իրականացվող ծրագրերին մասնակցել է բանասիրական գիտ. թեկնածու, դոցենտ Նորայր Պողոսյանը:
ԵՐԿՐԻ ՄԱԳՆԻՍԱԿԱՆ ԴԱՇՏՆ ԱՆԿԱՆՈՆ ՎԱՐՔ Է ԴՐՍԵՎՈՐՈՒՄ. ՄԱՍՆԱԳԵՏՆԵՐԸ ԴԵՌԵՎՍ ԲԱՑԱՏՐՈՒԹՅՈՒՆ ՉՈՒՆԵՆ
Հյուսիսային մագնիսական բևեռն անկախատեսելիորեն Կանադայից շարժվում է դեպի Սիբիր: Շարժումը ստիպում է փորձագետներին այսօր թարմացնել աշխարհի մագնիսական մոդելը (World Magnetic Model), որն օգնում է գլոբալ նավիգացիային: