26.04.2019 | 
Հասարակություն
ԵՊՀ-ՈՒՄ ԱՄՓՈՓՎԵՑԻՆ «ՔԵՅ-ՓԻ-ԷՄ-ՋԻ»-Ի ՕՐԵՐԸ
ԵՊՀ-ՈՒՄ ԱՄՓՈՓՎԵՑԻՆ «ՔԵՅ-ՓԻ-ԷՄ-ՋԻ»-Ի ՕՐԵՐԸ
ԵՊՀ շրջանավարտների ու կարիերայի կենտրոնն ապրիլի 23-ին, 25-ին ու 26-ին կազմակերպել էր ««Քեյ-Փի-Էմ-Ջի»-ի օրերը ԵՊՀ-ում» խորագրով եռօրյա դասընթաց:
Հովհ. Ադամյանի անվան սրահում այսօր տեղի ունեցավ դասընթացի ամփոփումը:

«Քեյ-Փի-Էմ-Ջի» միջազգային կազմակերպության մարդկային ռեսուրսների բաժնի ավագ մենեջեր Սոնա Մարտիրոսյանը, ամփոփելով եռօրյա դասընթացը, ասաց. «Որտեղ էլ լինեք, ինչ ուղղությամբ էլ գնաք, ինչ գործ էլ անեք, արե՛ք սիրով, նվիրումով, ավելիին ձգտելու կարգախոսով»:

ԵՊՀ շրջանավարտների ու կարիերայի կենտրոնի փոխտնօրեն Կարինե Նազարյանը շնորհակալություն հայտնեց հերթական հաջողված համագործակցության համար:

«Կարիերայի կենտրոնը հնարավորինս փորձում է աջակցել ուսանողներին և շրջանավարտներին իրենց մասնագիտական, ակադեմիական գիտելիքները գործնական ճիշտ ուղով տանելու հարցում»,- ասաց նա:

Մեզ հետ զրույցում Սոնա Մարտիրոսյանը նշեց, որ հանդիպման հիմնական նպատակն ուսանողներին և շրջանավարտներին մասնագիտական գիտելիքներ փոխանցելն է. «Մեզ ուրախացրին մասնակիցների պատրաստակամությունն ու նրանց գիտելիքների բարձր մակարդակը»:



Նա նշեց նաև, որ դասընթացին «Քեյ-Փի-Էմ-Ջի» կազմակերպությունը ներկայացել է նաև որպես գործատու՝ հետագայում դասընթացին մասնակցած ուսանողներին և շրջանավարտներին աշխատանքի հնարավորություն տրամադրելով:

Նշենք, որ եռօրյա դասընթացի շրջանակում մասնակիցները գիտելիքներ և խորհուրդներ են ստացել աուդիտորական աշխատանքների վերանայման և եզրակացության տրամադրման, օրենսդրական կարգավորումների, ինչպես նաև միջազգային հարկման վերաբերյալ:

Ամփոփիչ ելույթներից հետո մասնակիցներին հանձնվեցին դասընթացի մասնակցության հավաստագրեր:

«Քեյ-Փի-Էմ-Ջի» կազմակերպությունը բազմաթիվ գրասենյակներ և մոտ 205 հազար աշխատակից ունի աշխարհի 150-ից ավելի երկրներում: Այն Հայաստանում գործում է 1997 թվականից և առաջինն է «Մեծ քառյակ» կոչվող աուդիտորական ընկերություններից, որոնք Հայաստանում գործունեություն ծավալելու թույլտվություն են ստացել: Կազմակերպության ծառայությունների հիմնական ոլորտներն են՝ աուդիտ, հարկեր և խորհրդատվություն:

 

Մարի Ռաֆյան

Այլ նորություններ
«ԺԱՄԱՆԱԿԻ ՄԵՋ ԳՈՅԻ ԻՄԱՍՏԱՎՈՐՄԱՆ ԴԱՍԵՐԸ…». ԼՈՒՅՍ Է ՏԵՍԵԼ ԳԱԳԻԿ ՀԱՐՈՒԹՅՈՒՆՅԱՆԻ ԺՈՂՈՎԱԾՈՒՆ
ԵՊՀ Պալեանների անվան դահլիճում այսօր տեղի է ունեցել Սահմանադրական ամբիոնի պրոֆեսոր, ՀՀ Սահմանադրական դատարանի նախկին նախագահ, ԲԴԽ նախկին նախագահ Գագիկ Հարությունյանի մենագրության շնորհանդեսը:
ԲՆԱՊԱՀՊԱՆՈՒԹՅԱՆ ԹԵՄԱՅՈՎ ԴԱՍԱԽՈՍՈՒԹՅՈՒՆ ԳՈՒՐԳԵՆ ՄԱՐԳԱՐՅԱՆԻ ԱՆՎԱՆ Հ. 94 ԱՎԱԳ ԴՊՐՈՑՈՒՄ
ԵՊՀ իրավագիտության ֆակուլտետի էկոլոգիական իրավունքի գիտաուսումնական կենտրոնի իրավաբան Օլիմպիա Գեղամյանն այսօր մասնագիտական թեմայով դասախոսություն է կարդացել Երևանի հ. 94 ավագ դպրոցի իրավաբանական հոսքի 11-րդ և 12-րդ դասարանների աշակերտների համար: