11.09.2019 | 
Կրթություն, Հասարակություն
ԼՈՒՅՍ Է ՏԵՍԵԼ «Ի՞ՆՉ ԱՆԵԼ» ԳՐՔԻ 2-ՐԴ ՀԱՏՈՐԸ
ԼՈՒՅՍ Է ՏԵՍԵԼ «Ի՞ՆՉ ԱՆԵԼ» ԳՐՔԻ 2-ՐԴ ՀԱՏՈՐԸ
Լույս է տեսել «Ի՞նչ անել. Հայաստանի տնտեսության զարգացման արդի հիմնախնդիրները և ռազմավարական ուղղությունները» գրքի երկրորդ հատորը։ Այն հայ տնտեսագիտական մտքի ներկայացուցիչների մտորումների ու առաջարկների հավաքագրումն է՝ ՀՀ տնտեսական զարգացման արդի հիմնախնդիրների և ռազմավարական ուղղությունների վերաբերյալ։

Նշենք, որ «Ի՞նչ անել. Հայաստանի տնտեսության զարգացման արդի հիմնախնդիրները և ռազմավարական ուղղությունները» գրքի առաջին հատորը ներկայացվել է 2018 թվականի նոյեմբերի 23-ին ԵՊՀ տնտեսագիտության և կառավարման ֆակուլտետի կողմից կազմակերպված խորհրդաժողովին, որին ներկա էր նաև ՀՀ վարչապետ Նիկոլ Փաշինյանը։

Գրքի մասին ավելի մանրամասն տեղեկություններ ստանալու համար ysu.am-ը զրուցել է ԵՊՀ տնտեսագիտության և կառավարման ֆակուլտետի կառավարման և գործարարության ամբիոնի վարիչ Կառլեն Խաչատրյանի հետ։



- Ե՞րբ և որտե՞ղ է լինելու գրքի շնորհանդեսը։

- Դեռ հստակ չէ, թե երբ կլինի «Ի՞նչ անել» գրքի 2-րդ հատորի շնորհանդեսը, քանի որ, ըստ նախնական պայմանավորվածության, ինչպես առաջին գրքի ժամանակ, շնորհանդեսը կկազմակերպվի համաժողովի ընթացքում, որին կմասնակցի նաև ՀՀ վարչապետը, և նրա զբաղվածությունից է կախված, թե երբ կանցկացվի այն։ Ամենայն հավանականությամբ, սեպտեմբերի վերջին կամ հոկտեմբերի սկզբին։

- Արդյո՞ք երկրորդ գրքի տպագրությունը պայմանավորված էր առաջինի գրանցած հաջողությամբ ու բարձրացրած հետաքրքրության մեծ ալիքով։

- Իրականում, գիրքը նախաձեռնելով՝ ակնկալում էինք, որ այն պետք է շարունակական լինի։ Թերևս, սրանով պետք է պայմանավորել երկրորդի տպագրությունը։ Բայց պակաս կարևոր չէր նաև այն արձագանքը, որն ունեցանք թե՛ ՀՀ կառավարության կողմից, թե՛ գիտական շրջանակում։

- Արդյո՞ք նոր հատորներ ևս տպագրվելու են։

-Այո՛։ Մենք վճռական ենք տրամադրված։ Այն, որ մեր երկրի վարչապետը համաձայնել է ներկա գտնվել երկրորդի շնորհանդեսին և մասնակցել քննարկումներին, վկայում է, որ առաջին համաժողովը հաջողված է եղել, իսկ կառավարությունը դրա կարիքը զգում է։ Սակայն, եթե այս երկու գրքերը համընդհանուր խնդիրների մասին էին, ապա մյուսները վերաբերելու են կոնկրետ ոլորտներին, օրինակ՝ արդյունաբերություն, գյուղատնտեսություն, զբոսաշրջություն և այլն։



Հարցազրույցի վերջում Կառավարման և գործարարության ամբիոնի վարիչը նշեց, որ վարչապետի աշխատակազմի անդամներն արդեն ունեն «Ի՞նչ անել. Հայաստանի տնտեսության զարգացման արդի հիմնախնդիրները և ռազմավարական ուղղությունները» գրքի երկրորդ հատորի օրինակը, որը, ըստ նրա, կնպաստի առաջիկա համաժողովին ավելի իրազեկված ներկայանալուն ու տեղում թեմատիկ քննարկում անցկացնելուն։

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: