29.10.2019 | 
Մշակույթ
ԵՊՀ-ՈՒՄ ՆՇՎԵԼ Է ԿՈՐԵԱՅԻ ՄՇԱԿՈՒՅԹԻ ՕՐԸ
ԵՊՀ-ՈՒՄ ՆՇՎԵԼ Է ԿՈՐԵԱՅԻ ՄՇԱԿՈՒՅԹԻ ՕՐԸ
ԵՊՀ-ի և Հայաստանի կորեական համայնքի համատեղ նախաձեռնությամբ համալսարանում այսօր անցկացվել է «Կորեայի մշակույթի օր» խորագրով փառատոն՝ նպատակ ունենալով հանրության և հատկապես ուսանողների շրջանում տարածելու կորեական մշակույթն ու բարձրացնելու դրա նկատմամբ հետաքրքրությունը:

Տոնական միջոցառման մեկնարկից առաջ ԵՊՀ ռեկտորի ժամանակավոր պաշտոնակատար Գեղամ Գևորգյանն իր աշխատասենյակում ընդունեց Կորեայից ժամանած պատվիրակությանը՝ ի դեմս ՀՀ-ում Կորեայի Հանրապետության նորանշանակ դեսպան (նստավայրը՝ Մոսկվա) Լի Սոկ-Բեի (Lee Sok-bae):

 

Հանդիպմանը, որին ներկա էին նաև ԵՊՀ միջազգային համագործակցության և հասարակայնության հետ կապերի գծով պրոռեկտոր, ԵՊՀ-ում կորեերենի համակարգող Արթուր Իսրայելյանն ու Տեղեկատվական տեխնոլոգիաների կրթական և հետազոտական կենտրոնի գիտական ղեկավար Սամվել Շուքուրյանը, Գեղամ Գևորգյանը փաստեց, որ ԵՊՀ-ն ակտիվորեն համագործակցում է Կորեայի Հանրապետության հետ, հատկապես գիտակրթական ոլորտում:

 

ԵՊՀ-ի պատմությանը և գործունեությանը ծանոթանալու համար ԵՊՀ ռեկտորի ժամանակավոր պաշտոնակատարը դեսպանին և պատվիրակության մյուս անդամներին գրքեր նվիրեց: Նա նշեց, որ ԵՊՀ-ում կորեերենի դասավանդումը և կորեական մշակույթի տարածումն իրականացվել են Արթուր Իսրայելյանի շնորհիվ: Գեղամ Գևորգյանը հույս հայտնեց, որ նրա նոր պաշտոնը կնպաստի համագործակցության ամրապնդմանը, և ասաց՝ պատրաստակամ է աջակցելու համատեղ բոլոր նախաձեռնություններին:

 

 

Լի Սոկ-Բեն, շնորհակալություն հայտնելով ջերմ ընդունելության համար, նշեց, որ բազմիցս եղել է Հայաստանում, ունեցել պաշտոնական շատ հանդիպումներ, բայց այստեղ է, որ խոսում է իր մայրենի լեզվով. «Կորեերենի թարգմանության առկայությունը շատ տպավորիչ է»:

 

Շնորհավորելով ԵՊՀ 100-ամյակի կապակցությամբ՝ դեսպանն ասաց, որ ԵՊՀ-ի մասին շատ է լսել. «Ձեր համալսարանը մեծ հռչակ է վայելում: Գիտեմ, որ ձեր շրջանավարտները մեծ դեր ունեն երկրի զարգացման գործում: Կորեայի կառավարությունն անում է հնարավորինս՝ զարգացնելու երկկողմ հարաբերությունները: Հուսով եմ՝ առաջիկայում երկու երկրների համալսարանների միջև ևս ակտիվ համագործակցություն կհաստատվի»: Լի Սոկ-Բեն տեղեկացրեց, որ դեսպանությունը պատրաստ է աջակցելու այդ գործընթացի կազմակերպմանը:

 

Գեղամ Գևորգյանը նշեց, որ ԵՊՀ-ն պատրաստ է ուրախությամբ համագործակցելու կորեական բուհերի հետ, հատկապես տեղեկատվական տեխնոլոգիաների ոլորտում, և գաղտնիք չէ, որ Կորեան այդ ուղղությամբ այսօր աշխարհում առաջատարներից մեկն է. «ՏՏ-ն շատ կարևոր ոլորտ է Հայաստանում, որի զարգացումը կնպաստի երկրի առաջընթացին»:

 

Արթուր Իսրայելյանը հյուրերին պատմեց, որ ԵՊՀ-ում կորեերենի դասավանդումը սկսվել է 2018 թվականի նոյեմբերի 1-ից. «Այսօր արդեն 60 ուսանող ուսումնասիրում է կորեերենը՝ որպես երկրորդ լեզու»:

 

Պրոռեկտորի փոխանցմամբ, ԵՊՀ-ում կորեերենի կենտրոն-լսարանը տեղակայված է Արևելագիտության ֆակուլտետում. «Լեզուն դասավանդվում է ինչպես Արևելագիտության, այնպես էլ Միջազգային հարաբերությունների ֆակուլտետներում»: Արթուր Իսրայելյանը տեղեկացրեց, որ այս տարի դիմել են «Կորեա հիմնադրամ»-ին՝ աջակցություն ստանալու Կորեայից դասախոսի գործուղմանը դեպի ԵՊՀ, և հույս հայտնեց, որ այդ հարցը ևս դեսպանի ուշադրության կենտրոնում կլինի:

 

Բացի դրանից՝ Արթուր Իսրայելյանը ցանկություն հայտնեց, որ Սեջոնգի ինստիտուտը ԵՊՀ-ում մասնաճյուղ ունենա, քանի որ պլանավորվում է համալսարանում ոչ միայն կորեերենի ուսուցում իրականացնել, այլև զարգացնել կորեագիտությունը: Ի պատասխան՝ դեսպանն ասաց, որ դեսպանությունն ամեն կերպ կաջակցի բոլոր նախաձեռնությունների իրականացման համար:

 

Այսօր տեղի ունեցած հանդիպմանը Կորեայի պատվիրակության կազմում էին նաև «Սամսունգ» կազմակերպության ներկայացուցիչները, որոնք նույնպես հետաքրքրված են Հայաստանում ՏՏ ոլորտի առանձնահատկություններով: Գեղամ Գևորգյանը նշեց, որ կազմակերպության հետ համագործակցությունը շահավետ և պատվաբեր կլինի համատեսարանի համար:

 

ՀՀ-ում Կորեայի Հանրապետության դեսպան Լի Սոկ-Բեն շնորհակալություն հայտնեց ԵՊՀ ղեկավարությանը ոչ միայն այսօրվա միջոցառման կազմակերպմանն աջակցելու, այլև կորեերենի և կորեական մշակույթի տարածմանը նպաստելու համար:

 

 

«Կորեայի մշակույթի օր» խորագրով փառատոնի բացման արարողության ժամանակ Արթուր Իսրայելյանը նշեց, որ համագործակցությունը «Կորեա հիմնադրամի» և Հայաստանի կորեական համայնքի հետ հաստատվել է գրեթե տասը տարի առաջ: Նա փաստեց, որ ԵՊՀ-ում կազմակերպվել են կորեերենի ուսուցմանն ուղղված կրթական և մշակութային բազմաթիվ միջոցառումներ, ու շնորհակալություն հայտնեց Հայաստանի կորեական համայնքի ղեկավարին և ԵՊՀ-ում կորեերենի դասախոս Հասմիկ Ճաղարյանին՝ աջակցության և նվիրվածության համար:

 

Միջոցառմանը ներկա էր նաև ՀՀ ռազմական թաեքվոնդոյի ֆեդերացիայի նախագահ Վրեժ Խաչիկյանը, որի հետ, Արթուր Իսրայելյանի փոխանցմամբ, ձեռք է բերվել համաձայնություն՝ համալսարանում կազմակերպել թաեքվոնդոյի անվճար պարապմունքներ դասախոսների և ուսանողների համար:

 

ՀՀ-ում Կորեայի Հանրապետության դեսպան Լի Սոկ-Բեն, ողջունելով փառատոնի մասնակիցներին, ասաց, որ բոլոր օտար լեզուները բարդ են, և դրանք լավ սովորելու համար պետք է ջանասիրաբար ու տքնաջան աշխատել: Նա հույս հայտնեց, որ ուսանողները լավ կսովորեն կորեերենը և հետագայում իրենց ներդրումը կունենան երկու երկրների արդյունավետ համագործակցության գործընթացին:

 

Միջոցառման ընթացքում կորեերեն ուսումնասիրող ուսանողները, ինչպես նաև Հայաստանի կորեական համայնքի ներկայացուցիչներն ու կորեական մշակույթով հետաքրքրվածները հանդես եկան կորեական ժամանակակից երգերի ու պարերի կատարումներով: Բացի դրանից՝ միջոցառմանը տեղի ունեցավ «Վագրը և ճանապարհորդը» կորեական հայտնի հեքիաթի ներկայացումը:

 

Փառատոնի ավարտին միջոցառման բոլոր մասնակիցներին տրվեցին պատվոգրեր և նվերներ:

 

Քնար Միսակյան

 


Այլ նորություններ
«ՀԻՍՈՒՍ ՔՐԻՍՏՈՍԻ ԿԵՐՊԱՐԸ XX ԴԱՐԻ ԵՎ ԱՐԴԻ ՀԱՅ ԱՐՎԵՍՏՈՒՄ» ԳԻՐՔԸ ՀՈԳԵՎՈՐ ԱՐԺԵՔՆԵՐԻՆ ՄՈՏԵՆԱԼՈՒ ՆՈՐ ՈՒՂԵՆԻՇ
ՀՀ նկարիչների միության մեծ սրահում այսօր տեղի են ունեցել ԵՊՀ հայ արվեստի պատմության և տեսության ամբիոնի դոցենտ, արվեստագիտության թեկնածու Սաթենիկ Վարդանյանի «Հիսուս Քրիստոսի կերպարը XX դարի և արդի հայ արվեստում» գրքի շնորհանդեսը, ինչպես նաև հայ արդի նկարիչների թեմատիկ ստեղծագործությունների ցուցահանդեսը:
ՀԱՅ-ՂԱԶԱԽԱԿԱՆ ՄՇԱԿՈՒԹԱՅԻՆ ՀԱՄԱԳՈՐԾԱԿՑՈՒԹՅԱՆ ՈՒՇԱԳՐԱՎ ՆՈՐ ԷՋ
2020 թ. Ղազախստանում, Հայաստանում և այլ երկրներում մեծ շուքով նշվում է ղազախական նոր գրականության հիմնադիր Աբայ Կունանբաևի 175-ամյակը: