03.11.2009 | 
Կրթություն
ԷԿՈ ԻՐԱՎՈՒՆՔԻ ԿԵՆՏՐՈՆՈՒՄ ԴԱՍԱԽՈՍՈՒԹՅՈՒՆ ԷՐ
ԷԿՈ     ԻՐԱՎՈՒՆՔԻ ԿԵՆՏՐՈՆՈՒՄ ԴԱՍԱԽՈՍՈՒԹՅՈՒՆ ԷՐ
Էկոլոգիական թեմաներով դասախոսություններ ներկայացրին Նորվեգիայի Ֆրիտյոֆ Նանսենի անվան ինստիտուտի առաջատար մասնագետները:

Ստեյնար Անդերսենը, Պոլ Սկեդսմոն եւ Պիտեր Ջոան Շայը առաջին անգամ չեն ԵՊՀ-ում դասախոսություն կարդում: Ստեյնար Անդերսենը, ով ներկայացրեց դասախոսություն միջազգային համաձայնագրերի մասին, ուրախությամբ նշեց, որ ինքը միշտ հաճույքով է վերադառնում Երեւանի պետական համալսարան: Պարոն Անդերսենը ներկաներին գործնական խորհուրդներ տվեց, թե ինչպես անել, որ միջազգային համաձայնագրերը իրականում գործեն եւ ավելի լավը դառնան:

 

«Ինչո՞ւ է մեզ պետք միջազգային համագործակցությունը: Աշխարհը ավելի ու ավելի նեղանում է, եւ չափազանց կարեւոր է, որ տարբեր երկրների մասնագետները կապի մեջ լինեն: Ժամանակին բնապահպանական խնդիրները զուտ տեղային էին, բայց հիմա սահմանները վերացել են, իսկ մտահոգության սահմանները` ընդլայնվել: Հայաստանի ու Նորվեգիայի նման փոքր երկրները ավելի շատ ունեն համագործակցության կարիքը, քան գերտերությունները»,- ասում է Ստեյնար Անդերսենը:

 

Պոլ Սկեդսմոյի դասախոսությունը վերաբերում էր «Էկոլոգիական տեղեկատվության մասին» ակտին եւ Նորվեգիայում Օրհուսի կոնվենցիայի իրականացման պրակտիկային: Հայաստանի Հանրապետությունը Օրհուսի կոնվենցիան վավերացրել է 2001 թ-ին: Այն վերաբերում է շրջակա միջավայրի հարցերի առնչությամբ տեղեկատվության մատչելիությանը, որոշումների ընդունման գործընթացին հասարակության մասնակցությանը եւ արդարադատության մատչելիությանը:

 

ՀՀ բնապահպանության նախարար Արամ Հարությունյանը նշել է, որ Հայաստանում Օրհուսի կոնվենցիայի շնորհիվ ձեւավորվել է արդյունավետ երկխոսության մթնոլորտ քաղաքացիական հասարակության ինստիտուտների եւ պետական մարմինների միջեւ: Իրավագիտության ֆակուլտետի ասպիրանտ Պերճ Խաչատրյանի կարծիքով, քանի որ բնապահպանական տեղեկատվության ազատականացումը նոր երեւույթ է մեզանում, նմանատիպ դասախոսությունները կարեւոր են ու արդիական: «Հրավիրված դասախոսները կներկայացնեն իրենց երկրում կոնվենցիայի կիրառման փորձը, որը մեզ կօգնի կոնվենցիայի եւ դրա հիման վրա հետագայում Հայաստանում ընդունված օրենքների կիրառման բնագավառում»,- կարծում է Պերճ Խաչատրյանը:

 

Դասախոսությանը ներկա մասնակիցները կարեւորեցին նաեւ պետություն-հասարակական կազմակերպություններ համագործակցությունը, ինչպես նաեւ հանրային ուշադրությունն ու պահանջատիրությունը բնապահպանական խնդիրների ու հիմնահարցերի հանդեպ:

Այլ նորություններ
ԵՊՀ-ՈՒՄ ՏԵՂԻ ՈՒՆԵՑԱՎ ECER 2022 ՀԱՄԱԺՈՂՈՎԻ ՇՐՋԱՆԱԿՈՒՄ ԿԱԶՄԱԿԵՐՊՎԱԾ ՄԱՄՈՒԼԻ ԱՍՈՒԼԻՍԸ
Ասուլիսի ժամանակ ներկայացվեցին համաժողովի կազմակերպման ընթացքը, ընտրված թեմայի արդիականությունը, ինչպես նաև ընդգծվեց համաժողովի կարևորությունը ՀՀ կրթական համակարգի զարգացման գործում։ Լրատվամիջոցների ներկայացուցիչներն ասուլիսի ավարտին տվեցին հարցեր՝ կապված համաժողովի, վերջինիս ընձեռած հնարավորությունների և ԵՊՀ-ում իրականացվող նկատելի բարեփոխումների վերաբերյալ։
ՄԱԹԵՄԱՏԻԿԱԿԱՆ ՄԻՋԱԶԳԱՅԻՆ ՈՒՍԱՆՈՂԱԿԱՆ ՕԼԻՄՊԻԱԴԱՅՈՒՄ ԵՊՀ ՀԻՆԳ ՈՒՍԱՆՈՂՆԵՐ ՄԵԴԱԼՆԵՐ ԵՆ ՆՎԱՃԵԼ
Օգոստոսի 1-7-ը հիբրիդային (առկա և առցանց) տարբերակով տեղի է ունեցել Մաթեմատիկական միջազգային ուսանողական 29-րդ օլիմպիադան (International Mathematics Competition), որին մասնակցել են աշխարհի ավելի քան 100 համալսարանի թիմեր: