19.06.2017 | 
Գիտություն
ՆՈՐ ԼԱԲՈՐԱՏՈՐԻԱՆ ԳԻՏԱԿԱՆ ՆՈՐ ՆՎԱՃՈՒՄՆԵՐԻ ՍԿԻԶԲ ԿԴԱՌՆԱ
ՆՈՐ ԼԱԲՈՐԱՏՈՐԻԱՆ ԳԻՏԱԿԱՆ ՆՈՐ ՆՎԱՃՈՒՄՆԵՐԻ ՍԿԻԶԲ ԿԴԱՌՆԱ
Հունիսի 17-ին ԵՊՀ կենսաբանության ֆակուլտետի գենետիկայի և բջջաբանության ամբիոնում տեղի ունեցավ Մոլեկուլային գենետիկայի լաբորատորիայի հանդիսավոր բացումը։

Գերժամանակակից սարքավորումներով հագեցած լաբորատորիան կրում է ֆրանսահայ կենսաբան, դոկտոր Քրիստոֆ Թերզյանի անունը։

Գենետիկայի, էվոլյուցիոն և մոլեկուլային կենսաբանության բնագավառներում հայտնի ֆրանսահայ մասնագետ Քրիստաֆոր Թերզյանն իր ամբողջ կյանքը նվիրել է հետազոտություններ կատարելուն: Ապրելով Ֆրանսիայում՝ նա ամեն կերպ աջակցել է Հայաստանում գիտության զարգացմանը: Թերզյանն ակտիվորեն մասնակցել է Գիտական համագործակցության ֆրանս-հայկական ասոցիացիայի (AFACS) գործունեությանը, որը նույնպես նպաստել է Հայաստանում գիտության զարգացմանը:

 

Հայազգի գիտնականը բազմաթիվ զեկուցումներով հանդես է եկել ԵՊՀ-ի կենսաբանության ֆակուլտետի գենետիկայի և բջջաբանության ամբիոնում: Լինելով համալսարանում և ամբողջ Հայաստանում այս ոլորտի զարգացման նվիրյալը՝ նա մահից առաջ նշանակալի գումար է նվիրաբերել ԵՊՀ կենսաբանության ֆակուլտետի գենետիկայի և բջջաբանության ամբիոնին:

 

Նրա՝ համալսարանին նվիրաբերած միջոցներով, ինչպես նաև «Հայաստան» համահայկական հիմնադրամի ֆինանսավորմամբ Մոլեկուլային գենետիկայի լաբորատորիան ամբողջովին վերազինվել է գերժամանակակից սարքավորումներով:

 

 

Լաբորատորիայի հանդիսավոր բացմանը ներկա գտնվելու համար Հայաստան էին ժամանել Քրիստոֆ Թերզյանի մայրը՝ Ժակլին Թերզյանը, և երկու դուստրերը: Միջոցառմանը ներկա էին նաև ԵՊՀ պրոռեկտորներ Ալեքսանդր Գրիգորյանը, Գեղամ Գևորգյանը, Ռուբեն Մարկոսյանը, Կենսաբանության ֆակուլտետի դեկան Էմիլ Գևորգյանը, Գենետիկայի և բջջաբանության ամբիոնի վարիչ Ռուբեն Հարությունյանը, ֆակուլտետի դասախոսներ և ուսանողներ, ինչպես նաև «Հայաստան» համահայկական հիմնադրամի ներկայացուցիչներ, Բժշկական գենետիկայի և առողջության առաջնային պահպանման կենտրոնի մասնագետներ։

 

Ռուբեն Հարությունյանն իր խոսքում հիշեց, թե ինչ դժվար էին ֆակուլտետում լաբորատոր հետազոտություններ կատարում 90-ականներին. «Դոկտոր Քրիստոֆ Թերզյանը հենց այդ ժամանակահատվածում հաճախ այցելում էր Հայաստան, դասախոսություններ կարդում համալսարանում և հույս հայտնում, որ Հայաստանում գենետիկան նույնքան կզարգանա, որքան Ֆրանսիայում և եվրոպական այլ երկրներում։ Վստահ եմ, որ Մոլեկուլային գենետիկայի լաբորատորիայի բացմամբ Թերզյանի երազանքը մոտ ապագայում կիրականանա»։

 

ԵՊՀ գիտական քաղաքականության և միջազգային համագործակցության գծով պրոռեկտոր Գեղամ Գևորգյանն ասաց, որ շատ ուրախալի է, երբ համագործակցության արդյունքն այսպես տեսանելի է լինում. «Թերզյանն այնքան նվիրված է եղել իր գործին, որ ցանկացել է՝ իր մահից հետո էլ շարունակվեն իր երազանքի իրականացման աշխատանքները: Ես վստահ եմ, որ այս սարքավորումները նշանակալի արդյունքներ կտան»:

 

ԵՊՀ կենսաբանության ֆակուլտետի դեկան Էմիլ Գևորգյանն էլ հավելեց, որ այս նշանակալի իրադարձությունը ոչ միայն գիտական նվաճումների նոր սկիզբ կդառնա, այլև հայրենասիրության դրսևորման լավագույն օրինակ կծառայի:

 

Ֆրանսիայից ժամանած Թերզյանի դուստրերը լրագրողների հետ զրույցում նշեցին, որ շատ ոգևորված են, որ իրենց հայրիկի գործն այսուհետ շարունակվելու է համալսարանականների կողմից։ Թերզյանի մայրը՝ Ժակլին Թերզյանը, լաբորատորիայի բացումը խորհրդանշող կարմիր ժապավենը կտրելուց հետո փաստեց, որ շատ ուրախ է լինել որդու անվան լաբորատորիայում։

 

 

Այլ նորություններ
«ՓՈՐՁՈՒՄ ԵՆՔ ՎԵՐԱԿԱՆԳՆԵԼ ՀԻՆ ԱՇԽԱՐՀԻ ՆԵՐԿԱՅԱՑՈՒՑԻՉՆԵՐԻՆ». ՀԱՐՑԱԶՐՈՒՅՑ ԿԵՆՍԱԲԱՆ ՆԵԼԼԻ ՀՈՎՀԱՆՆԻՍՅԱՆԻ ՀԵՏ
Ցորենի առանձին տեսակների հայրենիքը Հայկական լեռնաշխարհն է։ Հնագիտական պեղումներով ժամանակին հայտնաբերվել են ցորենի ածխացած հատիկներ, և պարզվել է, որ 2,5 հազար տարի առաջ Արարատյան դաշտում մշակել են միահատիկ ու փափուկ ցորեններ։ Հայաստանի տարածքում գարու մշակությունը սկսվել է 5-6 հազար տարի առաջ։ Պեղումների ժամանակ հայտնաբերված հատիկների մաքրությունը և միատարրությունը վկայում են, որ մ.թ.ա. 9-6-րդ դարերում մշակել են բազմաշար գարու բարձրարժեք փոփոխակներ, որոնցից պատրաստել են գարեջուր։
ԵՊՀ-ՈՒՄ ԿԱՆՑԿԱՑՎԵՆ ՀԱՅԱԶԳԻ ԱՇԽԱՐՀԱՀՌՉԱԿ ՄԱԹԵՄԱՏԻԿՈՍ ԷՄԻԼ ԱՐԹԻՆԻՆ ՆՎԻՐՎԱԾ ՄԻՋԱԶԳԱՅԻՆ ԳԻՏԱԺՈՂՈՎ ԵՎ ՄԻՋԱԶԳԱՅԻՆ ԴՊՐՈՑ
ԵՊՀ-ում մայիսի 21-ից 25-ը մաթեմատիկոս ուսանողների համար կանցկացվի հայազգի աշխարհահռչակ մաթեմատիկոս Էմիլ Արթինի գիտական ժառանգությանը նվիրված միջազգային դպրոց: Այն իրականացվելու է Հայկական մաթեմատիկական միության նախագահ, ԵՊՀ հանրահաշվի և երկրաչափության ամբիոնի պատվավոր վարիչ, պրոֆեսոր Յուրի Մովսիսյանի նախաձեռնությամբ: