08.05.2019 | 
Կրթություն
ԱՐԵՎԵԼԱԳԵՏ ՎԱՍԻԼԻ ԿՈՒԶՆԵՑՈՎԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ԱՐԵՎԵԼԱԳԵՏ ՎԱՍԻԼԻ ԿՈՒԶՆԵՑՈՎԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ԵՊՀ Եգիպտոսի անվան լսարանում այսօր դասախոսություն կարդաց Ռուսաստանի գիտությունների ակադեմիայի (ՌԳԱ) արևելագիտության ինստիտուտի արաբական և իսլամական հետազոտությունների կենտրոնի տնօրեն, Մոսկվայի Մ. Վ. Լոմոնոսովի անվան պետական համալսարանի (ՄՊՀ) համաշխարհային քաղաքականության ֆակուլտետի դոցենտ, պատմ. գիտ. թեկնածու Վասիլի Կուզնեցովը:

Դասախոսությունը կազմակերպել էր Արևելագիտության ֆակուլտետը:

«Թունիսի թաքնված ուղիները. քաղաքական գործընթացների դիսկուրսային վերլուծության մեթոդաբանության վերաբերյալ» խորագրով դասախոսությանը ներկա էին Արևելագիտության ֆակուլտետի դեկան, պրոֆեսոր Ռուբեն Մելքոնյանը, Քաղաքակրթական և մշակութային հետազոտությունների կենտրոնի ղեկավար Դավիթ Հովհաննիսյանը, ՀՀԻ ցեղասպանագիտության բաժնի վարիչ Սուրեն Մանուկյանը, ֆակուլտետի դասախոսներ և ուսանողներ:

Արաբագիտության ամբիոնի վարիչ Հայկ Քոչարյանը ողջունեց ներկաներին՝ ներկայացնելով բանախոսին:

Վասիլի Կուզնեցովը «Վալդայ» միջազգային քննարկումների ակումբի վերլուծական զեկույցների հեղինակն է, որոնք վերաբերում են Արաբական աշխարհի զարգացման սոցիալ-քաղաքական խնդիրներին և պետականաշինությանը:

Նա նաև «Թունիսի թաքնված ուղիները. ապրել և պատմել հեղափոխությունը» մենագրության հեղինակն է: Մասնակցել է Լիբիական հակամարտության հաղթահարման երկկողմ և բազմակողմ բազմաթիվ բանակցությունների:

Վասիլի Կուզնեցովը պատմեց իր՝ «Թունիսի թաքնված ուղիները. ապրել և պատմել հեղափոխությունը» մենագրության մասին:

Վասիլի Կուզնեցովը նշեց, որ դասախոսության ընթացքում կենտրոնանալու է մեթոդաբանական հարցերի վրա, քանի որ դրանք երբեմն առավել կարևոր են, քան բուն իրադարձությունները:



Ըստ բանախոսի՝ գիրքը նվիրված է հետևյալ երևույթների: Նախ՝ առանցքում Թունիսում տեղի ունեցած սոցիալ-քաղաքական գործընթացներն են: 2008 թվականին տեղի ունեցավ առաջին ցույցը տարածաշրջանում, որը մարդկանց կյանքեր խլեց: Այդ տարին համարվեց հեղափոխական գործընթացների սկիզբ:

Վասիլի Կուզնեցովը նշեց, որ իր համար մեծ նշանակություն ունի մեթոդաբանությունը:

«Ես փորձեցի այս աշխատությամբ ցույց տալ, որ որոշակի նարատիվներ ազդում են քաղաքական սուբյեկտների գործունեության վրա»,- ասաց նա:

Վասիլի Կուզնեցովն անդրադարձավ այն փաստին, որ մարդու էսթետիկ ընտրանքը նախորդում է քաղաքական և էթնիկական ընտրությանը: Ըստ նրա՝ մարդիկ իրականությունը տեսնում են դրա մասին տեղեկատվության միջոցով:

Վասիլի Կուզնեցովը թեզիսների մեջ առանձնացրեց հետևյալը. քաղաքական իրականությունը կազմվում է քաղաքական տարբեր սուբյեկտների գործունեությունից: Այդ սուբյեկտների գործունեությունը պայմանավորված է այն նարատիվներով, որոնցում որ գոյություն ունի:

Կուզնեցովը պատմեց նաև թունիսական գրաֆիտիի ուսումնասիրությունների մասին, որոնք փոփոխվող մեյնսթրիմի, փոփոխվող իրականության արձագանքն էին:

Վասիլի Կուզնեցովը ներկաներին պատմեց նաև Կաֆսայի՝ Թունսիսի նահանգներից մեկի մասին, որը ֆոսֆորիտների հանքարդյունաբերական կենտրոնն է:

Բանախոսը պատմեց իր կատարած դաշտային հետազոտությունների, դրանց արդյունքների մասին՝ նշելով, որ հետազոտության մեջ կարևոր դեր խաղաց մարդկային բաղադրիչը:

Դասախոսությանը հաջորդեց քննարկումը:

 

Մարի Ռաֆյան

Այլ նորություններ
ԵՊՀ-ՈՒՄ ՏԵՂԻ Է ՈՒՆԵՑԵԼ ԻԻՀ ԽՈՐՀՐԴԱՐԱՆԻ ՀԱՅԱԶԳԻ ՊԱՏԳԱՄԱՎՈՐԻ ՊԱՐՍԿԵՐԵՆ ՄԵՆԱԳՐՈՒԹՅԱՆ ՇՆՈՐՀԱՆԴԵՍԸ
ԵՊՀ արևելագիտություն ֆակուլտետի իրանագիտության ամբիոնում այսօր տեղի են ունեցել ԻԻՀ խորհրդարանի հայազգի պատգամավոր, պատմագիտության դոկտոր Կարեն Խանլարյանի «Հայաստանի աշխարհագրության սահմանումը ըստ իսլամական աղբյուրների» պարսկերեն մենագրության շնորհանդեսը և հեղինակի հետ հանդիպումը։
ՍԱՀՄԱՆՎԵԼ Է ԵՊՀ 2019-2020 ՈՒՍՈՒՄՆԱԿԱՆ ՏԱՐՎԱ ՀԱՄԱՐ ՄԻՋԻՆ ՈՐԱԿԱԿԱՆ ԳՆԱՀԱՏԱԿԱՆԻ (ՄՈԳ) ՇԵՄԸ
ԵՊՀ-ում 2019-2020 ուսումնական տարվա համար միջին որակական գնահատականի (ՄՈԳ) շեմը բակալավրիատում սահմանվել է 11.00-ն, իսկ մագիստրատուրայում՝ 15.00-ն: