11.02.2019 | 
Կրթություն
«FEBS» ԴԱՍԱԽՈՍՈՒԹՅՈՒՆՆԵՐԻ ՇԱՐՔ. ՆՈԲԵԼՅԱՆ ՄՐՑԱՆԱԿԱԿԻՐ ՀԱՐԱԼԴ ԶՈՒՐ ՀԱՈՒԶԵՆԸ ՀԱՆԴԵՍ Է ԳԱԼՈՒ ԴԱՍԱԽՈՍՈՒԹՅԱՄԲ
«FEBS» ԴԱՍԱԽՈՍՈՒԹՅՈՒՆՆԵՐԻ ՇԱՐՔ. ՆՈԲԵԼՅԱՆ ՄՐՑԱՆԱԿԱԿԻՐ ՀԱՐԱԼԴ ԶՈՒՐ ՀԱՈՒԶԵՆԸ ՀԱՆԴԵՍ Է ԳԱԼՈՒ ԴԱՍԱԽՈՍՈՒԹՅԱՄԲ
Եվրոպայի կենսաքիմիկոսների ասոցիացիաների ֆեդերացիայի (FEBS) աջակցությամբ Հայաստանում անցկացվելու է «Ախտածինների ուսումնասիրության ժամանակակից ձեռքբերումները» խորագրով «FEBS» դասախոսությունների շարք:

Այս մասին մեզ հետ զրույցում ասաց ԵՊՀ կենսաբանության ֆակուլտետի կենդանաբանության լաբորատորիայի գիտաշխատող, Կենսաբանների հայկական միության նախագահ Սարգիս Աղայանը:

 

 

Դասախոսությունների շարքն անցկացվելու է մարտի 25-30-ը, որի ընթացքում ելույթ են ունենալու 17 անվանի գիտնականներ Հայաստանից, Գերմանիայից, Ֆրանսիայից, Նիդերլանդներից, Շվեյցարիայից, Անգլիայից, Իսրայելից, Պորտուգալիայից, ԱՄՆ-ից, Նորվեգիայից և Ավստրիայից:

Ծրագրի աջակիցներն են Կենսաբանների հայկական միությունը, Երևանի պետական համալսարանը, «FAST» հիմնադրամը և Մ. Հերացու անվան Երևանի պետական բժշկական համալսարանը։

 

Ս. Աղայանը միջոցառմանը հրավիրված գիտնականներից հատուկ առանձնացրեց երկուսին՝ Նոբելյան մրցանակակիր Հարալդ Զուր Հաուզենին Գերմանիայից և Եվգենի Կունինին ԱՄՆ-ից, որն ընդգրկված է աշխարհի լավագույն 10 գիտնականների շարքում:

Դասախոսություններին զուգահեռ անցկացվելու է նաև գիտաժողով, որի ժամանակ ՀՀ և արտերկրյա երիտասարդ գիտնականներն ու ուսանողները ներկայացնելու են իրենց հետազոտությունների արդյունքները պաստառային զեկուցումների տեսքով, իսկ լավագույնները հնարավորություն են ստանալու ելույթ ունենալ նաև բանավոր զեկուցմամբ:

 

Կենսաբանների հայկական միության նախագահի խոսքով, դասախոսությունների շարքը նպատակ ունի ապահովելու այնպիսի գիտական միջավայր, որտեղ երիտասարդ գիտնականները հնարավորություն կունենան ծանոթանալու ոլորտի նորամուծություններին, ինչպես նաև կկարողանան անմիջականորեն շփվել և կապեր հաստատել հայտնի գիտնականների հետ:

 

Դասախոսությունները ներկայացվելու են հետևյալ թեմաներով՝ վիրուսային և բակտերիալ ախտածիններ, էուկարիոտ մակաբույծներ, հակապաթոգեն մեխանիզմների ուսումնասիրություններ:

 

 

Այս դասախոսությունների շարքի կազմակերպիչներն են ՀՀ ԳԱԱ մոլեկուլային կենսաբանության ինստիտուտի գիտաշխատող Հովակիմ Զաքարյանը, ԵՊՀ կենսաբանության ֆակուլտետի կենդանաբանության լաբորատորիայի գիտաշխատող Սարգիս Աղայանը, Ամստերդամի համալսարանի ակադեմիական բժշկական կենտրոնի պրոֆեսոր Բեն Բերխուտը և Պաստերի ինստիտուտի պրոֆեսոր Մարկո Վիգնուցին:

 

Դասախոսությունների մեկնարկի առաջին օրը՝ մարտի 25-ին, Երևանի պետական բժշկական համալսարանի դահլիճում Նոբելյան մրցանակակիր Հարալդ Զուր Հաուզենը հանդես է գալու «Վարակիչ հիվանդությունների ուղղակի և անուղղակի ազդեցությունը մարդու քաղցկեղի ժամանակ» թեմայով դասախոսությամբ։

 

Նադեժդա Տեր-Աբրահամյան

 

Այլ նորություններ
ԱՆԳԼԵՐԵՆԻ ԲԱՐԵԼԱՎՄԱՆ ՀՆԱՐԱՎՈՐՈՒԹՅՈՒՆ ԻՐԱՎԱԲԱՆՆԵՐԻ ՀԱՄԱՐ. ՄՇԱԿՎԵԼ Է ՆՈՐ ԾՐԱԳԻՐ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի ուսանողներին իրավաբանական անգլերեն ուսուցանելու նպատակով «Մարդու իրավունքների տուն Երևան» միջազգային իրավապաշտպան կազմակերպությունների ցանցի հետ համատեղ մշակվել է «Իրավաբանական անգլերեն» դասընթացը:
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ ԿՐԿԻՆ ՀԱՂԹԵԼ ԵՆ ՄԻՋԲՈՒՀԱԿԱՆ ԴԱՏԱԽԱՂՈՒՄ
Ապրիլի 13-14-ը տեղի ունեցած Մտավոր սեփականության իրավունքի ամենամյա 8-րդ մրցույթ-դատախաղին ԵՊՀ-ն ներկայացել է երկու թիմով, որոնցից մեկը ճանաչվել է գրավոր փուլի հաղթող, իսկ մյուսը զբաղեցրել է առաջին հորիզոնականը և նվաճել լավագույնի տիտղոսը: