02.10.2017 | 
Կրթություն
ԵՊՀ ԴԱՍԱԽՈՍՆԵՐԸ ԴԱՍԱԽՈՍՈՒԹՅՈՒՆՆԵՐ ԵՆ ԿԱՐԴԱՑԵԼ ԱՐՊՀ ՈՒՍԱՆՈՂՆԵՐԻ ՀԱՄԱՐ
ԵՊՀ ԴԱՍԱԽՈՍՆԵՐԸ ԴԱՍԱԽՈՍՈՒԹՅՈՒՆՆԵՐ ԵՆ ԿԱՐԴԱՑԵԼ ԱՐՊՀ ՈՒՍԱՆՈՂՆԵՐԻ ՀԱՄԱՐ
Սեպտեմբերի 25-30-ը ԵՊՀ իրավագիտության ֆակուլտետի պրոֆեսորադասախոսական կազմի ներկայացուցիչները դասախոսություններ են կարդացել Արցախի պետական համալսարանում (ԱրՊՀ):

Դասախոսությունները կազմակերպվել են ԵՊՀ իրավագիտության ֆակուլտետի և Արցախի պետական համալսարանի միջև կնքված հուշագրի շրջանակում:

 

Ապագա իրավագետների համար ընթերցված դասախոսությունների թեմաներն ընտրվել են ըստ ԱրՊՀ-ի ներկայացրած պահանջի: Դասախոսների խումբը կազմված է եղել  ֆակուլտետի կայացած և փորձառու դասախոսներից, որոնց թվում են եղել Պետության և իրավունքի տեսության ու պատմության ամբիոնի վարիչ Արթուր Վաղարշյանը, Քրեական իրավունքի ամբիոնի վարիչ Արա Գաբուզյանը, Քրեական դատավարության և կրիմինալիստիկայի ամբիոնի վարիչ Սամվել Դիլբանդյանը, դասախոսներ Վահե Ենգիբարյանը, Դավիթ Ավետիսյանը, Արման Հովհաննիսյանը:

 

 

Դասախոսությունները տևել են մեկ շաբաթ՝ օրական 4-6 ժամով: Մեզ հետ զրույցում Արթուր Վաղարշյանն արձանագրեց, որ որոշ դասախոսություններով սպառել են նույնիսկ ուսումնական պլանով նախատեսված ժամաքանակը: Նրա հավաստմամբ՝ դասախոսությունները շատ արդյունավետ էին և օգտակար հատկապես ուսանողների համար. «Մենք պատրաստակամ ենք հաջորդ անգամ ևս մեծ ուրախությամբ այցելել Արցախ, հանդես գալ դասախոսություններով, օգնել գիտական, մեթոդական և այլ հարցերում: Մեզ հետ ունեցած զրույցների ժամանակ ԱրՊՀ և՛ ռեկտորը, և՛ մասնագետները փաստեցին, որ ուսանողների շրջանում մեծ հետաքրքրություն էին առաջացրել դասախոսությունները: Նրանք շատ գոհ էին և ոգևորված»:

 

Ամբիոնի վարիչը ասաց նաև, որ ԵՊՀ պրոֆեսորադասախոսական կազմի ներկայացուցիչները այցը դիտարկում են որպես պարտք Արցախի Հանրապետությանը ու Արցախի պետական համալսարանին և պատրաստակամ են ցանկացած հարցում օգնել ու աջակցել նրանց:

 

Տեղեկացնենք, որ գարնանը նույնպես նախատեսվում է ֆակուլտետի դասախոսների  այց դեպի Արցախ:

 

Այլ նորություններ
«ՀՈՒԶԱԿԱՆ ԲԱՆԱԿԱՆՈՒԹՅԱՆ ԴԵՐԸ ԿԱՐԻԵՐԱՅԻ ԶԱՐԳԱՑՄԱՆ ԵՎ ԻՆՔՆԱԿԱՌԱՎԱՐՄԱՆ ՄԵՋ». ՍԵՄԻՆԱՐ-ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ շրջանավարտների և կարիերայի կենտրոնի և «Գոյ» գիտագործնական համալիրի հետազոտությունների նորարարական կենտրոնի համագործակցության շրջանակում այսօր կայացավ «EQ. հուզական բանականության դերը կարիերայի զարգացման և ինքնակառավարման մեջ» խորագրով սեմինար-դասընթաց:
ՎԱՆԱՁՈՐԻ ԱՇԱԿԵՐՏՆԵՐԻՆ ՆԵՐԿԱՅԱՑՎԵՑԻՆ ԵՊՀ ԿՐԹԱԿԱՆ ԾՐԱԳՐԵՐԸ
ԵՊՀ մաթեմատիկայի և մեխանիկայի, կենսաբանության, սոցիոլոգիայի, ֆիզիկայի և քիմիայի ֆակուլտետների պրոֆեսորադասախոսական կազմի ներկայացուցիչներն այսօր այցելել են Վանաձորի թիվ 5 և «Էվրիկա» բնագիտամաթեմատիկական թեքումով հատուկ դպրոցներ` համալսարանի կրթական ծրագրերը և ֆակուլտետները ներկայացնելու համար: