03.05.2019 | 
Ուսանողական
ԵՊՀ ՈՒՍԱՆՈՂՆԵՐԸ ՍՈՎՈՐՈՒՄ ԵՆ ԿԱՌԱՎԱՐԵԼ ԺԱՄԱՆԱԿԸ
ԵՊՀ ՈՒՍԱՆՈՂՆԵՐԸ ՍՈՎՈՐՈՒՄ ԵՆ ԿԱՌԱՎԱՐԵԼ ԺԱՄԱՆԱԿԸ
ԵՊՀ շրջանավարտների և կարիերայի կենտրոնն այսօր կազմակերպել էր «Ժամանակի կառավարման հմտությունները» թեմայով սեմինար-դասընթաց։

Սեմինարը վարում էր մարդկային ռեսուրսների կառավարման և կազմակերպության զարգացման փորձագետ և խորհրդատու Լիլիթ Գևորգյանը։

Հանդիպմանը ներկա էին տարբեր ֆակուլտետների ուսանողներ և մի քանի ընկերությունների ներկայացուցիչներ։

Սեմինար-դասընթացի սկզբում ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը ողջունեց ներկաներին և հույս հայտնեց, որ սեմինարը բովանդակալից ու արդյունավետ կլինի բոլորի համար։

Դասընթացի շրջանակում բանախոսը շոշափեց երկու թեմա՝ «Ժամանակի կառավարում. նպատակներ և ժամանակի «գողեր»» ու «Ժամանակի պլանավորման մեթոդներ և տեխնիկաներ»։

«Ժամանակի կառավարման հիմնական խնդիրն է կարգավորել ժամանակի օգտագործումը, ինչը թույլ է տալիս լիարժեք օգտագործել սեփական ֆիզիկական և մտավոր ունակություններն անընդհատ փոփոխվող աշխարհում»,- ասաց Լիլիթ Գևորգյանը։



Դասընթացն իրենից ներկայացնում էր աշխատանքի արդյունավետ կազմակերպման ծրագիր։ Ըստ բանախոսի՝ ժամանակի կառավարումն ինքնազարգացման և սեփական աշխատանքի արդյունավետության բարձրացման կարևոր քայլերից է։ Նա խոսեց ժամանակի ընկալման առումով գոյություն ունեցող երեք հիմնական տիպերի (գծային, զուգահեռ, ցիկլիկ) մասին և ներկայացրեց, թե ինչպես են վերջիններս «զգում» ժամանակը։

Սեմինարի ընթացքում փորձագետն առաջարկեց առանց ժամին նայելու չափել ժամանակը՝ հասկանալու համար, թե ինչպես են ներկաներն այն ընկալում։ Այս վարժանքը նրա համար էր, որ ներկաները հասկանան՝ ժամանակը կառավարելու համար անհրաժեշտ է այն ճիշտ հաշվել։

Դասընթացի նպատակն էր բացատրել մասնակիցներին, թե ինչպես է հնարավոր ժամանակի կառավարման շնորհիվ ունենալ ավելի արդյունավետ և կազմակերպված աշխատանքային առօրյա։ Լիլիթ Գևորգյանն ասաց, որ օրվա ճիշտ պլանավորումը հանգեցնում է աշխատանքային հաջողությունների, դրա շնորհիվ պակասում են սթրեսային իրավիճակները, և շոշափելի արդյունքներ են գրանցվում։



ԵՊՀ շրջանավարտների և կարիերայի կենտրոնի կողմից հրավիրված հյուրը, հաշվի առնելով թեմայի նկատմամբ ներկաների հետաքրքրվածությունը, խոստացավ, որ հաջորդ հանդիպման ընթացքում կխոսի մարդկային ռեսուրսների կառավարման մասին։

Այլ նորություններ
ԱՊՐԻԼՅԱՆ ՊԱՏԵՐԱԶՄԻ ՏՎԱԾ ԴԱՍԵՐՆ ՈՒ ՀԵՏԱԳԱ ԱՆԵԼԻՔՆԵՐԸ. ԵՊՀ ՈՒՍԱՆՈՂՆԵՐԻ ՀԱՆԴԻՊՈՒՄՆ ԱՊՐԻԼՅԱՆ ՔԱՌՕՐՅԱՅԻ ՄԱՍՆԱԿԻՑՆԵՐԻ ՀԵՏ
ԵՊՀ սև շենքի դահլիճում հոկտեմբերի 16-ին ԵՊՀ ուսանողները հանդիպեցին Ապրիլյան քառօրյա պատերազմի մասնակիցներ Հրանտ Սարկիսովի, Շուլի Հակոբյանի, Սեյրան Մարգարյանի և քառօրյա պատերազմում հերոսաբար զոհված տանկիստ Տիգրան Աբգարյանի եղբոր՝ Ժորա Աբգարյանի հետ:
«ՆԵՐԿԱՅԱՑՄԱՆ ՀՄՏՈՒԹՅՈՒՆՆԵՐ» ՍԵՄԻՆԱՐ-ՔՆՆԱՐԿՈՒՄ ԵՊՀ-ՈՒՄ
ԵՊՀ Սարգիս և Մարի Իզմիրլյանների անվան գրադարանի Ադամյան սրահում Շրջանավարտների և կարիերայի կենտրոնի ու «Quick Start»-ի համատեղ ջանքերով այսօր տեղի է ունեցել «Ներկայացման հմտություններ» խորագրով սեմինար-քննարկում: