04.06.2019 | 
Գիտություն
ՍՈՑԻՈԼՈԳԻԱՅԻ ՖԱԿՈՒԼՏԵՏԻ ԴԱՍԱԽՈՍ ԼԻԼԻԹ ՇԱՔԱՐՅԱՆԸ ԴԱՍԱԽՈՍՈՒԹՅՈՒՆՆԵՐ Է ԿԱՐԴԱՑԵԼ ՄԱԴՐԻԴԻ ԿՈՄՊԼՈՒՏԵՆՍԵ ՀԱՄԱԼՍԱՐԱՆՈՒՄ
ՍՈՑԻՈԼՈԳԻԱՅԻ ՖԱԿՈՒԼՏԵՏԻ ԴԱՍԱԽՈՍ ԼԻԼԻԹ ՇԱՔԱՐՅԱՆԸ ԴԱՍԱԽՈՍՈՒԹՅՈՒՆՆԵՐ Է ԿԱՐԴԱՑԵԼ ՄԱԴՐԻԴԻ ԿՈՄՊԼՈՒՏԵՆՍԵ ՀԱՄԱԼՍԱՐԱՆՈՒՄ
ԵՊՀ սոցիոլոգիայի ֆակուլտետի դասախոս Լիլիթ Շաքարյանն ապրիլի 29-ից մայիսի 3-ը «Erasmus+» ծրագրով դասախոսություններ է կարդացել Մադրիդի Կոմպլուտենսե համալսարանում:

Այս առիթով ysu.am-ը զրուցել է նրա հետ:

- Տիկի՛ն Շաքարյան, ի՞նչ տվեց Ձեզ այս համագործակցությունը:

- Մադրիդում գտնվելու ընթացքում գենդերային հետազոտությունների ոլորտում ունեցած իմ փորձն ու գիտելիքները կիսեցի Քաղաքական գիտությունների և սոցիոլոգիայի ֆակուլտետի ուսանողների և դասախոսների հետ: Ես ոլորտում իմ գիտելիքներն ընդլայնելու, նոր ուսումնական նյութեր և ռեսուրսներ հավաքելու հնարավորություն ունեցա, ձեռք բերեցի նոր գրականություն: Նշեմ, որ հաջողվեց նաև ձևավորել միջազգային ակադեմիական ցանց:

Ես կարևորում եմ ակադեմիական, մասնագիտական և միջմշակութային շփումները, որոնց արդյունքում բացահայտվում են հաղորդակցման արվեստը, մշակութային ներկայացուցչության առանձնահատկությունները և սոցիալական ինքնությունը:



Նշեմ, որ պրոֆեսոր Էմմանուա Լոմբարդոյի հետ համագործակցելու, գենդերային հետազոտությունների ոլորտում նրա գիտական աշխատանքներին ծանոթանալու և նրա հետ դասեր անցկացնելու հնարավորություն ունեցա:

Կարևոր փորձ էր տարբեր մշակույթներ կրող ուսանողների հետ աշխատելն ու նրանց կարծիքները լսելը:

- Ի՞նչ թեմաներով էին Ձեր դասախոսությունները:

- Դասախոսություններ եմ անցկացրել «Քաղաքագիտություն» բակալավրիատի ծրագրի ուսանողների համար «Գենդերային դիսկուրսը լրատվամիջոցներում. ինչպես է գենդերը իմաստներ ձևավորում» թեմայով: Դասախոսությունները հիմնված էին գենդերային հետազոտությունների ոլորտում հայտնի տեսաբան Ջուլիա Վուդի հայեցակարգի և հայաստանյան մեդիադաշտում անցկացրած իմ հետազոտությունների արդյունքների վրա:

Հետազոտելով հայկական և իսպանական իրականությունները՝ ես հնարավորություն ունեցա այդ հետազոտությունների հիման վրա համեմատելու ու քննարկելու նշված երկու հասարակությունները:



- Ի՞նչն եք կարևորում գենդերային հետազոտությունների մեջ:

- Մեծ դերակատարում և կարևորություն ունեն ժամանակակից աշխարհում գենդերային խնդիրների, մարտահրավերների վերաբերյալ մասնագետների քննարկումներն ու մեկնաբանությունները:
Գենդերային խնդիրը կարելի է բնորոշել որպես սոցիալական երևույթ: Այն հետաքրքրություն է ներկայացնում տարբեր գիտությունների համար, ուստի կարելի է ուսումնասիրել տարբեր դիտանկյուններից: Ես ուսումնասիրել եմ սոցիոլոգիական կողմից՝ ներկայացնելով գենդերը՝ որպես իրականության սոցիալական կոնստրուկտ: Ինձ համար հետաքրքիր էր դիտարկել գենդերը նաև քաղաքական տեսանկյունից:

- Համագործակցության ինչպիսի՞ հեռանկարներ եք տեսնում:

- Պատրաստվում ենք պրոֆեսոր Մար Մաիրայի հետ համեմատական վերլուծություններ կատարել, նա արդեն մի շարք հետազոտություններ ունի այս ոլորտում: Մենք շարունակում ենք աշխատել երկու պրոֆեսորների հետ:



Շնորհակալություն եմ հայտնում պրոֆեսորներ Էմմանուա Լոմբարդոյին, Մար Մաիրային և Ինմաքուլադա Լուիսին՝ ինձ աջակցելու համար:
«Erasmus +» ծրագիրը երիտասարդ դասախոսներին հնարավորություն է տալիս մշակելու միջազգային ակադեմիական համագործակցություն, մասնակցելու ուսումնական ծրագրերի մշակմանը և ուսումնասիրելու այլընտրանքային ուսուցման մեթոդաբանությունները:



Կարծում եմ, որ սա Հայաստանի համար արժեքավոր ակադեմիական համագործակցության և գենդերային հետազոտությունների զարգացման սկիզբ է:

 

Մարի Ռաֆյան

Այլ նորություններ
ՂՐՂԶՍՏԱՆՈՒՄ ԱՆՑԿԱՑՎԵԼՈՒ Է ԵԱՏՄ ՏԱՐԱԾՔՈՒՄ ԱՄԵՆԱՄԵԾ «ԵՎՐԱՍԻԱԿԱՆ ՇԱԲԱԹ-2019» ԽՈՐԱԳՐՈՎ ՀԱՄԱԺՈՂՈՎԸ
Եվրասիական տնտեսական միության (ԵԱՏՄ) գործարարները և ակտիվ երիտասարդները հանդիպելու են մեկ հարթակում՝ քննարկելու տնտեսական ինտեգրման և բիզնես համագործակցության հարցերը, որին հեռակա կարգով կարող են մասնակցել նաև ԵՊՀ տարբեր ֆակուլտետների դասախոսներ, երիտասարդ գիտնականներ, ասպիրանտներ և փորձագետներ:
ԼՈՒՅՍ ԵՆ ՏԵՍԵԼ «ԵՊՀ ՈՒԳԸ ԳԻՏԱԿԱՆ ՀՈԴՎԱԾՆԵՐԻ ԺՈՂՈՎԱԾՈՒ» ԵՐԻՏԱՍԱՐԴԱԿԱՆ ԳԻՏԱԿԱՆ ՊԱՐԲԵՐԱԿԱՆԻ 2019 ԹՎԱԿԱՆԻ ԱՌԱՋԻՆ ՀԱՄԱՐՆԵՐԸ
ԵՊՀ գիտխորհրդի նիստերի դահլիճում այսօր տեղի ունեցավ «ԵՊՀ ՈՒԳԸ գիտական հոդվածների ժողովածու» երիտասարդական գիտական պարբերականի Բնական և ֆիզիկամաթեմատիկական գիտությունների 1.1 (27), Հումանիտար և հասարակական գիտությունների 1.2 (28) համարների շնորհանդեսը: