04.04.2018 | 
Կրթություն
«ՀՊԱՐՏԱՆՈՒՄ ԵՄ, ԵՐԲ ՏԱՐԲԵՐ ԿԱՌՈՒՅՑՆԵՐՈՒՄ ՀԱՆԴԻՊՈՒՄ ԵՄ ԻՄ ՀԱՅ ՈՒՍԱՆՈՂՆԵՐԻՆ». ՄԱՐԻԱ ՄԵՆԴԵՍ ՍԱՆՏՈՍ
«ՀՊԱՐՏԱՆՈՒՄ ԵՄ, ԵՐԲ ՏԱՐԲԵՐ ԿԱՌՈՒՅՑՆԵՐՈՒՄ ՀԱՆԴԻՊՈՒՄ ԵՄ ԻՄ ՀԱՅ ՈՒՍԱՆՈՂՆԵՐԻՆ». ՄԱՐԻԱ ՄԵՆԴԵՍ ՍԱՆՏՈՍ
Ապրիլի 4-6-ն Իսպանիայի Ալիկանտեի համալսարանի դոկտոր Մարիա Մենդես Սանտոսը դասախոսություններ կկարդա ԵՊՀ ռոմանագերմանական բանասիրության ֆակուլտետի դասախոսների համար:

Մարիա Մենդես Սանտոսը ԵՊՀ է այցելել Ռոմանական բանասիրության ամբիոնի վարիչ, դոցենտ Հասմիկ Բաղդասարյանի հրավերով դասախոսների վերապատրաստմանն ուղղված ծրագրերի շրջանակում: «Օտար լեզուների դիդակտիկայի նոր հեռանկարները» և «Ժամանակակից տեխնոլոգիաներն օտար լեզվի դասավանդման գործում» խորագրերով դասախոսությունները նվիրված են իսպաներենի դասավանդման մեթոդիկային:

 

Հյուրը Ռոմանական բանասիրության ամբիոնին նաև մի շարք մասնագիտական գրքեր է նվիրաբերել:

 

«Դասախոսների վերապատրաստման ծրագիրը շարունակական բնույթ է կրելու: Նախատեսում ենք պարբերաբար ԵՊՀ հրավիրել դասավանդման բնագավառում արդեն փորձ ունեցող արտասահմանյան մասնագետների, որոնք համալսարանական դասախոսներին կփոխանցեն դասավանդման նորագույն մեթոդները, տեխնոլոգիաներն ու ոլորտի նորարարությունները»,- ասում է Հասմիկ Բաղդասարյանը և հավելում, որ դասախոսները մեծ ոգևորվածությամբ են մասնակցում նմանաբնույթ միջոցառումներին ու թեմատիկ քննարկումներին:

 

Ամբիոնի վարիչն ընդգծեց՝ դասախոսություններին ներկա են նաև ոչ համալսարանական դասախոսներ, ինչպես նաև դպրոցի ուսուցիչներ. «Հայաստանում քիչ դպրոցներ կան, որտեղ իսպաներենը դասավանդվում է որպես օտար լեզու, ուստի ուսուցիչների մասնակցությունն այս դասախոսություններին ու հանդիպումներին շատ կարևոր է»:

 

Ալիկանտեի համալսարանի լեզվաբանության ֆակուլտետի դասախոսն իսպաներենի դասավանդման մեթոդիկայի բնագավառում հարուստ փորձ ունի. 2005 թ.-ից աշխատել է և դասախոսություններով հանդես եկել աշխարհի մի շարք երկրների առաջատար համալսարաններում՝ ԱՄՆ, Ճապոնիա, Իրան, Էստոնիա, Ռումինիա, Ուկրաինա և այլն:

 

Հավելենք նաև, որ նա Հասմիկ Բաղդասարյանի հետ «Իսպաներեն լեզվի բառագիտություն» և «Իսպաներենն ակադեմիական նպատակների համար» դասագրքերի համահեղինակ է:  

 

«Առաջին անգամ Հայաստան եմ գործուղվել 2009 թ.-ին: Այստեղ շատ ընկերներ ունեմ, հայ գործընկերների հետ կապն ամուր է ու ջերմ: Տարիների ընթացքում շատ դրական փոփոխություններ եմ նկատել տարբեր ենթակառուցվածքների աշխատանքների ու նույնիսկ մարդկանց հագ ու կապի մեջ: Հաճույքով եմ Հայաստան այցելում ու հպարտանում, երբ տարբեր կառույցներում հանդիպում եմ իմ հայ ուսանողներին՝ հիանալով նրանց լեզվական հմտություններով»,- ասում է Մարիա Մենդես Սանտոսը:

Այլ նորություններ
ԵՊՀ-ՈՒՄ ՏԵՂԻ Է ՈՒՆԵՑԵԼ ԻԻՀ ԽՈՐՀՐԴԱՐԱՆԻ ՀԱՅԱԶԳԻ ՊԱՏԳԱՄԱՎՈՐԻ ՊԱՐՍԿԵՐԵՆ ՄԵՆԱԳՐՈՒԹՅԱՆ ՇՆՈՐՀԱՆԴԵՍԸ
ԵՊՀ արևելագիտություն ֆակուլտետի իրանագիտության ամբիոնում այսօր տեղի են ունեցել ԻԻՀ խորհրդարանի հայազգի պատգամավոր, պատմագիտության դոկտոր Կարեն Խանլարյանի «Հայաստանի աշխարհագրության սահմանումը ըստ իսլամական աղբյուրների» պարսկերեն մենագրության շնորհանդեսը և հեղինակի հետ հանդիպումը։
ՍԱՀՄԱՆՎԵԼ Է ԵՊՀ 2019-2020 ՈՒՍՈՒՄՆԱԿԱՆ ՏԱՐՎԱ ՀԱՄԱՐ ՄԻՋԻՆ ՈՐԱԿԱԿԱՆ ԳՆԱՀԱՏԱԿԱՆԻ (ՄՈԳ) ՇԵՄԸ
ԵՊՀ-ում 2019-2020 ուսումնական տարվա համար միջին որակական գնահատականի (ՄՈԳ) շեմը բակալավրիատում սահմանվել է 11.00-ն, իսկ մագիստրատուրայում՝ 15.00-ն: