15.06.2021 | 
Կրթություն
ԵՊՀ «ԿԻՐԱՌԱԿԱՆ ՄԱՆՐԷԱԲԱՆՈՒԹՅՈՒՆ» ՄԱԳԻՍՏՐՈՍԱԿԱՆ ԾՐԱԳՐՈՒՄ ՆԵՐԱՌՎԱԾ ԵՆ ԳԻՏՈՒԹՅՈՒՆԻՑ ԴԵՊԻ ԱՐՏԱԴՐՈՒԹՅՈՒՆ ՈՒՂՂՈՐԴՈՂ ԴԱՍԸՆԹԱՑՆԵՐ
ԵՊՀ «ԿԻՐԱՌԱԿԱՆ ՄԱՆՐԷԱԲԱՆՈՒԹՅՈՒՆ» ՄԱԳԻՍՏՐՈՍԱԿԱՆ ԾՐԱԳՐՈՒՄ ՆԵՐԱՌՎԱԾ ԵՆ ԳԻՏՈՒԹՅՈՒՆԻՑ ԴԵՊԻ ԱՐՏԱԴՐՈՒԹՅՈՒՆ ՈՒՂՂՈՐԴՈՂ ԴԱՍԸՆԹԱՑՆԵՐ
«Կիրառական մանրէաբանություն» մագիստրոսական ծրագիրը ստեղծվել է աշխատաշուկայի և պահանջվող մասնագիտական հմտությունների ուսումնասիրության հիման վրա: Այն կազմվել է մի շարք առաջատար համալսարանների կենսաբանության և մանրէաբանության մագիստրոսական ծրագրերին համապատասխան։

Մեզ հետ զրույցում մագիստրոսական ծրագրի ղեկավար Կարեն Թռչունյանն ասաց, որ ծրագիրը նպատակ ունի տրամադրելու մասնագիտական խորը գիտելիքներ կիրառական մանրէաբանության և նորարարական տեխնոլոգիաների հիմնարար և կիրառական ասպարեզներում, ինչպես նաև խթանելու ուսանողների նորարարական մտածողությունը՝ կիրառական նշանակության և հետազոտությունների արդյունքների ներդրման ու առևտրայնացման նորարարական առաջարկներ մշակելու համար:

 

Կարեն Թռչունյանն ասաց, որ ծրագիրը ներդրվել է՝ լրացնելու աշխատաշուկայի պահանջարկի այն բացը, որը կա ինչպես աշխարհում, այնպես էլ Հայաստանում. «Այսօր մանրէաբանների խիստ կարիք կա, և մենք փորձում ենք այսօրվա չափանիշներին ու պահանջներին համապատասխան մասնագետներ պատրաստել»:

 

Մինչև ծրագրի գործարկումը՝ Կարեն Թռչունյանն անձամբ այցելել է տարբեր գործարաններ և ծանոթացել պահանջվող այն չափանիշներին, որոնց պետք է բավարարի այսօրվա մանրէաբանը՝ արհեստավարժ և աշխատաշուկայում մրցունակ լինելու համար:

 

«Մագիստրոսական ծրագրի շրջանակում դասավանդվում են այնպիսի առարկաներ, որոնք չեն կրկնվում: Եզակի ծրագրերից է, որտեղ դասավանդվող առարկաների ցանկում ներառված են գիտությունից դեպի արտադրություն ուղղորդող դասընթացներ, ինչպիսիք են օրինակ՝ «Նորարարական տեխնոլոգիաները մանրէաբանական արտադրության մեջ», «Գիտությունից դեպի արտադրություն. փորձ և հեռանկարներ», «Նորարարություն. բիզնեսմոդելավորում և սկզբնավորում («Start Up»)» և այլն»,- ասաց մագիստրոսական ծրագրի ղեկավարը:

 

 

Նրա խոսքով, ծրագրի լաբորատոր աշխատանքներն էլ կազմակերպվում են այնպես, որ մագիստրոսները ձեռք բերեն համապատասխան հմտություններ. «Բացի դրանից՝ նախատեսում ենք որոշ դասընթացներ իրականացնել արտադրական ձեռնարկություններում, որ ուսանողները տեղում ծանոթանան արտադրական գործընթացին և ձեռք բերեն անհրաժեշտ գիտելիքներ»:

 

Կարեն Թռչունյանն ասաց, որ իր նախաձեռնությամբ, ներդրվել է նաև սկզբունք, ըստ որի՝ «Կիրառական մանրէաբանություն» մագիստրոսական ծրագրի շրջանավարտները պետք է ունենան տպագրված գիտական հոդված ազդեցության գործակից ունեցող ամսագրերից որևէ մեկում.«Ի դեպ, այն ուսանողները, որոնց ղեկավարը եղել եմ ես, ազդեցության գործակից ունեցող ամսագրերում ունեն տպագրված երկու գիտական հոդված»:

 

Ըստ Կարեն Թռչունյանի՝ ծրագրի ամենամեծ ձեռքբերումն այն է, որ բոլոր շրջանավարտներն աշխատում են իրենց մասնագիտությամբ. «Այս տարի մեր մագիստրոսական ծրագրում սովորում են առավել մեծ թվով՝ 15 մագիստրոսներ, և հուսով ենք, որ նրանք ևս կգտնեն իրենց տեղն աշխատաշուկայում»:

 

Նա նաև տեղեկացրեց, որ մագիստրոսական ծրագրի շրջանակում համագործակցում են մի շարք գործարանների հետ, ինչը մեծ հնարավորություններ է ստեղծում ուսուցումն առավել արդյունավետ դարձնելու համար:

 

Տեղեկացնենք, որ մագիստրոսական ծրագրին կարող են դիմել բակալավրի կամ դիպլոմավորված մասնագետի որակավորում ունեցող անձինք:

 

Քնար Միսակյան

Այլ նորություններ
ԵՊՀ-ՈՒՄ ԱՄՓՈՓՎԵՑԻՆ «ՄԱՆՐԷՆԵՐԻ ՀԱՏԿՈՒԹՅՈՒՆՆԵՐ. ՆՈՐԱՐԱՐ ԳԱՂԱՓԱՐՆԵՐԻ ՄՐՑՈՒՅԹԻ» ԱՐԴՅՈՒՆՔՆԵՐԸ
Հաղթող ճանաչված թիմերն ստացան դրամական պարգևներ, իսկ մյուս թիմերին ժյուրին առաջարկեց շարունակել զարգացնել ներկայացված գաղափարները, քանի որ դրանք չափազանց արդիական են և կարող են նպաստել կենսաբանության, հատկապես մանրէաբանության ոլորտի առաջընթացին։
ԵՊՀ ԻՐԱՎԱԳԻՏՈՒԹՅԱՆ ԵՎ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏՆԵՐԸ ՆՈՐ ՀՆԱՐԱՎՈՐՈՒԹՅՈՒՆՆԵՐ ԵՆ ՍՏԵՂԾՈՒՄ ՈՒՍԱՆՈՂՆԵՐԻ ՀԱՄԱՐ
«Մեդիա և տեղեկատվական իրավունք» մագիստրոսական ծրագրի շրջանակում ԵՊՀ իրավագիտության ֆակուլտետ այցելեց «Կոնրադ Ադենաուեր» հիմնադրամի Հարավային Կովկասի տարածաշրջանային ծրագրի տնօրենի տեղակալ Մաթիաս Հեսպեն՝ հետագա համագործակցությունների հեռանկարները, ինչպես նաև վերոնշյալ կրթական ծրագրի ուսանողներից երկուսին կրթաթոշակ տրամադրելու հարցը քննարկելու։