26.03.2019 | 
Քաղաքականություն
ՀԱՅ-ԳԵՐՄԱՆԱԿԱՆ ԲՈՒՀԱԿԱՆ ՀԱՄԱԳՈՐԾԱԿՑՈՒԹՅՈՒՆԸ ՏԵՂԱՓՈԽՎՈՒՄ Է ՆՈՐ ՓՈՒԼ. ՀԱՆԴԻՊՈՒՄ ԱԼԲԵՐՏ ՎԱՅԼԵՐԻ ՀԵՏ
ՀԱՅ-ԳԵՐՄԱՆԱԿԱՆ ԲՈՒՀԱԿԱՆ ՀԱՄԱԳՈՐԾԱԿՑՈՒԹՅՈՒՆԸ ՏԵՂԱՓՈԽՎՈՒՄ Է ՆՈՐ ՓՈՒԼ. ՀԱՆԴԻՊՈՒՄ ԱԼԲԵՐՏ ՎԱՅԼԵՐԻ ՀԵՏ
ԵՊՀ իրավագիտության ֆակուլտետն այսօր հյուրընկալել էր Գերմանիայի Բունդեսթագի պատգամավոր և գերմանահայկական ֆորումի նախագահ Ալբերտ Վայլերին, «Կոնրադ Ադենաուեր» հիմնադրամի Հարավային Կովկասի տարածաշրջանի գրասենյակի ղեկավար, դոկտոր Թոմաս Շրապելին, «Կոնրադ Ադենաուեր» հիմնադրամի երևանյան գրասենյակի ղեկավար Լիանա Մարուքյանին և հիմնադրամի գիտաշխատող Քրիստինա Բելմանին:

ԵՊՀ իրավագիտության ֆակուլտետի դեկան Գագիկ Ղազինյանը նախ շնորհակալություն հայտնեց ներկաներին իր հրավերն ընդունելու համար և շեշտեց, որ ֆակուլտետի օրակարգային հարցերից մեկը երկկողմանի համագործակցության ընդլայնումն ու խորացումն է:

«Պետք է նշեմ, որ գերմանական ընկերությունները ֆակուլտետի միջազգային գործընկերների շարքում առանձնահատուկ դեր ունեն, և մեզ համար չափազանց կարևոր է առավել ընդլայնել մեր համագործակցության շրջանակը՝ նոր ոլորտներ ընդգրկելով»,- ասաց Գագիկ Ղազինյանը:



Դեկանը հույս հայտնեց, որ «Կոնրադ Ադենաուեր» հիմնադրամի հետ կհաջողվի նաև իրավական դաշտում համագործակցության եզրեր գտնել:

Բունդեսթագի պատգամավոր Ալբերտ Վայլերն իր հերթին շնորհակալություն հայտնեց հրավերի համար՝ նշելով, որ Երևանում իրեն զգում է այնպես, ինչպես տանը:



Նա առանձնահատուկ կարևորեց համագործակցության դերն ակադեմիական, նաև բուհական դաշտում և շեշտեց կրթության ոլորտում փոխանակման գործընթացի դերը:

«Կրթության ոլորտում փոխանակման ծրագրերն առանձնահատուկ կարևոր են երկու երկրների միջև ավելի սերտ հարաբերություններ հաստատելու համար»,- ասաց պարոն Վայլերը,- «մենք ավելի շատ երիտասարդ ուսանողների փոխանակման կարիք ունենք»:



Երկկողմանի սերտ համագործակցություն սկսելու նպատակով պարոն Վայլերն իր պատրաստակամությունը հայտնեց Յենայի համալսարանի հետ կապ հաստատելու հարցում՝ երկու համալսարանների միջև համագործակցության ուղիների ստեղծմանը նպաստելու համար:



«Իմ կարծիքով, արդյունավետ և ստացված համագործակցության կարևոր բաղադրիչներից մեկը կողմերին անձնապես ճանաչելն է, այդ պատճառով ես շատ եմ կարևորում նմանատիպ հանդիպումների դերը»,- նկատեց Բունդեսթագի պատգամավորը:



Հանդիպման վերջում հյուրերը շրջայց կատարեցին Իրավագիտության ֆակուլտետում, և դեկան Գագիկ Ղազինյանը ներկայացրեց ֆակուլտետի գործունեությունն ու ձեռքբերումները:

 

Անի Պողոսյան

Այլ նորություններ
ՀԱՍՏԻՔԱՑՈՒՑԱԿԻ ՀԱՍՏԱՏՈՒՄ ԵՎ ԿԱՌՈՒՑՎԱԾՔԱՅԻՆ ՓՈՓՈԽՈՒԹՅՈՒՆՆԵՐ. ՏԵՂԻ Է ՈՒՆԵՑԵԼ ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՆԻՍՏԸ
Օրակարգային երեք հարցով տեղի է ունեցել ԵՊՀ հոգաբարձուների խորհրդի նիստը, որն անցկացվել է հարցման կարգով:
ԵՊՀ ՀՈԳԱԲԱՐՁՈՒՆԵՐԻ ԽՈՐՀՐԴԻ ՔԱՐՏՈՒՂԱՐԸ ՊԱՐԶԱԲԱՆՈՒՄ Է. ԵՊՀ ԿԱՆՈՆԱԴՐՈՒԹՅՈՒՆԸ ՉԻ ԽԱԽՏՎԵԼ
ԵՊՀ ուսանողների հետ տարվող աշխատանքների կենտրոնի լուծարման հետ կապված այսօր հնչել է կարծիք, որ Հոգաբարձուների խորհրդի գումարվող նիստը խախտում է ԵՊՀ կանոնադրությունը՝ հակասելով «Երևանի պետական համալսարան» հիմնադրամի կանոնադրության 49-րդ հոդվածի 2-րդ կետին։