21.02.2019 | 
Քաղաքականություն
2022 ԹՎԱԿԱՆԻՆ ԿՐԹԱԿԱՆ ՀԵՏԱԶՈՏՈՒԹՅՈՒՆՆԵՐԻ ԵՎՐՈՊԱԿԱՆ ԱՍՈՑԻԱՑԻԱՅԻ ՏԱՐԵԿԱՆ ԿՈՆԳՐԵՍԸ ԱՆՑԿԱՑՎԵԼՈՒ Է ԵՊՀ-ՈՒՄ
2022 ԹՎԱԿԱՆԻՆ ԿՐԹԱԿԱՆ ՀԵՏԱԶՈՏՈՒԹՅՈՒՆՆԵՐԻ ԵՎՐՈՊԱԿԱՆ ԱՍՈՑԻԱՑԻԱՅԻ ՏԱՐԵԿԱՆ ԿՈՆԳՐԵՍԸ  ԱՆՑԿԱՑՎԵԼՈՒ Է ԵՊՀ-ՈՒՄ
ԵՊՀ ռեկտոր Արամ Սիմոնյանն այսօր հյուրընկալեց Կրթական հետազոտությունների եվրոպական ասոցիացիայի նախագահ Ջո Օհարային և ԿՀԵԱ գրասենյակի ղեկավար Անգելիկա Վեգշայդերին:

Հանդիպման նախաձեռնությունը Մանկավարժության և կրթության զարգացման կենտրոնինն էր, որը Կրթական հետազոտությունների եվրոպական ասոցիացիայի անդամ է 2014 թվականից:  

 

Հանդիպմանը ներկա էին Միջազգային համագործակցության վարչության պետ Ալեքսանդր Մարգարովը, Մանկավարժության և կրթության զարգացման կենտրոնի տնօրեն Նազիկ Հարությունյանը և կենտրոնի դոցենտ Աննա Ալեքսանյանը:

 

Հանդիպման սկզբում ԵՊՀ ռեկտոր Արամ Սիմոնյանը հյուրերին ներկայացրեց  բուհի կառուցվածքը, գործունեությունը:

 

Քննարկման առանցքում  Կրթական հետազոտությունների եվրոպական ասոցիացիայի տարեկան կոնգրեսի անցկացումն էր ԵՊՀ-ում, որը տեղի է ունենալու 2022 թվականին:

 

Հյուրերն անդրադարձան կոնֆերանսի անցկացմանը վերաբերող տեխնիկական մի շարք հարցերի, հետաքրքրվեցին կոնֆերանսի կազմակերպման համար նախատեսված դահլիճներով, նստարանների քանակով և տեխնիկական այլ պայմանններով:


 

Երկու կողմերի համար էլ կարևոր է ապագա կոնֆերանսը անցկացնել բարձր մակարդակով, ուստի վերջինիս անցկացման բոլոր չափանիշներն ու սկզբունքները պետք է ամրագրվեն պայմանագրերով:

 

Մանկավարժության և կրթության զարգացման կենտրոնի տնօրեն Նազիկ Հարությունյանի խոսքով, ապագայում կայանալիք կոնֆերանսը երիտասարդ գիտնականներին փոխճանաչման  և փոխհարստացման հնարավարություն է տալու. «Անհրաժեշտ է, որ ժամանակ առ ժամանակ երիտասարդ գիտնական- մանկավարժները հանդիպեն, քննարկեն և հասկանան, թե որտեղ ինչ խնդիրներ կամ ձեռքբերումներ կան, կամ որտեղ կա առաջավոր փորձ»,- նշեց գիտնականը և հավելեց: - «Սա մեծ նպաստ է բերելու թե՛ համալսարանին, թե՛ Մանկավարժության և կրթության զարգացման կենտրոնին. մենք հնարավորություն ենք ունենալու հաղորդակցվել արտասահմանցի գործընկերների հետ և իրականացնել փորձի փոխանակում»:




Հանդիպման ավարտին Կրթական հետազոտությունների եվրոպական ասոցիացիայի նախագահ Ջո Օհարան և ԿՀԵԱ գրասենյակի ղեկավար Անգելիկա Վեգշայդերը շրջեցին ԵՊՀ տարածքով, ծանոթացան աշխատանքներին, եղան լսարաններում, գրադարաններում և գոհունակությամբ հայտնեցին, որ ԵՊՀ-ն պատրաստակամ է անցկացնելու կոնֆերանսը:

 

Նշենք, որ 2022 թ. կայանալիք կոնֆերանսին կամավորության սկզբունքով պետք է ներգրավվեն 100   ուսանողներ:

 

Տեղեկացնենք, որ ամեն տարի  կոնֆերանսն  անցկացվում է անդամ երկրներից որևէ մեկում և համախմբում է 35 երկրներից միջինը 3000 հետազոտողի: 


Անգին Խաչատրյան

 

Այլ նորություններ
ԿԱԴՐԱՅԻՆ, ԿԱՌՈՒՑՎԱԾՔԱՅԻՆ, ԳՈՐԾԱՌՆԱԿԱՆ ՈՒ ԸՆԹԱՑԱԿԱՐԳԱՅԻՆ ՓՈՓՈԽՈՒԹՅՈՒՆՆԵՐԻ ՊԱՀԱՆՋ. ՏԵՂԻ ՈՒՆԵՑԱՎ ՌԵԿՏՈՐԱՏԻ ԸՆԴԼԱՅՆՎԱԾ ՆԻՍՏ
ԵՊՀ գիտխորհրդի նիստերի դահլիճում այսօր տեղի ունեցավ ռեկտորատի ընդլայնված նիստը, որի ընթացքում ԵՊՀ ռեկտորն անդրադարձավ մի շարք հարցերի:
«ԵՊՀ-Ն ԵՐԲԵՎԷ ԱՅՆՊԻՍԻ ՖԻՆԱՆՍԱԿԱՆ ԿԱՅՈՒՆՈՒԹՅՈՒՆ ՉԻ ՈՒՆԵՑԵԼ, ԻՆՉՊԵՍ ԱՅՍՕՐ». ԵՊՀ ՌԵԿՏՈՐԸ ՊԱՏԱՍԽԱՆԵՑ ԼՐԱԳՐՈՂՆԵՐԻ ՀԱՐՑԵՐԻՆ
ԵՊՀ հոգաբարձուների խորհրդի նիստից հետո ԵՊՀ ռեկտոր Արամ Սիմոնյանը հանդիպեց լրագրողների հետ և պատասխանեց նրանց հարցերին: