07.05.2019 | 
Կրթություն
ՈՒՍԱՆՈՂՆԵՐԻՆ ՆԵՐԿԱՅԱՑՎԵՑԻՆ ԲՈՒՐԳՈՒՆԴԻԱՅԻ ՖՐԱՆՇ-ԿՈՄՏԵ ՀԱՄԱԼՍԱՐԱՆՈՒՄ ԴԱՍԱՎԱՆԴՎՈՂ ՄԱԳԻՍՏՐՈՍԱԿԱՆ 16 ԾՐԱԳՐԵՐԸ
ՈՒՍԱՆՈՂՆԵՐԻՆ ՆԵՐԿԱՅԱՑՎԵՑԻՆ ԲՈՒՐԳՈՒՆԴԻԱՅԻ ՖՐԱՆՇ-ԿՈՄՏԵ ՀԱՄԱԼՍԱՐԱՆՈՒՄ ԴԱՍԱՎԱՆԴՎՈՂ ՄԱԳԻՍՏՐՈՍԱԿԱՆ 16 ԾՐԱԳՐԵՐԸ
Եվրոպական ուսումնասիրությունների կենտրոնում այսօր կազմակերպվել էր հանդիպում Ֆրանսիայի Բուրգունդիայի Ֆրանշ-Կոմտե համալսարանի (UBFC) ներկայացուցիչների հետ:

Նշենք, որ միջոցառումը կազմակերպել էր Միջազգային համագործակցության վարչությունը:

 

Ֆրանսիայի Բուրգունդիայի Ֆրանշ-Կոմտե համալսարանի (UBFC) պրոֆեսոր, միջազգային մագիստրոսական ծրագրերի և դրամաշնորհների պատասխանատու    Եվգենյա Փաշայան-Լեզուան ներկայացրեց իրենց համալսարանում անգլերենով դասավանդվող մագիստրոսական 16 ծրագրերը: Նա նշեց, որ անգլերենին գերազանց տիրապետող և բակալավրիատն ավարտած ուսանողներին կտրամադրվի կրթաթոշակ: Եվգենյա Փաշայան-Լեզուան նաև պատմեց, թե հայ ուսանողները ինչպես կարող են դիմել իրենց համալսարան՝ ուսումը շարունակելու և կրթաթոշակ ստանալու նպատակով: «Մենք մեր համալսարանի ուսանողներին աջակցում ենք յուրաքանչյուր հարցում՝ կեցության, վիզա ստանալու և այլն»,- ասաց նա:

 

Ֆրանսիայի Բուրգունդիայի Ֆրանշ-Կոմտե համալսարանի (UBFC) դասախոս Կլոդ Լեղուան պատմեց իրենց համալսարանի «Ֆիզիկա, ֆոտոնիկա և նանոտեխնոլոգիաներ» մագիստրոսական ծրագրի մասին:

 

Կլոդ Լեղուան նշեց, որ «Ֆիզիկա, ֆոտոնիկա և նանոտեխնոլոգիաներ» մագիստրոսական ծրագրի տևողությունը երկու տարի է. ուսանողները մեկ տարի ուսումնասիրում են տեսական դասընթացներ, իսկ երկրորդ տարվա ընթացքում միջազգային գիտահետազոտական լաբորատորիաներում կատարում են գիտական հետազոտություններ: Այս մագիստրոսական ծրագրի շրջանակում լավագույն ուսանողները ստանում եմ դրամաշնորհ, իսկ մագիստրատուրայի լավագույն շրջանավարտները հնարավորություն են ստանում ուսումը շարունակելու նաև Բուրգունդիա Ֆրանշ-Կոմտե համալսարանի ասպիրանտուրայում:

 

Եվգենյա Փաշայան-Լեզուայի խոսքով, իրենց համալսարանի մագիստրոսական ծրագրում սովորելու ընթացքում հայ ուսանողները ցուցաբերել են բարձր առաջադիմություն: «Ես հպարտանում եմ հայ ուսանողներով, քանի որ նրանք միշտ մի քանի քայլ առաջ են և գերազանցում են մյուս ուսանողներին թե՛ իրենց գիտելիքներով, թե՛ անգլերեն լեզվի գերազանց իմացությամբ: Նրանք ուսման մեջ այնքան լավ առաջադիմություն են ունենում, որ մեր համալսարանն առաջարկում է ուսումը շարունակել նաև ասպիրանտուրայում»,- հավելեց նա:

 

Նրա խոսքով, անցյալ ուստարում Ֆրանսիայի Բուրգունդիայի Ֆրանշ-Կոմտե համալսարանի տարբեր ֆակուլտետներ է ընդունվել 14 հայ ուսանող: «Այս ուստարվա համար մեր համալսարան են դիմել արդեն մի քանի հայ ուսանողներ և ակնկալում ենք, որ նրանց թիվը մինչ այս ուստարվա վերջում կավելանա»,- ասաց նա և հավելեց, որ այժմ իրենց համալսարանում կան մի քանի հայ ուսանողներ, որոնք իրենց կրթությունը շարունակում են նաև ասպիրանտուրայում:

 

Նադեժդա Տեր-Աբրահամյան 

 

 

 

Այլ նորություններ
ԵՊՀ-ՈՒՄ ՏԵՂԻ Է ՈՒՆԵՑԵԼ ԻԻՀ ԽՈՐՀՐԴԱՐԱՆԻ ՀԱՅԱԶԳԻ ՊԱՏԳԱՄԱՎՈՐԻ ՊԱՐՍԿԵՐԵՆ ՄԵՆԱԳՐՈՒԹՅԱՆ ՇՆՈՐՀԱՆԴԵՍԸ
ԵՊՀ արևելագիտություն ֆակուլտետի իրանագիտության ամբիոնում այսօր տեղի են ունեցել ԻԻՀ խորհրդարանի հայազգի պատգամավոր, պատմագիտության դոկտոր Կարեն Խանլարյանի «Հայաստանի աշխարհագրության սահմանումը ըստ իսլամական աղբյուրների» պարսկերեն մենագրության շնորհանդեսը և հեղինակի հետ հանդիպումը։
ՍԱՀՄԱՆՎԵԼ Է ԵՊՀ 2019-2020 ՈՒՍՈՒՄՆԱԿԱՆ ՏԱՐՎԱ ՀԱՄԱՐ ՄԻՋԻՆ ՈՐԱԿԱԿԱՆ ԳՆԱՀԱՏԱԿԱՆԻ (ՄՈԳ) ՇԵՄԸ
ԵՊՀ-ում 2019-2020 ուսումնական տարվա համար միջին որակական գնահատականի (ՄՈԳ) շեմը բակալավրիատում սահմանվել է 11.00-ն, իսկ մագիստրատուրայում՝ 15.00-ն: