26.01.2021 | 
Հասարակություն
«ԵՊՀ-Ն ԿՐԹՈՒԹՅԱՆ ԵՎ ԳԻՏՈՒԹՅԱՆ ԼՈԿՈՄՈՏԻՎՆ Է». ԿԳՄՍ ՆԱԽԱՐԱՐԸ ՊԱՏԱՍԽԱՆԵԼ Է ՀԱՄԱԼՍԱՐԱՆԱԿԱՆՆԵՐԻ ՀԱՐՑԵՐԻՆ
«ԵՊՀ-Ն ԿՐԹՈՒԹՅԱՆ ԵՎ ԳԻՏՈՒԹՅԱՆ ԼՈԿՈՄՈՏԻՎՆ Է». ԿԳՄՍ ՆԱԽԱՐԱՐԸ ՊԱՏԱՍԽԱՆԵԼ Է ՀԱՄԱԼՍԱՐԱՆԱԿԱՆՆԵՐԻ ՀԱՐՑԵՐԻՆ
ՀՀ ԿԳՄՍ նախարար Վահրամ Դումանյանն այսօր այցելել էր ԵՊՀ: Նախարարը հարազատ բուհ էր եկել պրոֆեսոր Արմեն Թռչունյանին հայրենիքին մատուցած ծառայությունների համար հետմահու 1-ին աստիճանի մեդալով պարգևատրելու համար:

«ԵՊՀ կրթության և գիտության լոկոմոտիվն է, որն առնվազն 100 տարվա ավանդույթների պատմություն ունի: Այդ ավանդույթները ձևավորում ենք մենք բոլորս՝ մեր գործունեությամբ և կեցվածքով: Եվ այսօր ինձ համար մեծ պատասխանատվություն է, քանի որ առաջին անգամ եմ հարազատ բուհ այցելում որպես նախարար, սակայն ընդգծեմ, որ ես ձեզնից մեկն եմ»,- նշեց Վահրամ Դումանյանը:

 

Հանդիսավոր արարողության ավարտին Վահրամ Դումանյանը պատասխանեց գործընկերների մի շարք հարցերին, որոնք բավականին ընդգրկուն էին՝ Լեռնային Ղարաբաղի 2-րդ պատերազմի ընթացքում զոհված համալսարանական ուսանողների՝ պետության կողմից փոխհատուցվող վարձավճարների հարցից մինչև տարկետում:

 

 

ԵՊՀ ՈՒԽ նախագահ Դավիթ Ափոյանը Վահրամ Դումանյանին խնդրեց պարզաբանել, թե ինչպես պետք է ուսանողներն ապացուցեն, որ մասնակցել են մարտական գործողություններին, եթե վերջիններիս զինգրքույկում որևէ նշում չկա այդ մասին: Արդյունքում ուսանողները չեն կարողանում օգտվել ՀՀ կառավարության կողմից ներկայացված աջակցության ծրագրից:

 

Նախարարը նշեց, որ խնդիրը մանրամասն քննարկվել է պետական տարբեր ատյաններում, սակայն արդյունքում որոշվել է որպես հիմք ընդունել հենց զինգրքույկում առկա նշումները. «Իրականում շատ բարդ հարց է, սակայն, որքան էլ ցավալի լինի, ներկայումս կոնկրետ ճանապարհներ չեմ կարող առաջարկել խնդրի լուծման համար: Իսկ զորացրվածների պարագայում խնդիրը լուծված կլինի, քանի որ բուհ վերադարձողների զինգրքույկների մեջ կոնկրետ նշումներ կլինեն»:

 

ԵՊՀ ռադիոֆիզիկայի ֆակուլտետի դեկան Խաչատուր Ներկարարյանն էլ բարձրաձայնեց տարկետում տրամադրելու հարցը, որի նախարարը պատասխանեց բավականին հակիրճ. «Տարկետման հարցը միշտ էլ իմ ուշադրության կենտրոնում է: Ինչպես նախկինում, ներկայումս էլ դեմ եմ տարկետման իրավունքի գործող կարգին: Սակայն հարցի շուրջ քննարկումները դեռ չեն ավարտվել»:

 

Համալսարանականներն անդրադարձան նաև կրթության և գիտության ոլորտում կատարվող մի շարք փոփոխություններ ենթադրող նախագծերին ու որոշումներին, որոնք որոշակի դժվարություններ են ստեղծում կրթական գործընթացի կազմակերպման գործում:

Նախարարը մանրամասն խոսեց բոլոր խնդիրների մասին և վստահեցրեց, որ համալսարանականներին անհանգստացնող հարցերի վերաբերյալ քննարկումները շարունակվում են ու կարվի հնարավոր ամեն ինչ՝ բուհերին չվնասելու համար:

 

Վարդուհի Զաքարյան

 

Այլ նորություններ
ԳԵՎՈՐԳ ԱՐՇԱԿՅԱՆԸ «ՄԱՐՏԱԿԱՆ ԽԱՉ» 1-ԻՆ ԱՍՏԻՃԱՆԻ ՇՔԱՆՇԱՆԱԿԻՐ Է
Արցախի Հանրապետության նախագահ Արայիկ Հարությունյանի որոշմամբ, ԵՊՀ շրջանավարտ, ավագ լեյտենանտ, Արցախյան երկրորդ պատերազմին մասնակցած և Շուշիի պաշտպանության համար հերոսաբար զոհված Գևորգ Արշակյանը պարգևատրվել է «Մարտական խաչ» 1-ին աստիճանի շքանշանով, որն այսօր ԵՊՀ ռեկտորի ժ.պ. Գեղամ Գևորգյանը փոխանցել է նրա ընտանիքին:
«ՈՒԺԵՂ ՊԵՏՈՒԹՅԱՆ ՀԻՄՔՈՒՄ ՀԶՈՐ ԳԻՏՈՒԹՅՈՒՆՆ Է». ՄՀԵՐ ԽԱՉԱՏՐՅԱՆ
ԵՊՀ ֆիզիկայի ֆակուլտետի 4-րդ կուրսի ուսանող Մհեր Խաչատրյանը ԿԳՄՍ նախարարության կազմակերպած «Հանրապետության լավագույն ուսանող-2020» մրցույթի հաղթողներից է: Մեքենայական ուսուցման ոլորտում մասնագիտացող Մհերի հետ զրուցել ենք մասնագիտության ընտրության, դրա հեռանկարների, կրթության ու գիտության զարգացմանն ուղղված քայլերի մասին: