12.12.2018 | 
Մշակույթ
«ԶՈՀԱԲԵՐՈՒՄ ԵՆ ԼԱՎԱԳՈՒՅՆԻՆ, ԳԵՂԵՑԻԿԻՆ, ԱՆՄԵՂԻՆ, ՔԱՆԻ ՈՐ ՓՈՔՐՈԳԻ, ՃՂՃԻՄ ՄԱՐԴԸ ՆԱԽԱՆՁՈՎ Է ԼՑՎՈՒՄ ԴՐԱՆՑ ՀԱՆԴԵՊ». ՑՈՒՑԱԴՐՎԵՑԻՆ «ՍՊԻՏԱԿ ԳԱՌԱՆ ԵՐԱԶԸ» ԵՎ «ԼՈՒՅՍԻ ՁԱՅՆԵՐ» ՖԻԼՄԵՐԸ
«ԶՈՀԱԲԵՐՈՒՄ ԵՆ ԼԱՎԱԳՈՒՅՆԻՆ, ԳԵՂԵՑԻԿԻՆ, ԱՆՄԵՂԻՆ, ՔԱՆԻ ՈՐ ՓՈՔՐՈԳԻ, ՃՂՃԻՄ ՄԱՐԴԸ ՆԱԽԱՆՁՈՎ Է ԼՑՎՈՒՄ ԴՐԱՆՑ ՀԱՆԴԵՊ». ՑՈՒՑԱԴՐՎԵՑԻՆ «ՍՊԻՏԱԿ ԳԱՌԱՆ ԵՐԱԶԸ» ԵՎ «ԼՈՒՅՍԻ ՁԱՅՆԵՐ» ՖԻԼՄԵՐԸ
Հրանտ Վարդանյանի «Սպիտակ գառան երազը» և «Լույսի ձայներ» ֆիլմերն այսօր ցուցադրվեցին ԵՊՀ մշակույթի կենտրոնում:

Ցուցադրությանը ներկա էին ֆիլմերի ռեժիսոր Հրանտ Վարդանյանը, «Սպիտակ գառան երազը» ֆիլմի օպերատոր Վահագն Տեր-Հակոբյանը, «Լույսի ձայներ» ֆիլմի օպերատոր Արեգ Հակոբյանը, «Հայաստանի փոքրիկ երգիչներ»  երգչախմբի գեղարվեստական ղեկավար, խմբավար, մանկավարժ Տիգրան Հեքեքյանը, նկարիչ Աշոտ Համբարձումյանը:

 

15 րոպե տևողությամբ «Սպիտակ գառան երազը» ֆիլմի առանցքում զոհաբերության թեման է: Ֆիլմը ստեղծված է գրոտեսկային տրագիֆարս ժանրային ձևաչափով:

 

Ֆիլմի գլխավոր հերոսը Բեբեն անունով սպիտակ գառն է, որին մարդիկ ցանկանում են զոհաբերել: Զոհաբերման երազի այս տեսարանով էլ սկսվում է ֆիլմը: Սպիտակ գառը հավատում է իրեն սնած և պահած հովվին ու հույս ունի, որ հովիվը թույլ չի տա՝ իրեն զոհաբերեն: Սակայն իրականությունն այլ է. հովիվը գառանը վաճառում է 30 հազար դրամով, ինչպես Հուդան դավաճանում է Հիսուսին 30 արծաթով: 

 

Ահա, երեսունի խորհրդանշանով, սպիտակ գառով, երազով և հասարակության անդրադարձով էլ  խտանում է ֆիլմի գաղափարը: 

 

Ռեժիսորի խոսքով, ֆիլմի գաղափարը ծնվել է ակնթարթորեն. «Ես համաձայն չեմ ստրկացման այս երևույթին: Ոչ-ոք իրավունք չունի որևէ մեկին զոհաբերելու, քանի որ և՛ մարդիկ, և՛ կենդանիները ազատ են»:

 

Ի հավելումն այդ մտքի՝ Տիգրան Հեքեքյանն ընդգծեց. «Զոհաբերում են լավագույնին, գեղեցիկին, անմեղին, քանի որ փոքրոգի, ճղճիմ մարդը նախանձով է լցվում դրանց հանդեպ»:

 

Գեղարվեստական կարճամետրաժ ֆիլմի ուղերձն է վերանայել բարոյական արժեքներն ու պատկերացումները, ինչպես նաև մարդ-կենդանի, մարդ-բնություն հարաբերությունները։

«Լույսի ձայներ» ֆիլմը պատմում է «Հայաստանի փոքրիկ երգիչներ» երգչախմբի մասին:

Ֆիլմում ներկայացվում է երգչախմբի  շրջագայությունները, հաջողությունները, ինչպես նաև խմբավար ու մանկավարժ Տ. Հեքեքյանի կատարած աշխատանքները:

 

Ըստ էության՝ երգչախմբի անդամները լույսեր են, որոնք սփռված են ամենուրեք և լույս են բաշխում մարդկանց:

 

Ֆիլմերը տպավորեցին ներկաներին: 

 

Ցուցադրությանը ներկա ԵՊՀ ԻԿՄ ֆակուլտետի 2-րդ կուրսի ուսանող Մարատ Սարգսյանի խոսքով, այս կարճամետրաժ ֆիլմերը ստիպեցին մտածել, երազել, հուզվել, ծիծաղել, և որ ամենակարևորն է՝ ապրել:

Անգին Խաչատրյան

 

Այլ նորություններ
«ԵԹԵ ՉԼԻՆԵԻՆ  ԴԺՎԱՐՈՒԹՅՈՒՆՆԵՐԸ ԵՎ ԴՐԱՆՔ ՀԱՂԹԱՀԱՐԵԼՈՒ ԻՄ ՆԵՐՔԻՆ ՄՂՈՒՄԸ, ԱՊԱ ԵՍ ՉԷԻ ԼԻՆԻ ԱՅՆ, ԻՆՉ ՀԻՄԱ ԿԱՄ». ՏԻԳՐԱՆ ՄԱՆՍՈՒՐՅԱՆԸ ԵՊՀ ՈՒՍԱՆՈՂՆԵՐԻ ՀՅՈՒՐՆ ԷՐ
ԵՊՀ Չարենցի անվան դահլիճում այսօր հյուրընկալվեց կոմպոզիտոր, ՀԽՍՀ ժողովրդական արտիստ, ՀԽՍՀ արվեստի վաստակավոր գործիչ Տիգրան Մանսուրյանը:
«ԵՍ ԳՆՈՒՄ ԵՄ ՏԻՐՈՋ ՄՈՏ ՈՒ ՀԵՏՍ  ԾԱՂԻԿՆԵՐ ԵՄ ՏԱՆՈՒՄ». ՀԱՅՐԻԿ ՄՈՒՐԱԴՅԱՆ՝ ՀԱՅ ԵՐԳԻ «ՀԱՅՐԻԿ», ՎԱՐՊԵՏ ՈՒ ՆՎԻՐՅԱԼ
ԵՊՀ մշակույթի կենտրոնի դահլիճում այսօր տեղի ունեցավ ազգագրագետ, բանահավաք, ազգային մշակույթի նվիրյալ Հայրիկ Մուրադյանի 114-ամյակին նվիրված միջոցառում: