10.04.2018 | 
Քաղաքականություն
«ԼՍԱՐԱՆՈՒՄ ՍՏԱՑԱԾ ԳԻՏԵԼԻՔԸ ԵՊՀ ՈՒՍԱՆՈՂՆ ԱՄՐԱՊՆԴՈՒՄ Է ԺԱՄԱՆԱԿԱԿԻՑ ԼԱԲՈՐԱՏՈՐԻԱՆԵՐՈՒՄ». ՀԱՆԴԻՊՈՒՄ ՀՐԱԶԴԱՆԻ ԹԻՎ 13 ԱՎԱԳ ԴՊՐՈՑԻ ԱՇԱԿԵՐՏՆԵՐԻ ՀԵՏ
«ԼՍԱՐԱՆՈՒՄ ՍՏԱՑԱԾ ԳԻՏԵԼԻՔԸ ԵՊՀ ՈՒՍԱՆՈՂՆ ԱՄՐԱՊՆԴՈՒՄ Է ԺԱՄԱՆԱԿԱԿԻՑ ԼԱԲՈՐԱՏՈՐԻԱՆԵՐՈՒՄ». ՀԱՆԴԻՊՈՒՄ ՀՐԱԶԴԱՆԻ ԹԻՎ 13 ԱՎԱԳ ԴՊՐՈՑԻ ԱՇԱԿԵՐՏՆԵՐԻ ՀԵՏ
«ԵՊՀ ֆարմացիայի ինստիտուտը տարածաշրջանում ունի լավագույն հնարավորությունները բարձրորակ մասնագետներ պատրաստելու համար: Ֆարմացիայի բոլոր ուղղություններով գործնական աշխատանքներ կատարելու համար ստեղծված են ժամանակակից պայմաններ: Լսարանում ստացած գիտելիքն ուսանողն ամրապնդում է ժամանակակից լաբորատորիաներում»,- Հրազդանի թիվ 13 ավագ դպրոցում աշակերտների հետ հանդիպման ժամանակ ասաց ԵՊՀ ֆարմացիայի ինստիտուտի տնօրեն Աշոտ Սաղյանը:

Նշենք, որ այսօր Մայր բուհի պրոֆեսորադասախոսական կազմի ներկայացուցիչներն այցելել են  Հրազդանի թիվ 13 ավագ դպրոց: Հանդիպման նպատակն էր նպաստել ավարտական դասարանների աշակերտների մասնագիտական կողմնորոշմանը, իրազեկության մակարդակի բարձրացմանը, ինչպես նաև  դեպի ԵՊՀ ուղղորդելուն: Հանդիպումը կազմակերպել  էր ԵՊՀ մինչհամալսարանական կրթության վարչությունը:

 

Հանդիպման ընթացքում Ա. Սաղյանը ներկայացրեց ինստիտուտի կրթական և գիտական գործունեության, նորարարական ծրագրերի մասին: «Մեր ինստիտուտում տեսական գիտելիքներին զուգակցվում են հետազոտական աշխատանքները: Մեզ մոտ ուսանողներն ոչ միայն տեսական գիտելիքներ են ստանում, այլև մեր լաբորատորիաներում կիրառում են իրենց հմտությունները: Դիմորդներն ինստիտուտն ավարտելուց հետո դառնում են պատրաստի մասնագետներ, որոնք առանց դժվարությունների աշխատաշուկայում գտնում են իրնեց տեղը»,-հավելեց նա:

 

ԵՊՀ ֆարմացիայի ինստիտուտի տնօրենը նաև հայտնեց, որ ինստիտուտի լաբորատորիայում ուսանողն իր ձեռքով դեղահաբ և դեղապատիճ է պատրաստում, իսկ նախկինում ուսանողները գործնական պարապմունքների համար գնում էին դեղագործական տարբեր ընկերություններ:  «Ուսանողը ԵՊՀ ֆարմացիայի ինստիտուտն ավարտելուց հետո ստանում է դեղագետի որակավորում, որն աշխատաշուկայում մեծ պահանջարկ ունի: Դա է վկայում այն փաստը, որ մեր բոլոր շրջանավարտներն աշխատում են իրենց մասնագիտությամբ»,- փաստեց Ա. Սաղյանը:

 

         

Հրազդանի թիվ 13 ավագ դպրոցում աշակերտների հետ հանդիպմանը մասնակցել են ԵՊՀ ֆարմացիայի ինստիտուտի, կենսաբանության, արևելագիտության, պատմության, մաթեմատիկայի և մեխանիկայի ֆակուլտետների պրոֆեսորադասախոսական կազմի ներկայացուցիչները:

 

ԵՊՀ պատմության ֆակուլտետի դոցենտ Մարինե Գևորգյանն էլ աշակերտների հետ զրույցում անդրադարձավ Առաջին Հանրապետության հռչակման, ներքին և արտաքին քաղաքական հիմնախնդիրներին:  «Ես տպավորված եմ ավագ դպրոցի աշակերտների գիտելիքներով: Հանդիպումները վկայում են, որ մարզերի դպրոցների աշակերտներն ունեն գիտելիքների հարուստ պաշար, ուղղակի անհրաժեշտ է նրանց օգնել մասնագիտական կողմնորոշման հարցերում, ուղղորդել աշխատաշուկայում պահանջարկ ունեցող մասնագիտությունների գծով» ,-հավելեց նա:

 

Նադեժդա Տեր-Աբրահամյան

Այլ նորություններ
ՀԱՄԱԼՍԱՐԱՆԱԿԱՆՆԵՐՆ ԱՅՑԵԼԵԼ ԵՆ ԱԶԳԱՅԻՆ ՀԵՐՈՍ ԹԱԹՈՒԼ ԿՐՊԵՅԱՆԻ ՀԱՅՐԵՆԻ ԳՅՈՒՂ
«Դասը վարում են համալսարանականները» ծրագրի շրջանակում ԵՊՀ մինչհամալսարանական կրթության վարչությունը կազմակերպել էր այցելություն Արագածոտնի մարզի Թաթուլ գյուղի միջնակարգ դպրոց, ինչպես նաև Հայաստանի Ազգային հերոս, ԵՊՀ զոհված ուսանող-ազատամարտիկ Թաթուլ Կրպեյանի տուն-թանգարան:
ԵՊՀ-ՈՒՄ ՆՇՎԵՑ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏԻ 50-ԱՄՅԱԿԸ
ԵՊՀ արևելագիտության ֆակուլտետը նշում է հիմնադրման 50-ամյակը, ինչի առթիվ նոյեմբերի 9-10-ը կազմակերպում է Հայկական արևելագիտական առաջին միջազգային կոնգրեսը (ACOS’18):