30.11.2018 | 
Կրթություն
ՎԵՃԵՐ, ՈՐՈՆՔ ԼՈՒԾՎՈՒՄ ԵՆ ՄԽԻԹԱՐ ԳՈՇԻ «ԴԱՏԱՍՏԱՆԱԳՐՔԻ» ՀԻՄԱՆ ՎՐԱ. ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ ՏԵՂԻ ՈՒՆԵՑԱՎ ԴԱՏԱԽԱՂ
ՎԵՃԵՐ, ՈՐՈՆՔ ԼՈՒԾՎՈՒՄ ԵՆ ՄԽԻԹԱՐ ԳՈՇԻ «ԴԱՏԱՍՏԱՆԱԳՐՔԻ» ՀԻՄԱՆ ՎՐԱ. ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ ՏԵՂԻ ՈՒՆԵՑԱՎ ԴԱՏԱԽԱՂ
ԵՊՀ իրավագիտության ֆակուլտետի պետության և իրավունքի տեսության ու պատմության ամբիոնի և ՈՒԽ-ի նախաձեռնությամբ այսօր տեղի ունեցավ հերթական դատախաղը՝ նախատեսված առաջին կուրսեցիների համար:

Դատախաղը կազմակերպվել էր «Հայաստանի պետության և իրավունքի պատմություն» դասընթացի շրջանակում: Մեզ հետ զրույցում Պետության և իրավունքի տեսության ու պատմության և Սահմանադրական իրավունքի ամբիոնի դասախոս Տիգրան Նաղդալյանը փաստեց, որ դատախաղի հիմքում Մխիթար Գոշի «Դատաստանագրքով» առաջադրված որոշակի իրավիճակ է:

 

«Դասընթացի շրջանակում մանրամասն ուսումնասիրվում է Գոշի «Դատաստանագիրքը»՝ որպես իրավական կարևորագույն աղբյուր: Այս դատախաղի շնորհիվ հնարավորություն ենք տալիս ուսանողներին գործնականում կիրառելու ստացած տեսական գիտելիքները, ինչպես նաև մեզ համար պարզաբանում ենք, թե ինչ չափով են ուսանողներն ընկալել ու հասկացել մատուցված նյութը»,- ասաց Տիգրան Նաղդալյանը:

 

Դատախաղի գործը վերաբերում էր ամուսնաընտանեկան հարաբերություններին՝ կնոջ և ամուսնու միջև ծագած գույքային և անձնական ոչ գույքային իրավունքներին: Թիմերը բաժանվել էին հայցվոր և պատասխանող կողմերի: Չորսական փաստաբաններ համապատասխանաբար ներկայացնում էին հայցվորին և պատասխանողին: Դատախաղի բեմադրության մեջ ընդգրկված էին նաև ամուսինն ու կինը: Դատավորների կազմը նույնպես բաղկացած էր ուսանողներից, որոնք վերջնական որոշում կայացնելիս պետք է առաջնորդվեին Գոշի «Դատաստանագրքով»:

 

Տիգրան Նաղդալյանի հավաստմամբ՝ դատախաղերն օգնում են ուսանողներին նոր գիտելիքներ յուրացնելու առումով. «Մասնավորապես այսօրվա դատախաղին պատրաստվելիս ուսանողները բավականին մանրամասն ուսումնասիրել են «Դատաստանագիրքը», որը իրավական կարևորագույն աղբյուր է»: Դասախոսը փաստեց նաև, որ ուսանողների շրջանում մեծ հետաքրքրություն կա նման ձևաչափի միջոցառումների նկատմամբ. «Առաջին կուրսեցիների մեկ այլ խումբ արդեն պատրաստվում է մեր դասի շրջանակում կրկին իրականացնել դատախաղ»:

 

Իրավագիտության ֆակուլտետի 3-րդ կուրսի ուսանողուհի, ՈՒԽ իրավական հանձնաժողովի փոխնախագահ Կարոլինա Հարությունյանը մեզ հետ զրույցում ասաց, որ դատախաղերն անպայման շարունակական են լինելու և օգնելու են ուսանողներին յուրացնել նոր գիտելիքներ ու հմտություններ:

 

Քնար Միսակյան

Այլ նորություններ
ԱԿՏԻՎ ՈՒՍՈՒՑՈՒՄ՝ «ՇՐՋՎԱԾ ԼՍԱՐԱՆՈՒՄ». ԵՊՀ ԴԱՍԱԽՈՍՆԵՐԸ ՎԵՐԱՊԱՏՐԱՍՏՎԵԼ ԵՆ ՇՎԵԴԻԱՅՈՒՄ
ԵՊՀ աշխատակիցները դեկտեմբերի 3-ից 7-ը Շվեդիայի Լինշյոպինգի համալսարանում մասնակցել են «Ակտիվ ուսուցում շրջված լսարանում» վերապատրաստման դասընթացին:
ԵՊՀ ԴԱՍԱԽՈՍՆԵՐԸ ՄԱՍՆԱԿՑԵԼ ԵՆ ԿՈՎԿԱՍՅԱՆ ԷԿՈՌԵԳԻՈՆԻ ՊԱՀՊԱՆՄԱՆ ՊԼԱՆԻ ՎԵՐԱՆԱՅՄԱՆ ՏԱՐԱԾԱՇՐՋԱՆԱՅԻՆ ՀԱՆԴԻՊՄԱՆԸ
Բնության համաշխարհային հիմնադրամի կովկասյան մասնաճյուղը (WWF-Caucasus) դեկտեմբերի 3-7-ը Թբիլիսիում կազմակերպել էր Կովկասյան էկոռեգիոնի պահպանման պլանի վերանայման տարածաշրջանային հանդիպում, որին մասնացել են ԵՊՀ ներկայացուցիչները: