25.01.2019 | 
Ուսանողական
«ԻՄ ՀԱՋՈՂՈՒԹՅՈՒՆՆԵՐԻՆ ՀԱՍՆԵԼՈՒ ԲԱՆԱԼԻՆ ԵՂԵԼ Է ԵՊՀ-Ն». «ԼԱՎԱԳՈՒՅՆ ԲԱԿԱԼԱՎՐ» ԱՆՎԱՆԱԿԱՐԳՈՒՄ ՀԱՂԹՈՂ ՆԱՐԵԿ ԱՎԱԳՅԱՆ
«ԻՄ ՀԱՋՈՂՈՒԹՅՈՒՆՆԵՐԻՆ ՀԱՍՆԵԼՈՒ ԲԱՆԱԼԻՆ ԵՂԵԼ Է ԵՊՀ-Ն». «ԼԱՎԱԳՈՒՅՆ ԲԱԿԱԼԱՎՐ» ԱՆՎԱՆԱԿԱՐԳՈՒՄ ՀԱՂԹՈՂ ՆԱՐԵԿ ԱՎԱԳՅԱՆ
Ռադիոֆիզիկայի ֆակուլտետի 4-րդ կուրսի ուսանող Նարեկ Ավագյանն արժանացել է ՏՏ ոլորտում ՀՀ պետական կրթական մրցանակի «Լավագույն բակալավր» անվանակարգում: Մեզ հետ զրույցում Նարեկը պատմում է իր հաջողությունների ու նվաճումների մասին, ինչպես նաև անդրադառնում ԵՊՀ-ի դերին՝ դրանց հասնելու գործում:

Նարեկը «Լավագույն բակալավր» անվանակարգում երկրորդ կարգի մրցանակի համար ստացել է վկայագիր, հուշախորհրդանիշ և դրամական պարգև: Նշենք, որ մրցանակաբաշխությունը տեղի է ունեցել 2018 թվականի հոկտեմբերին: ՏՏ ոլորտում պետական կրթական մրցանակի են արժանացել հանրապետության տարբեր բուհերից 25 ուսանող: Հաղթողներին մրցանակները հանձնել է վարչապետ Նիկոլ Փաշինյանը:

 

Իմ կյանքի ճիշտ ու կարևոր որոշումներից մեկը ԵՊՀ ռադիոֆիզիկայի ֆակուլտետ ընդունվելն էր: Ես ինձ գտել եմ իմ մասնագիտության մեջ: Մեր ֆակուլտետում դասախոս-ուսանող հարաբերությունները շատ ջերմ են, որն էլ իր նշանակալի դերն ունեցավ իմ կյանքի ձեռքբերումներում: Համալսարանում սովորում եմ բարձր առաջադիմությամբ:

 

Ինձ համարում եմ ակտիվ ուսանող, անդամակցում եմ ՈՒԽ-ին և ՈՒԳԸ-ին, ինչպես նաև ինքս եմ կազմակերպում միջոցառումներ՝ ուսանողական կյանքն ավելի հետաքրքիր դարձնելու համար: Երկրորդ կուրսում մասնակցել եմ «ԵՊՀ լավագույն ուսանող» մրցանակաբաշխությանը, որի ժամանակ Ռադիոֆիզիկայի ֆակուլտետի լավագույն ուսանող անվանակարգում արժանացել եմ արծաթե մեդալի:

 

Յուրաքանչյուր ստացած մրցանակ ինձ ոգևորել և հիմք է դարձել հետագա հաջողություններ գրանցելու համար: 2018 թ. փետրվարին մասնակցել եմ «ՀՀ լավագույն ուսանող» մրցանակաբաշխությանը և ճարտարագիտության ոլորտում արժանացել եմ երկրորդ կարգի մրցանակի: Ստացել եմ հավաստագիր և դրամական պարգև: Այս մրցանակն ինձ համար նոր ձեռքբերումների ուղի հարթեց:

 

Ուսանողական տարիների ընթացքում ստացած լավագույն մրցանակը ես համարում եմ վարչապետ Նիկոլ Փաշինյանի կողմից հանձնած գավաթը: Այն ստացել եմ ՏՏ ոլորտում ՀՀ պետական կրթական մրցանակակիրների հանձնման արարողության ժամանակ «Լավագույն բակալավր» անվանակարգի համար:

Իմ հաջողության գաղտնիքներն են՝ որոշումներ կայացնելու հարցում լինել սկզբունքային, հետևողական և շատ աշխատասեր, ինքնակրթվել ու ձգտել հաջողության:

 

Չեմ սահմանափակվելու իմ ձեռքբերումներով: Այս մրցանակը ես համարում եմ իմ գիտական հաջողությունների սկիզբը, քանի որ որոշել եմ զբաղվել գիտահետազոտական աշխատանքով և գիտության մեջ առաջարկել նոր գաղափարներ:

Ուսանողը չպետք է սպասի, որ մրցանակաբաշխություն լինի, և իր մասնակցությունն ունենա, այլ պետք է ինքն իր նախաձեռնությամբ գիտական հետազոտություններ անցկացնի և ստանա մրցանակներ ու պարգևներ՝ գիտության ոլորտում առաջարկելով նոր գաղափարներ:

 

ԵՊՀ-ի ներդրումը մեծ է եղել իմ նվաճումներում և աշխատանքային գործունեության ընթացքում ունեցած ձեռքբերումներում: ԵՊՀ-ում ուսանողն առաջին հերթին ձեռք է բերում լայն աշխարհայացք, որն օգնում է կյանքում ճիշտ կողմնորոշվել: Համալսարանի իմ սիրելի ֆակուլտետում ես ձեռք եմ բերել այնպիսի տեսական և գործնական գիտելիքներ, որոնց շնորհիվ այժմ աշխատում եմ «Սինոփսիս Արմենիա» ընկերությունում՝ որպես ինժեներ:

 

Ուսանողը պետք է լիովին գիտակցի և օգտագործի համալսարանական տարիներին տրված հնարավորությունները. ոչ միայն պետք է լավ սովորի, այլև պետք է հետաքրքրվի  աշխարհում տեղի ունեցող իրադարձություններով, պետք է պահանջատեր լինի, կարողանա իր գիտելիքները տեղ հասցնել և իր ձայնը լսելի դարձնել:

 

 

Հաջողության հասնելու գրավականն այն է, որ ուսանողը կարողանա ճիշտ պահին ճիշտ տեղում հայտնվել և իր ունեցած հնարավորություններն օգտագործել: Ուսանողներն իրենց քննադատական մտածելակերպը պետք է օգտագործեն ինչպես ԵՊՀ-ում կառուցվածքային որոշ հարցերի շուրջ, այնպես էլ գիտական ոլորտում:

 

Իմ ցանկությունն է, որ ԵՊՀ-ի դասախոսական կազմը համալրվի երիտասարդ կադրերով, իսկ մեր ֆակուլտետի գործնական պարապմունքներն առաջին կուրսից անցկացվեն նորարարական կենտրոններում:

 

Իմ հաջողություններին հասնելու բանալիները եղել են ԵՊՀ-ն և իմ շատ սիրելի դասախոսները:

 

Նադեժդա Տեր-Աբրահամյան 

 

 

Այլ նորություններ
ԵՎՐՈՊԱԿԱՆ ԼԵԶՈՒՆԵՐԻ ԵՎ ՀԱՂՈՐԴԱԿՑՈՒԹՅԱՆ ՖԱԿՈՒԼՏԵՏԸ ՃԱՆԱՊԱՐՀԵՑ 2020-2021 ՈՒՍՏԱՐՎԱ ՇՐՋԱՆԱՎԱՐՏՆԵՐԻՆ
ԵՊՀ Չարենցի անվան դահլիճում այսօր տեղի է ունեցել Եվրոպական լեզուների և հաղորդակցության ֆակուլտետի բակալավրիատի շրջանավարտների դիպլոմների հանձնման հանդիսավոր արարողությունը:
«ՏԱՐԱԾԱՇՐՋԱՆԱՅԻՆ ԱՆՎՏԱՆԳՈՒԹՅՈՒՆ. ՀՀ ՍՊԱՌՆԱԼԻՔՆԵՐԸ ՀԵՏՊԱՏԵՐԱԶՄՅԱՆ ՇՐՋԱՆՈՒՄ» ԽՈՐԱԳՐՈՎ ՀԱՆԴԻՊՈՒՄ ՏԻԳՐԱՆ ԱԲՐԱՀԱՄՅԱՆԻ ՀԵՏ
ՈՒԽ Լ. Ազգալդյանի անվան մարտական ակումբն այսօր ԵՊՀ գիտխորհրդի նիստերի դահլիճում կազմակերպել էր հանդիպում «Հենակետ» վերլուծական կենտրոնի ղեկավար Տիգրան Աբրահամյանի հետ: