06.02.2019 | 
Գիտություն
ԳԻՏԱԿԱՆ ԹԵՄԱ. ԲԱՐՁՐԱԳՈՒՅՆ ԿՐԹՈՒԹՅԱՆ ՄԻԱՍՆԱԿԱՆ ՏԱՐԱԾՔԻ ՁԵՎԱՎՈՐՈՒՄՆ ԱՆՀՐԱԺԵՇՏՈՒԹՅՈՒՆ Է, ՔԱՆԻ ՈՐ 21-ՐԴ ԴԱՐԸ ՈՉ ԹԵ ՄՐՑԱԿՑՈՒԹՅԱՆ ԴԱՐԱՇՐՋԱՆ Է, ԱՅԼ ՀԱՄԱԳՈՐԾԱԿՑՈՒԹՅԱՆ. ՆԱԶԻԿ ՀԱՐՈՒԹՅՈՒՆՅԱՆ
ԳԻՏԱԿԱՆ ԹԵՄԱ. ԲԱՐՁՐԱԳՈՒՅՆ ԿՐԹՈՒԹՅԱՆ ՄԻԱՍՆԱԿԱՆ ՏԱՐԱԾՔԻ ՁԵՎԱՎՈՐՈՒՄՆ ԱՆՀՐԱԺԵՇՏՈՒԹՅՈՒՆ Է, ՔԱՆԻ ՈՐ 21-ՐԴ ԴԱՐԸ ՈՉ ԹԵ ՄՐՑԱԿՑՈՒԹՅԱՆ ԴԱՐԱՇՐՋԱՆ Է, ԱՅԼ ՀԱՄԱԳՈՐԾԱԿՑՈՒԹՅԱՆ. ՆԱԶԻԿ ՀԱՐՈՒԹՅՈՒՆՅԱՆ
ՀՀ ԿԳՆ գիտության կոմիտեի գիտական և գիտատեխնիկական գործունեության պայմանագրային (թեմատիկ) ֆինանսավորման ծրագրերի մրցույթում մանկավարժության ոլորտում հաղթել է ԵՊՀ մանկավարժության ամբիոնի վարիչ պրոֆեսոր Ն. Հարությունյանի ներկայացրած «ԵԱՏՄ անդամ երկրների՝ Հայաստանի, Ռուսաստանի, Բելառուսի և Ղազախստանի բարձրագույն կրթության համակարգերի համեմատական վերլուծություն» գիտական թեման:

Մեզ հետ զրույցում գիտական թեմայի ղեկավար,  ԵՊՀ մանկավարժության ամբիոնի վարիչ, մանկավարժական գիտությունների դոկտոր, պրոֆեսոր  Նազիկ  Հարությունյանն  անդրադարձավ գիտական թեմայի արդիականությանը, ինչպես նաև սպասվելիք  ծրագրերին:

 

«Հետաքրքիր է ուսումնասիրել վերոնշյալ երկրների բարձրագույն կրթության համակարգերը և դնել համեմատական վերլուծության մեջ: Համեմատական վերլուծության շնորհիվ երևան են գալիս կառավարման նմանություններն ու տարբերությունները, բացահայտվում է առաջավոր փորձը»,- ասաց թեմայի ղեկավարը:

 

Այն հարցին, թե ինչ ընդունակություններ են անհրաժեշտ համեմատական վերլուծություն կատարելու համար, Նազիկ Հարությունյանը պատասխանեց. «Առաջինը՝ վերլուծահամադրական մտածողություն, այնուհետև երևույթների խորքային ուսումնասիրություն, նյութի մշակվածություն, հիմնախնդրի խորը և համապարփակ ուսումնասիրություն»:  

 

Պրոֆեսոր Հարությունյանի տեղեկացմամբ, գիտական խմբի  գործունեությունը բաժանվել է փուլերի:  «Մշակել ենք հետազոտության իրականացման ցուցանիշներ և ցուցիչներ, որոնք հնարավորություն կտան կենտրոնանալու կոնկրետ խնդրին,- նշեց Հարությունյանն ու հավելեց,- առաջինն ուսումնասիրվելու է երկրների օրենսդրական դաշտը, այնուհետև կառավարման համակարգը, դրանց առանձնահատկությունները, ֆինանսավորումը, բովանդակային հատվածները՝ կրթական ծրագրերը, գնահատման և որակավորումների համակարգերը»: 

 

Ուսումնասիրության շրջանակում նախատեսվում են նաև  կլոր սեղաններ, սեմինար- քննարկումներ և գործուղումներ, այցելություններ յուրաքանչյուր երկրի լավագույն 6 բուհ և տեղում հանդիպում-քննարկումներ ոլորտի առաջատար մասնագետների հետ:

 

Թեմայի ուսումնասիրության ավարտին կտպագրվի 8 գիտական հոդված, ինչպես նաև կոլեկտիվ մենագրություն:

 

Սույն ծրագրի իրականացման համար գիտական խումբը կազմված է 4 անձից:  Բացի գիտական թեմայի ղեկավարից՝ ծրագրի թիմում են ԵՊՀ ուսումնական աշխատանքների գծով պրոռեկտոր դոցենտ Ալեքսանդր Գրիգորյանը, Մանկավարժության ամբիոնի դոցենտ Աննա Ալեքսանյանը և ամբիոնի հայցորդ Անի Աբրահամյանը:

 

«Ուսումնասիրվող թեման պետք է շարունակական լինի: Երկու տարին քիչ ժամանակ է այս հսկայածավալ աշխատանքի համար, բայց ես կարծում եմ, որ մեր աշխատանքը կպսակվի հաջողությամբ»,- հավաստիացրեց Մանկավարժության ամբիոնի վարիչ, պրոֆեսոր  Ն. Հարությունյանը:

 

Նազիկ Հարությունյանի խոսքով, անհրաժեշտ է ապագայում ստեղծել ԵԱՏՄ երկրների բարձրագույն կրթության  միասնական տարածք. «Բարձրագույն կրթության միասնական տարածքի ձևավորումն անհրաժեշտություն է, քանի որ 21-րդ դարը ոչ թե մրցակցության դարաշրջան է, այլ համագործակցության. չէ՞ որ համագործակցությունն է տանում զարգացման, ոչ թե առճակատումը»,- ամփոփեց պրոֆեսորը:

Անգին Խաչատրյան

Այլ նորություններ
«ԿԱՆԽԱՐԳԵԼԻՉ ՄԻՋՈՑԱՌՈՒՄՆԵՐԻ ԵՎ ԲՆԱՊԱՀՊԱՆԱԿԱՆ ԽՆԴԻՐՆԵՐԻ ԼՈՒԾՄԱՆ ՀԱՄԱՐ ԽՆԱՅԵԼ ՉԻ ԿԱՐԵԼԻ». ԱՐՄԵՆ ԹՌՉՈՒՆՅԱՆ
Ամբողջ աշխարհն այսօր պայքարում է նոր կորոնավիրուսի (COVID19) դեմ՝ իրականացնելով տարաբնույթ միջոցառումներ: Առողջապահության համաշխարհային կազմակերպության կողմից հայտարարված աշխարհավարակի պատճառ դարձած կորոնավիրուսով այսօր աշխարհում վարակված է ավելի քան 1 մլն մարդ: Հայաստանում նոր կորոնավիրուսային հիվանդության հաստատված ավելի քան 730 դեպք է գրանցվել: Երկրում հաստատված է արտակարգ դրություն: Ստեղծված իրավիճակի, իրականացվող միջոցառումների արդյունավետության և սպասվող քայլերի մասին զրուցել ենք ԵՊՀ կենսաքիմիայի, մանրէաբանության և կենսատեխնոլոգիայի ամբիոնի վարիչ, ՀՀ ԳԱԱ թղթակից անդամ, կենսաբ. գիտ. դոկտոր, պրոֆեսոր Արմեն Թռչունյանի հետ:
ԼՈՒՅՍ Է ՏԵՍԵԼ ԱՆԱՀԻՏ ՄԱՆԱՍՅԱՆԻ՝ «ՍԱՀՄԱՆԱԴՐԱԿԱՆ ԿԱՅՈՒՆՈՒԹՅՈՒՆԸ՝ ՈՐՊԵՍ ԿԱՅՈՒՆ ԺՈՂՈՎՐԴԱՎԱՐՈՒԹՅԱՆ ԿԱՐԵՎՈՐԱԳՈՒՅՆ ԳՐԱՎԱԿԱՆ» ՄԵՆԱԳՐՈՒԹՅԱՆ ԱՆԳԼԵՐԵՆ ՏԱՐԲԵՐԱԿԸ
Հրապարակվել է ԵՊՀ սահմանադրական իրավունքի ամբիոնի դոցենտ, իրավ. գիտ. թեկնածու, Արդարադատության ակադեմիայի պրոռեկտոր Անահիտ Մանասյանի՝ «Սահմանադրական կայունությունը՝ որպես կայուն ժողովրդավարության կարևորագույն գրավական» («Constitutional Stability as an Important Prerequisite for Stable Democracy») անգլերեն մենագրությունը: