22.06.2018 | 
Մշակույթ
ՆՈՐ ԵՐԳԵՐ՝ ՆՎԻՐՎԱԾ ՀԱՄԱԼՍԱՐԱՆԻՆ. ԵՐԻՏԱՍԱՐԴԱԿԱՆ ԵՐԳԻ ՄՐՑՈՒՅԹԻ ՀԱՂԹՈՂՆԵՐԸ ՊԱՐԳԵՎԱՏՐՎԵՑԻՆ
ՆՈՐ ԵՐԳԵՐ՝ ՆՎԻՐՎԱԾ ՀԱՄԱԼՍԱՐԱՆԻՆ. ԵՐԻՏԱՍԱՐԴԱԿԱՆ ԵՐԳԻ ՄՐՑՈՒՅԹԻ ՀԱՂԹՈՂՆԵՐԸ ՊԱՐԳԵՎԱՏՐՎԵՑԻՆ
Այսօր ԵՊՀ ռեկտոր Արամ Սիմոնյանը ԵՊՀ-ին նվիրված երիտասարդական երգի մրցույթի հաղթողներին և խրախուսական պարգևների արժանացած մասնակիցներին պարգևատրեց:

Ինչպես արդեն տեղեկացրել էինք, ԵՊՀ 100-ամյակին ընդառաջ ԵՊՀ մշակույթի կենտրոնը Հայաստանի կոմպոզիտորների միության հետ համատեղ կազմակերպել էր համալսարանին նվիրված երգի մրցույթ: Եզրափակիչ փուլում հնչել էր 6 երգ, որոնցից լավագույններին ընտրել էր պրոֆեսիոնալ ժյուրին:

 

Հիշեցնենք, որ ԵՊՀ-ին նվիրված երիտասարդական երգի մրցույթում երրորդ պատվավոր տեղը զբաղեցրել է Գայանե Թադևոսյանը, երկրորդ տեղը՝ Աննա Զաքարյանը, իսկ առաջին պատվավոր հորիզոնականը զբաղեցրել է Էդմոնդ Մակարյանը:

 

Մրցույթի հաղթողներին ԵՊՀ ռեկտորը պատվոգրեր և դրամական պարգևներ հանձնեց:  Խրախուսական պարգևների արժանացան նաև մրցույթի մասնակիցներ Արեգնազ Մարտիրոսյանը և Տիգրան Գրիգորյանը:

 

ԵՊՀ ռեկտորը շնորհակալություն հայտնեց մրցույթի հանձնաժողովին և մասնակիցներին՝ նշելով, որ համալսարանը կշարունակի ստեղծել բոլոր պայմանները, որպեսզի ուսանողները կարողանան ստեղծագործել: Արամ Սիմոնյանն առանձնահատուկ շնորհակալություն հայտնեց նաև ԵՊՀ մշակույթի կենտրոնի տնօրեն Կարինե Դավթյանին տարիների հետևողական աշխատանքի և ուսանողների շրջանում մշակույթի հանդեպ սեր և հետարքրքություն սերմանելու համար:

 

Հայաստանի կոմպոզիտորների միության նախագահ Արամ Սաթյանն իր գոհունակությունը հայտնեց ԵՊՀ ղեկավարությանը, որը նպաստեց երիտասարդներին ինքնադրսևորվելու և լավագույնս ներկայանալու համար: Երևանի էստրադային և ջազային արվեստի պետական քոլեջի տնօրեն, կոմպոզիտոր Ստեփան Բաբաթորոսյանն էլ հույս հայտնեց, որ նման միջոցառումները շարունակական կլինեն և մասնակիցներին կպարգևեն ամենամեծ վայելքը՝ ստեղծագործելը:

 

Առաջին հորիզոնականում հաղթող ճանաչված Էդմոն Մակարյանը մասնակիցների անունից շնորհակալություն հայտնեց մրցույթի կազմակերպիչներին և ասաց, որ թեև համալսարանական չէ, այնուհանդերձ Մայր բուհը համարում է ազգային արժեք, որը կրթական, գիտական և մշակութային կարևոր կենտրոն է:  

 

Քնար Միսակյան

Այլ նորություններ
«ՀԱԶԱՐԱՄՅԱԿՆԵՐԻ ՃԱՄՓՈՐԴ. ԵՐԵՎԱՆ». ԿԱՅԱՑԱՎ ԵՊՀ ՊՐՈՖԵՍՈՐ ԱՐՏԱԿ ՄՈՎՍԻՍՅԱՆԻ ՖԻԼՄԻ ՊՐԵՄԻԵՐԱՆ
Այսօր Երևանի «Մոսկվա» կինոթատրոնում առաջին անգամ ցուցադրվեց ԵՊՀ հայոց պատմության ամբիոնի վարիչ, պատմական գիտությունների դոկտոր Արտակ Մովսիսյանի «Հազարամյակների ճամփորդ. Երևան» գիտահանրամատչելի ֆիլմը։
#ԵՎՐԱՍԻԱ 2018. ԵՊՀ ԱՍՊԻՐԱՆՏԸ՝ ՄԻՋԱԶԳԱՅԻՆ ԵՐԻՏԱՍԱՐԴԱԿԱՆ ԿՐԹԱԿԱՆ ՖՈՐՈՒՄԻ ՄԱՍՆԱԿԻՑ
Սեպտեմբերի 4-ից 10-ն ընկած ժամանակահատվածում Ռուսաստանի Օրենբուրգ քաղաքում անցկացվեց «Եվրասիա 2018» միջազգային երիտասարդական կրթական ֆորումը, որին մասնակցեց Ռուս բանասիրության ֆակուլտետի ասպիրանտ Աննա Խիզանցյանը: