17.04.2020 | 
Հասարակություն
«ԼՐԱԳՐՈՒԹՅՈՒՆՆ Ի ՎԵՐՋՈ ՀԵՏԱՔՐՔԻՐ ՊԱՏՄՈՒԹՅՈՒՆՆԵՐ ԳՏՆԵԼՈՒ ԱՐՎԵՍՏ Է». ԱՐԱՄ ԱԲՐԱՀԱՄՅԱՆ
«ԼՐԱԳՐՈՒԹՅՈՒՆՆ Ի ՎԵՐՋՈ ՀԵՏԱՔՐՔԻՐ ՊԱՏՄՈՒԹՅՈՒՆՆԵՐ ԳՏՆԵԼՈՒ ԱՐՎԵՍՏ Է». ԱՐԱՄ ԱԲՐԱՀԱՄՅԱՆ
Հեռավար ուսուցման շրջանակում ԵՊՀ ժուռնալիստիկայի ֆակուլտետը շարունակում է ամեն ուրբաթ կազմակերպել առցանց հանդիպումներ ոլորտի առաջատար մասնագետների հետ՝ դեկան Նաղաշ Մարտիրոսյանի նախաձեռնությամբ:

Այսօր առցանց հանդիպման հյուրն էր «Առավոտ» թերթի գլխավոր խմբագիր, «Շանթ» հեռուստաընկերության «Հեռանկար» հաղորդման հեղինակ և վարող Արամ Աբրահամյանը:

 

Առցանց հանդիպման ընթացքում Արամ Աբրահամյանն անդրադարձավ արտակարգ դրության իրավիճակում լրագրողների աշխատանքի առանձնահատկություններին՝ մասնավորեցնելով սեփական փորձը:

 

Հանդիպման սկզբում հյուրը պարզաբանեց տնից աշխատելու կարևորությունը:

 

«Այս պահին ես աշխատում եմ տնից ոչ թե այն պատճառով, որ ինձ համար հաճելի է, այլ այս աշխատանքը կատարվում է սոցիալական պատասխանատվության շրջանակում,- ասաց Արամ Աբրահամյանը,- շփվելով ստեղծագործական անձնակազմի հետ՝ կամա, թե ակամա մարդը կարող է տարածել հիվանդությունը»։

 

Նրա խոսքով, այն էականորեն կարելի է կանխարգելել, եթե յուրաքանչյուրը կարողանա հնարավորինս խուսափել հիվանդության տարածման օղակ հանդիսանալուց:

 

Այնուհետև Արամ Աբրահամյանը ներկայացրեց հեռավար աշխատանքի առանձնահատկությունները․«Ինձ հեռուստատեսությունը տրամադրել է որակյալ տեսախցիկ, որով մենք կապ ենք հաստատում մեր զրուցակիցների հետ և այդպես կատարում ենք մեր լրագրողական աշխատանքը»:

 

Առանձնացնելով լրագրողների հեռավար աշխատանքի առանձնահատկությունները՝ բանախոսը նշեց, որ հարցազրույցի դեպքում նա կարող է հյուրին ցանկացած պահի ընդհատել, ճշտող հարցեր տալ, արձագանքել, նույնը չի կարելի ասել հեռավար հարցազրույցի դեպքում․«Հեռավար հարցազրույցի դեպքում զրուցակիցը պետք է վերջացնի իր միտքը և հետո միայն կկարողանանք անցնել հաջորդ հարցին, և հաճախ այդ միտքը կարող է շատ ավելի երկար տևել, քան թույլ է տալիս եթերային ժամանակը»:

 

Նրա գնահատմամբ, հեռավար հարցազրույցը կենդանի զրույցի լավագույն տարբերակը չէ:

 

Արամ Աբրահամյանը խորհուրդ տվեց ապագա լրագրողներին խուսափել պետական պաշտոնյաներին հարցերը նախապես ուղարկելու պրակտիկայից․«Մեր աշխատանքում ամենահետաքրքիրն իմպրովիզն է, մարդու կենդանի արձագանքը զգալը»:

 

Բանախոսը պատմեց նաև, որ տաղավար մարդկանց հյուրընկալելիս աշխատում է նախքան հարցազրույցը չշփվել նրանց հետ, քանի որ եթե լրագրողը նախօրոք հյուրի հետ շփվում է թեմայի մասին, ապա իմպրովիզացիայի չափաբաժինը նույնպես պակասում է․«Մյուս կողմից մեծ է նաև հավանականությունը, որ հյուրին ձանձրալի կլինի արդեն հաղորդման շրջանակում խոսել նույն թեմայից»:

 

 

Անդրադառնալով այս օրերին «Առավոտ» թերթի աշխատանքին՝ Արամ Աբրահամյանը նշեց, որ այն ավելի հեշտ է կանոնակարգել․«Ես ունեմ թերթի և կայքի հրաշալի խմբագիրներ, որոնք հիմնականում կարողանում են առանց ինձ անհանգստացնելու գործը գլուխ բերել, իսկ ես շարունակում եմ ամեն օր գրել իմ խմբագրականները»:

 

Արամ Աբրահամյանն առցանց դասախոսության ընթացքում անդրադարձավ թե՛ հեռուստատեսային, թե՛ թերթային լրագրության՝ արտակարգ իրավիճակում առաջացած առանձնահատկություններին՝ նշելով, որ այժմ շատ հանդիպումների ու ասուլիսների լրագրողները հետևում են առցանց և առցանց էլ ուղարկում են իրենց հարցերը, ինչն առկա պայմաններում ճիշտ է, բայց, ըստ բանախոսի, լրագրողական որակյալ աշխատանքի համար անհրաժեշտ են շարժում և տարածություն:

 

«Լրագրողին կերակրում են նրա ոտքերը,- փաստեց Արամ Աբրահամյանը,- այս պայմաններում լրագրողը չի կարող մրցակցային առավելություն ունենալ այն լրագրողի նկատմամբ, որը շարժման մեջ է և փորձում է հետաքրքիր նյութ պատրաստել, իսկ լրագրությունն ի վերջո հետաքրքիր պատմություններ գտնելու արվեստ է»:

 

Բանախոսը պատմեց նաև իր առօրեական սահմանափակումների մասին, որոնք թելադրել է արտակարգ դրությունը:

 

Հյուրը ևս մեկ անգամ շեշտեց, որ այս օրերին լրագրողների կարևոր գործառույթներից մեկը մարդկանց անընդհատ հիշեցնելն է վարակի տարածման վտանգների մասին, որպեսզի մարդիկ իրավիճակին թեթևամտորեն չմոտենան:

 

Առցանց դասախոսության վերջում Արամ Աբրահամյանը պատասխանեց առցանց հետևորդների հարցերին:

 

Անի Պողոսյան

Այլ նորություններ
«ՍԱՀՄԱՆԱԴՐԱԿԱՆ ՍԻՄՎՈԼԻԶՄ. ՄԻ՞Ֆ, ԹԵ՞ ԻՐԱԿԱՆՈՒԹՅՈՒՆ». ԱՌՑԱՆՑ ՔՆՆԱՐԿՈՒՄ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ սահմանադրական իրավունքի ամբիոնի դոցենտ, ՀՀ արդարադատության ակադեմիայի պրոռեկտոր Անահիտ Մանասյանի նախաձեռնությամբ այսօր Իրավագիտության ֆակուլտետի ուսանողների համար իրականացվել է առցանց դասախոսություն, որի բանախոսներն են եղել Անահիտ Մանասյանը և Լատվիայի նախագահի՝ իրավական քաղաքականության հարցերով խորհրդական, Լատվիայի համալսարանի իրավունքի տեսության և պատմության ամբիոնի վարիչ Յանիս Պլեպսը:
ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ  ԾԱՆՈԹԱՑԵԼ ԵՆ ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԻ ԳՈՐԾԱՌՈՒՅԹՆԵՐԻՆ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ, Քրեական դատավարության և կրիմինալիստիկայի ամբիոնի աջակցությամբ տեղի է ունեցել հանդիպում-քննարկում ՀՀ Մարդու իրավունքների պաշտպան Արման Թաթոյանի հետ: