10.04.2020 | 
Հասարակություն
«ՄՇԱԿՈՒՅԹԸ ՍՏԵՂԾՎԵԼ Է ՈՉ ՄԻԱՅՆ ՊԱՐԶԱՊԵՍ ԻՐԱԿԱՆՈՒԹՅՈՒՆԸ ԱՐՏԱՑՈԼԵԼՈՒ, ԱՅԼ ՆՐԱ ՍԱՀՄԱՆՆԵՐԸ ԸՆԴԱՐՁԱԿԵԼՈՒ ԵՎ ԱՅՆ ՀԱՂԹԱՀԱՐԵԼՈՒ ՀԱՄԱՐ, ՔԱՆԻ ՈՐ ՄՇԱԿՈՒՅԹԸ ԿՅԱՆՔԻՆ ՏԱԼԻՍ Է ԼՐԱՑՈՒՑԻՉ ՏԱՐԱԾՈՒԹՅՈՒՆ». ԴԱՎԻԹ ՄՈՒՐԱԴՅԱՆ
«ՄՇԱԿՈՒՅԹԸ ՍՏԵՂԾՎԵԼ Է ՈՉ ՄԻԱՅՆ ՊԱՐԶԱՊԵՍ ԻՐԱԿԱՆՈՒԹՅՈՒՆԸ ԱՐՏԱՑՈԼԵԼՈՒ, ԱՅԼ ՆՐԱ ՍԱՀՄԱՆՆԵՐԸ ԸՆԴԱՐՁԱԿԵԼՈՒ ԵՎ ԱՅՆ ՀԱՂԹԱՀԱՐԵԼՈՒ ՀԱՄԱՐ, ՔԱՆԻ ՈՐ ՄՇԱԿՈՒՅԹԸ ԿՅԱՆՔԻՆ ՏԱԼԻՍ Է ԼՐԱՑՈՒՑԻՉ ՏԱՐԱԾՈՒԹՅՈՒՆ». ԴԱՎԻԹ ՄՈՒՐԱԴՅԱՆ
Ինչպես արդեն տեղեկացրել ենք, հեռավար ուսուցման շրջանակում ԵՊՀ ժուռնալիստիկայի ֆակուլտետը՝ դեկան Նաղաշ Մարտիրոսյանի նախաձեռնությամբ, ամեն ուրբաթ կազմակերպում է առցանց հանդիպումներ ոլորտի առաջատար մասնագետների հետ:

Այսօրվա առցանց դասախոսության հյուրն էր հրապարակախոս, կինոգետ, Երևանի թատրոնի և կինոյի պետական ինստիտուտի պրոֆեսոր, արվեստի վաստակավոր գործիչ Դավիթ Մուրադյանը:


Առցանց դասախոսությունը կրում էր ‹‹Արվեստը և ժուռնալիստիկան. փոխառնչություններ և հիմնախնդիրները›› խորագիրը։

Դասախոսության սկզբում Դավիթ Մուրադյանը շնորհակալություն հայտնեց ընձեռված հնարավորության համար՝ նշելով, որ առաջին անգամ է առցանց դասախոսությամբ հանդես գալու:

 

Անդրադառնալով դասախոսության թեմային՝ վերջինս փաստեց, որ մշակույթն այն ոլորտն է, որին լրագրողները մասնագիտական գործունեության ընթացքում հաճախ են անդրադառնում՝ լուսաբանելով  մշակութային կյանքը,  իրադարձությունները և մշակույթը ներկայացնող մարդկանց․ ‹‹Ըստ էության, մշակութային կյանքի լուսաբանումը լրագրողի մասնագիտական գործունեության էական կողմերից է››:

 

Առցանց հանդիպման ընթացքում Դավիթ Մուրադյանն անդրադարձավ մշակույթի  էությանն ու ժողովրդի կյանքում ունեցած նշանակալի դերին․ «Մշակույթը կյանքի ինքնուրույն ձև է, որը  գումարվում է մեր իրականությանը, ոչ միայն այն արտացոլելու, այլև այդ իրականությանն ինչ-որ բան ավելացնելու համար՝ բովանդակություն, փիլիսոփայություն, իդեալ, արժեհամակարգ, յուրահատուկ էություն››:

 

Ըստ Դավիթ Մուրադյանի՝ մշակույթը միայն ֆիլմը, երաժշտությունը կամ թատրոնը չէ․ հող մշակելը, որը  հետո պտղավորվելու ու բերք է տալու, տարածք, որ հայրենիք  պետք է դարձնել, սա նույնպես մշակույթ է:

 

 

‹‹Մշակույթը ստեղծվել է ոչ միայն  պարզապես իրականությունն արտացոլելու, այլ նրա սահմանները ընդարձակելու և այն հաղթահարելու համար, քանի որ մշակույթը կյանքին տալիս է լրացուցիչ տարածություն››,- նշեց բանախոսը:

Ըստ նրա՝ բոլոր հզոր պետությունների հիմքում ընկած է մշակութային խորը նախահյուսվածքը, որի մեջ կարևորագույնը լեզուն է․ ‹‹Լեզուն անկախություն է, քանի որ հենց  լեզուն է պայմանավորում մշակույթի ինչպիսին լինելը››:

 

Բանախոսն անդրադարձավ նաև հայերենին՝ համարելով այն  բացառիկ ինտելեկտուալ հնարավորություն ունեցող լեզու, որն իր մեջ ահռելի հիշողություն է կրում ՝ հընթացս մատնանշելով նաև հայոց լեզվի արդիական մարտահրավերները:

‹‹Գաղտնիք չէ, որ լրագրողի հիմնական աշխատանքային գործիքը լեզուն է, որքան լեզուն իջնի դեպի կենցաղ, այդքան մենք կամաց-կամաց կիջեցնենք մեր իսկ մարդկային հոգեձգտումների որակը››,-ասաց Դավիթ Մուրադյանը:

 

Առցանց դասախոսության վերջում Դավիթ Մուրադյանը պարզաբանեց, որ հայ մշակույթի դիմագիծն ուսումնասիրելիս  պարզ է դառնում, որ մենք և՛ արևելյան, և՛ արևմտյան մշակույթի տարրեր ենք կրում, ինչը հնարավորություն է տալիս այդ աշխարհների հետ հարաբերություններ ստեղծելու՝ տալով քաղաքական բանալիներ․ ‹‹Սա այն է, ինչ ես անվանում եմ հայկական մշակութային ֆենոմեն, որը եթե ապրում է մեր մեջ և մենք էլ իր մեջ, ուրեմն մենք պաշտպանված ենք››։

 

Անի Պողոսյան

Այլ նորություններ
«ՍԱՀՄԱՆԱԴՐԱԿԱՆ ՍԻՄՎՈԼԻԶՄ. ՄԻ՞Ֆ, ԹԵ՞ ԻՐԱԿԱՆՈՒԹՅՈՒՆ». ԱՌՑԱՆՑ ՔՆՆԱՐԿՈՒՄ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ սահմանադրական իրավունքի ամբիոնի դոցենտ, ՀՀ արդարադատության ակադեմիայի պրոռեկտոր Անահիտ Մանասյանի նախաձեռնությամբ այսօր Իրավագիտության ֆակուլտետի ուսանողների համար իրականացվել է առցանց դասախոսություն, որի բանախոսներն են եղել Անահիտ Մանասյանը և Լատվիայի նախագահի՝ իրավական քաղաքականության հարցերով խորհրդական, Լատվիայի համալսարանի իրավունքի տեսության և պատմության ամբիոնի վարիչ Յանիս Պլեպսը:
ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ  ԾԱՆՈԹԱՑԵԼ ԵՆ ՄԱՐԴՈՒ ԻՐԱՎՈՒՆՔՆԵՐԻ ՊԱՇՏՊԱՆԻ ԳՈՐԾԱՌՈՒՅԹՆԵՐԻՆ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ, Քրեական դատավարության և կրիմինալիստիկայի ամբիոնի աջակցությամբ տեղի է ունեցել հանդիպում-քննարկում ՀՀ Մարդու իրավունքների պաշտպան Արման Թաթոյանի հետ: