03.11.2017 | 
Քաղաքականություն
«ԻՆՁ ԻՍԿԱՊԵՍ ՏՊԱՎՈՐԵԼ Է ԵՊՀ-Ի ԳՈՐԾՈՒՆԵՈՒԹՅՈՒՆԸ»
«ԻՆՁ ԻՍԿԱՊԵՍ ՏՊԱՎՈՐԵԼ Է ԵՊՀ-Ի ԳՈՐԾՈՒՆԵՈՒԹՅՈՒՆԸ»
Մայր բուհն այսօր հյուրընկալել էր Փարիզի համալսարանի պատվիրակությանը՝ ռեկտոր Ժիլ Պեկուի գլխավորությամբ:

Հյուրերին նախ իր աշխատասենյակում ընդունեց ԵՊՀ ռեկտոր Արամ Սիմոնյանը: Հանդիպմանը ներկա էին նաև ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը և Միջազգային համագործակցության վարչության պետ Ալեքսանդր Մարգարովը:

 

ԵՊՀ ռեկտորը, ողջունելով և բարի գալուստ մաղթելով հյուրերին, նշեց, որ հանդիպումն ավելի հետաքրքիր է դարձնում այն փաստը, որ երկու համալսարանների ռեկտորներն ունեն նույն մասնագիտությունը. «Ուրախ եմ, որ երկուսս էլ պատմաբան ենք: Մեր համալսարանի պատմության մեջ ես 6-րդ պատմաբան ռեկտորն եմ»:

 

Արամ Սիմոնյանը ֆրանսիացի հյուրերին ներկայացրեց ԵՊՀ պատմությունը, ծանոթացրեց համալսարանի կառուցվածքին, խոսեց գործընկերների մասին, տեղեկացրեց բուհում գործող գիտահետազոտական ինստիտուտների, կենտրոնների և լաբորատորիաների մասին. «Ընդ որում՝ դրանք նախատեսված են ոչ միայն պրոֆեսորադասախոսական կազմի, այլև ուսանողների համար: Ունենք 3 ստարտափ լաբորատորիաներ, որոնք միայն ուսանողների համար են, իսկ առաջիկայում նախատեսում ենք կառուցել ևս երեքը»:

 

Ժիլ Պեկուն էլ իր խոսքում շնորհակալություն հայտնեց ջերմ ընդունելության համար և հետագայում առավել բովանդակային փոխգործակցություն ստեղծելու ցանկություն հայտնեց. «Սա իմ առաջին այցն է ձեզ մոտ, և ինձ իսկապես տպավորել է ԵՊՀ-ի գործունեությունը: Մեծ հույս ունեմ, որ մեր և ձեր ուսանողները, հետազոտողներն ու պրոֆեսորադասախոսական կազմի ներկայացուցիչները ակտիվ կհամագործակցեն և նոր արդյունքներ կգրանցեն»:

 

 

 

Այնուհետև Փարիզի համալսարանի ռեկտորը «Սորբոնը և ֆրանսիացի ինտելեկտուալներն ու հայերի հավաքագրումը 19-րդ դարի վերջին» թեմայով դասախոսություն կարդաց ԵՊՀ պատմության և միջազգային հարաբերությունների ֆակուլտետների պրոֆեսորադասախոսական կազմի և ուսանողների համար:

 

«Առաջին փաստը, որ ուզում եմ արձանագրել, այն է, որ հայերենն արդեն կանոնավոր ձևով ուսուցանվում էր դեռևս հայերենի ամբիոնի հիմնադրումից սկսած, որը տեղի է ունեցել Նապոլեոնի ժամանակաշրջանում: Սորբոնում կար նաև հայ բանասիրության գործնական դպրոց, որը կապված էր եվրոպական գիտելիքների հետ», - դասախոսության ընթացքում ասաց Ժիլ Պեկուն:

 

Տեղեկացնենք նաև, որ դասախոսության ավարտին Փարիզի համալսարանի ռեկտորը պատասխանեց նաև ներկաների հարցերին:

 

 

Այլ նորություններ
ԵՊՀ ԱՍՏՎԱԾԱԲԱՆՈՒԹՅԱՆ ՖԱԿՈՒԼՏԵՏԸ ՀԱՅՏԱՐԱՐՈՒԹՅՈՒՆ Է ՏԱՐԱԾԵԼ
Հայաստանյայց Առաքելական Սուրբ և Ուղղափառ Եկեղեցին Քրիստոսավանդ ուսմունք ժառանգած ու պահպանած իր երկհազարամյա պատմության ընթացքում ունեցել է և ունի ուղղափառ դավանանք, հավատարիմ է մնացել եկեղեցական սրբազան ավանդությանը, ստեղծել է քրիստոնեական բազմաշերտ մշակույթ:
ՀԱՅԿ ՍԱՐԳՍՅԱՆԸ ԵՎՍ 5 ՏԱՐԻ ԿՂԵԿԱՎԱՐԻ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԸ
Այսօր ԵՊՀ տնտեսագիտության և կառավարման ֆակուլտետի գիտխորհրդի նիստի օրակարգում մեկ հարց էր՝ ֆակուլտետի դեկանի ընտրություն, որին ներկայացված էին պրոֆեսորներ Հայկ Սարգսյանի և Միքայել Միքայելյանի թեկնածությունները: