30.01.2019 | 
Ուսանողական
ՀՈՒՇ-ՑԵՐԵԿՈՒՅԹ՝ ՆՎԻՐՎԱԾ ՊԱՐՈՒՅՐ ՍԵՎԱԿԻ 95-ԱՄՅԱԿԻՆ
ՀՈՒՇ-ՑԵՐԵԿՈՒՅԹ՝ ՆՎԻՐՎԱԾ ՊԱՐՈՒՅՐ ՍԵՎԱԿԻ 95-ԱՄՅԱԿԻՆ
Սևակյան հուշեր, նամակներ, բանաստեղծություններ, մենագրություններ, ինքնակենսագրական փաստեր. այսօր Հայաստանի ազգային գրադարանի ցուցասրահում սևակյան շունչն էր, ասելիքը, ժառանգությունը:

ԵՊՀ հայ բանասիրության ֆակուլտետի ՈՒԳԸ-ի, ՈՒԽ-ի նախաձեռնությամբ և Հայաստանի ազգային գրադարանի համատեղ ջանքերով կազմակերպվել էր հուշ-ցերեկույթ՝ նվիրված ականավոր բանաստեղծ, մշակութային գործիչ, գրականագետ և թարգմանիչ Պարույր Սևակի 95-ամյակին:


 

Միջոցառմանը ներկա էին Պարույր Սևակի թոռը՝ Հայ բանասիրության ֆակուլտետի հայ նորագույն գրականության ամբիոնի դասախոս Սևակ Ղազարյանը, ֆակուլտետի ուսանողներ, Հայաստանի ազգային գրադարանի աշխատակիցներ:

 

Միջոցառման մեկնարկին բացման խոսքով հանդես եկավ Հայաստանի ազգային գրադարանի հանրային հետ կապերի և միջոցառումների կազմակերպման բաժնի վարիչ Անահիտ Մանուչարյանը:

 

Վերջինս նկատեց, որ այս տարվա միջոցառումների մեկնարկն ազդարարվեց Սևակի հոբելյանական 95-ամյակով. «Միջոցառումները շարունակական են լինելու: Մեր պարտքն է հիշել ու փառաբանել մեր մեծերին»:


 

Հայ բանասիրության ֆակուլտետի երկրորդ կուրսի ուսանողուհի Վարսե Առաքելյանի խոսքով, Պարույր Սևակի մնայուն էջերն ընթերցում են բոլոր նրանք, ովքեր սիրում են աշխարհն ու մարդկանց. «Ես կարդում եմ Սևակ, ու ներսս լցվում է մարդկանց ու աշխարհի հանդեպ սիրով»:

 

Իսկ Սևակ Ղազարյանը ներկաների հետ կիսվեց բանաստեղծի ինքնակենսագրական հուշերով՝ սկսելով հենց անվանի գրականագետի ծննդից:


«Շփոթություն կա, որ Սևակը ծնվել է ոչ թե հունվարի 24-ին, այլ 26-ին: Իմացե՛ք՝ Պարույր Սևակի ծննդյան օրը 1924 թ. հունվարի 24-ն է, իսկ 26-ին գրանցվել է մի պարզ պատճառով. Սևակի ծննդյան օրը ռուս հեղափոխական գործիչ Վլադիմիր Լենինի մահվան օրն էր, երբ երկրում սուգ էր հայտարարվել, և որևէ մեկն իրավունք չուներ երեխայի ծնունդ նշելու կամ նույնիսկ գրանցելու»,- պարզաբանեց բանաստեղծի թոռը:

 

Ղազարյանը փաստեց նաև, որ Սևակի՝ բանաստեղծ դառնալու ճանապարհին ակնհայտ է եղել Եղիշե Չարենցի ազդեցությունը:

 

Սևակյան շունչն ավելի նկատելի դարձավ, երբ Հայ բանասիրության ֆակուլտետի ուսանողները կարդացին անվանի բանաստեղծի արժեքավոր բանաստեղծությունները, խոհերն ու զգայական ապրումների պոռթկումները:

 

Օդը լցվեց Սևակով:


Անգին Խաչատրյան

Այլ նորություններ
ԵՎՐՈՊԱԿԱՆ ԼԵԶՈՒՆԵՐԻ ԵՎ ՀԱՂՈՐԴԱԿՑՈՒԹՅԱՆ ՖԱԿՈՒԼՏԵՏԸ ՃԱՆԱՊԱՐՀԵՑ 2020-2021 ՈՒՍՏԱՐՎԱ ՇՐՋԱՆԱՎԱՐՏՆԵՐԻՆ
ԵՊՀ Չարենցի անվան դահլիճում այսօր տեղի է ունեցել Եվրոպական լեզուների և հաղորդակցության ֆակուլտետի բակալավրիատի շրջանավարտների դիպլոմների հանձնման հանդիսավոր արարողությունը:
«ՏԱՐԱԾԱՇՐՋԱՆԱՅԻՆ ԱՆՎՏԱՆԳՈՒԹՅՈՒՆ. ՀՀ ՍՊԱՌՆԱԼԻՔՆԵՐԸ ՀԵՏՊԱՏԵՐԱԶՄՅԱՆ ՇՐՋԱՆՈՒՄ» ԽՈՐԱԳՐՈՎ ՀԱՆԴԻՊՈՒՄ ՏԻԳՐԱՆ ԱԲՐԱՀԱՄՅԱՆԻ ՀԵՏ
ՈՒԽ Լ. Ազգալդյանի անվան մարտական ակումբն այսօր ԵՊՀ գիտխորհրդի նիստերի դահլիճում կազմակերպել էր հանդիպում «Հենակետ» վերլուծական կենտրոնի ղեկավար Տիգրան Աբրահամյանի հետ: