22.03.2019 | 
Ուսանողական
ՁԻՀ-Ի ԿՈՂՄԻՑ ԱՆՑԿԱՑՎԱԾ ԱՍՊԻՐԱՆՏՆԵՐԻ ԱՋԱԿՑՈՒԹՅԱՆ ԾՐԱԳՐԻ ՄՐՑԱՆԱԿԱԲԱՇԽՈՒԹՅԱՆԸ ԵՊՀ-ԻՑ ՀԱՂԹՈՂ Է ՃԱՆԱՉՎԵԼ ԵՐԿՈՒ ԱՍՊԻՐԱՆՏ
ՁԻՀ-Ի ԿՈՂՄԻՑ ԱՆՑԿԱՑՎԱԾ ԱՍՊԻՐԱՆՏՆԵՐԻ ԱՋԱԿՑՈՒԹՅԱՆ ԾՐԱԳՐԻ ՄՐՑԱՆԱԿԱԲԱՇԽՈՒԹՅԱՆԸ ԵՊՀ-ԻՑ ՀԱՂԹՈՂ Է ՃԱՆԱՉՎԵԼ ԵՐԿՈՒ ԱՍՊԻՐԱՆՏ
Ձեռնարկությունների ինկուբատոր հիմնադրամի (ՁԻՀ) և «PMI Science»-ի աջակցությամբ Նորարարական լուծումների և տեխնոլոգիաների կենտրոնում մարտի 12-ին տեղի է ունեցել Ասպիրանտների աջակցության ծրագրի մրցանակաբաշխություն:

Այդ մրցանակաբաշխությանը ԵՊՀ-ից հաղթող է ճանաչվել երկու ասպիրանտ՝ Հենրիկ Պարսամյանը Ռադիոֆիզիկայի ֆակուլտետից և Մերի Արզումանյանը Կենսաբանության ֆակուլտետից:

 

Ասպիրանտների աջակցության ծրագրի նպատակն է զարգացնել գիտական և հետազոտական էկոհամակարգը: Տարբեր գիտահետազոտական հաստատությունների և համալսարանների երիտասարդ գիտնականները, ստանալով ամսական կրթաթոշակներ, հնարավորություն կունենան համապատասխանեցնելու իրենց աշխատանքները միջազգային չափորոշիչների պահանջներին։

 

Ծրագրի հաղթող 10 ասպիրանտները շուրջ 1 տարի ստանալու են 364,000 ՀՀ դրամ ամսական կրթաթոշակ, ինչպես նաև միջազգային մենթորների աջակցություն:

 

Տարբեր համալսարաններից ու գիտահետազոտական կենտրոններից ներկայացված 45 հայտերից հաղթողների ընտրությունը կատարվել է Ամերիկահայ ճարտարագետների և գիտնականների ընկերակցության խորհուրդը և Նյու Ջերսիի Ռաթգրսի համալսարանը ներկայացնող միջազգային փորձագետներից ձևավորված ժյուրիի կողմից:

 

Նախապես ձևավորված, տեղական և միջազգային փորձագետներից կազմված ժյուրին լավագույն հայտերը գնահատել է ըստ առաջադրված խնդրի բարդության, հետազոտության արդիականության և կիրառելիության ոլորտի, փորձարարական լուծումների ու տեսական մասի համադրման մակարդակի:

Կիրառական ֆիզիկայի ոլորտում մրցանակը ստացել է Ռադիոֆիզիկայի ֆակուլտետի ասպիրանտ Հենրիկ Պարսամյանը «Ինֆրակարմիր և միկրոալիքային տիրույթում էլեկտրամագնիսական ալիքների կլանիչներ՝ ռազմական և քաղաքացիական նպատակներով» թեմայի համար:   

 

Հ. Պարսամյանը հայտնեց, որ թեմայի շրջանակում ուսումնասիրվում են միջուկ-կաղապար կառուցվածքներ, որոնք հիմնված են բարակ մետաղական շերտով պատված դիէլեկտրիկական գլանային և գնդային երկրաչափությունների վրա։ Նշված համակարգերը ցույց են տալիս բավական լավ կլանող հատկություններ, ինչը կարող է օգտակար լինել ինչպես քաղաքացիական, այնպես էլ ռազմական նպատակների համար: «Կլանիչները սարքեր են, որոնք մեծ արդյունավետությամբ կլանում են իրենց վրա ընկած էլեկտրամագնիսական ճառագայթումը: Դրանք կարող են օգտակար լինել այնպիսի իրավիճակում, ինչպիսին է օբյեկտների քողարկումը ռադարներից, կարող են օգտագործվել նաև կենսաչափման համակարգերում»,- հավելեց նա։

 

 

Ասպիրանտի խոսքով, համակարգերի առավելություններից է այն, որ կառուցվածքի պարզության հետ մեկտեղ դրանք ունեն նաև կլանման այնպիսի հատկություններ, որոնց շնորհիվ կլանվում է ավելի շատ էներգիա, քան անմիջականորեն ընկնում է համակարգի վրա։ Ավելին՝ գնդային կառուցվածքներն անկախ են ընկնող ալիքի բևեռականությունից և անկման անկյունից։

 

Մեր տեսական և սիմուլյացիոն հաշվարկները ցույց են տվել, որ համակարգերն ունեն լայնաշերտ կլանող հատկություններ մի շարք մետաղական ծածկույթների դեպքում։

 

Կարևորելով ասպիրանտների աջակցության ծրագրերը՝ Հ. Պարսամյանը նշեց, որ այս ծրագրի նպատակն է ստեղծել այնպիսի միջավայր, որ ասպիրանտները հնարավորություն ունենան իրականացնելու իրենց հետազոտություններն առանց ֆինանսական խոչընդոտների: 

 

Նադեժդա Տեր-Աբրահամյան

 

 

Այլ նորություններ
«Ի՞ՆՉ, ՈՐՏԵ՞Ղ, Ե՞ՐԲ». ՊԱՏԱՍԽԱՆՈՒՄ ԵՆ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ
ԵՊՀ Պալեանների անվան դահլիճում այսօր Իրավագիտության ֆակուլտետի ՈՒԽ-ի նախաձեռնությամբ անցկացվել է «Ի՞նչ, որտե՞ղ, ե՞րբ» ներֆակուլտետային ինտելեկտուալ խաղ-մրցույթը:
ԵՊՀ ՀԱՎԱՔԱԿԱՆԸ ՄԱՍՆԱԿՑԵԼ Է ԹԻԱՎԱՐՈՒԹՅԱՆ ՄԻՋԲՈՒՀԱԿԱՆ ԱՌԱՋՆՈՒԹՅԱՆԸ
Հանրապետության ուսանողական 22-րդ մարզական խաղերի ծրագրով հոկտեմբերի 5-ին Երևանյան լճի տարածքում գտնվող ջրային մարզաձևերի մարզակայանում անցկացվեց «Դրակոնբոութ» (թիավարական մակույկներ) և «Կոնցեպտ» (վարժասարքեր) մարզաձևերի բուհական առաջնությունը, որի մասնակցել են 8 բուհերի հավաքականներ: