21.04.2017 | 
Կրթություն
ԵՊՀ ԹԻՄԸ ԱՄՆ-ՈՒՄ ՏՊԱՎՈՐԻՉ ԱՐԴՅՈՒՆՔՆԵՐ Է ԳՐԱՆՑԵԼ
ԵՊՀ ԹԻՄԸ ԱՄՆ-ՈՒՄ ՏՊԱՎՈՐԻՉ ԱՐԴՅՈՒՆՔՆԵՐ Է ԳՐԱՆՑԵԼ
ԵՊՀ իրավագետների թիմը Ֆիլիպ Ջեսափի անվան իրավունքի դատախաղ-մրցույթի միջազգային մրցափուլից վերադարձել է գոհացուցիչ արդյունքներով:

Արդեն 58-րդ անգամ ԱՄՆ-ի Վաշինգտոն քաղաքում ապրիլի 9-15-ը անցկացվեց աշխարհի ամենահեղինակավորներից մեկը համարվող դատախաղ-մրցույթի միջազգային փուլը: Այս տարի աշխարհի տարբեր երկրներ ներկայացնող 700 թիմերից միջազգային փուլ էին անցել շուրջ 130-ը: Մրցույթի պատմության մեջ մասնակցության այս ցուցանիշն առավելագույնն է:

 

Մրցույթի ազգային փուլն անցկացվել է փետրվար ամսին, հայկական 5 բուհերի մեջ առավելագույն միավորները վաստակել էր ԵՊՀ-ի թիմը և ստացել միջազգային փուլին Հայաստանը ներկայացնելու իրավունքը: Թիմի անդամներն են ԵՊՀ իրավագիտության ֆակուլտետի ասպիրանտներ Լիլիթ Պետրոսյանը, Գևորգ Պողոսյանը, մագիստրանտներ Մարիամ Ղազարյանն ու Մարտին Ստեփանյանը: Թիմի մարզիչները երկուսն են՝ ֆակուլտետի դասախոսներ Տարոն Սիմոնյանը և Կարեն Գևորգյանը:

 

Վաշինգտոնում ԵՊՀ-ի թիմը 4 մրցելույթ է ունեցել, որոնցից երեքում հաղթանակ է տարել Եգիպտոսի, Կանադայի և Աֆղանստանի նկատմամբ, իսկ ԱՄՆ-ի թիմին զիջել է միավորների փոքր տարբերությամբ: Երեք խաղերում, սակայն, թիմի անդամները ճանաչվել են լավագույն բանախոսներ:

 

Այնուամենայնիվ, ԵՊՀ թիմն արձանագրել է գոհացուցիչ արդյունքներ՝ զբաղեցնելով 39-րդ տեղը՝ իրենից հետ թողնելով հարևան երկրների թիմերին (Թուրքիա՝ 41-րդ, Վրաստան՝ 43-րդ, Ադրբեջան՝ 118-րդ):

 

«Այս մրցույթը շատ համալսարաններում դասընթացի մի մաս է կազմում, մեր ուսանողները պատրաստվում են մի քանի ամսում: 17 թիմ է եղել, որոնք 4 հաղթանակ են տարել: Այսինքն՝ երբ ընդհանուր պատկերն ես դիտարկում, մեր թիմի արդյունքները բավականին լավն են»,- ասում է Իրավագիտության ֆակուլտետի դեկան Գագիկ Ղազինյանն ու հավելում, որ շատ շուտով սկսելու են հաջորդ տարվա նախապատրաստական աշխատանքները: 

 

Դատական գործը, որում թիմերը պետք է հանդես գային ինչպես հայցվորի, այնպես էլ պատասխանողի դերերում, հրապարակվել էր դեռևս նախորդ տարվա սեպտեմբեր ամսին: Ամեն տարի գործը լինում է համաշխարհային նշանակություն ունեցող որևէ խնդիր, այս տարի թեման Խմելու ջրի իրավունքն էր, իսկ գործը քննողը՝ ՄԱԿ-ի միջազգային դատարանը:

 

«Նախորդ տարիների համեմատ՝ այս անգամ մարտավարությունը մի քիչ փոխեցինք. որոշեցինք, որ ամբողջ պատասխանատվությունը պետք է կրի հենց թիմը: Դա տվեց իր արդյունքը, որովհետև թիմն իրեն ավելի ինքնավստահ էր զգում, իսկ մարզիչը հանդես էր գալիս զուտ որպես ուղղորդող: Նրանք կատարում էին իրենց հետազոտությունները, շաբաթական 2-3 անգամ հանդիպում էինք, դրանք ի մի բերում: Գրավոր աշխատանքը հանձնելուց հետո սկսեցինք բանավորի վրա շեշտը դնել: Օգնեց նաև այն, որ թիմի անդամները և՛ այս, և՛ այլ դատախաղերի փորձ ունեին»,- մանրամասնում է Տարոն Սիմոնյանը:

Այլ նորություններ
ԵՊՀ ԴԱՍԱԽՈՍՆԵՐԻ ՀԱՄԱՐ ԱՆՑԿԱՑՎԵՑ ՀԱՄԱԼՍԱՐԱՆԻ ՄԻՋԱԶԳԱՅՆԱՑՄԱՆ ՔԱՂԱՔԱԿԱՆՈՒԹՅԱՆԸ  ՆՊԱՍՏՈՂ ԴԱՍԸՆԹԱՑ
Այսօր ԵՊՀ միջազգային համագործակցության վարչությունը ԵՊՀ 2016-2020 թթ. զարգացման ռազմավարական ծրագրի շրջանակում դասախոսների համար կազմակերպել էր դասընթաց, որի նպատակն է նպաստել համալսարանի միջազգայնացման քաղաքականությանը: Նշենք, որ դասընթացների ավարտից հետո մասնակիցներին կտրվի մեկ կրեդիտ։
«ԶՈՀԻ ՀՈԳԵԲԱՆՈՒԹՅՈՒՆՆ ԻՆՁ ՀԱՄԱՐ ՉԷ». ՀԱՐՑԱԶՐՈՒՅՑ ՄԱԳԻՍՏՐԱՆՏ ՆԵԼԻ ԱԲՐԱՀԱՄՅԱՆԻ ՀԵՏ
Հայոց ցեղասպանության առջև օրեցօր ծառացող մարտահրավերներն առավել պահանջված են դարձնում հարցին տիրապետող, բանիմաց երիտասարդ մասնագետներին: