03.08.2018 | 
Ուսանողական
ՈՒԽՏԱԳՆԱՑՈՒԹՅՈՒՆԸ ՆՎԻՐՎԱԾ Է ԵՊՀ ԶՈՀՎԱԾ ՈՒՍԱՆՈՂ ԱԶԱՏԱՄԱՐՏԻԿՆԵՐԻ ՀԻՇԱՏԱԿԻՆ
ՈՒԽՏԱԳՆԱՑՈՒԹՅՈՒՆԸ ՆՎԻՐՎԱԾ Է ԵՊՀ ԶՈՀՎԱԾ ՈՒՍԱՆՈՂ ԱԶԱՏԱՄԱՐՏԻԿՆԵՐԻ ՀԻՇԱՏԱԿԻՆ
Այսօր մեկնարկեց ԵՊՀ «Վարդանանք» ռազմահայրենասիրական դաստիարակության ակումբի անդամների ուխտագնացությունը դեպի Արցախ: ԵՊՀ զոհված ուսանող ազատամարտիկների հիշատակին նվիրված ուխտագնացությունն Արցախում շարունակվելու է մինչև օգոստոսի 9-ը:

Մեզ հետ զրույցում «Վարդանանք» ռազմահայրենասիրական դաստիարակության ակումբի նախագահ Սաթենիկ Աբրահամյանը նշեց, որ ուխտագնացությունը կազմակերպվել է «Միացյալ Հայաստան» ծրագրի շրջանակում, որը նվիրված է «Հայաստանի առաջին Հանրապետության 100-ամյակին և Թավշյա հեղափոխության հաղթանակին»:

Ուխտագնացությանը մասնակցում են «Վարդանանք» ռազմահայրենասիրական դաստիարակության ակումբի շուրջ 55 անդամներ՝ ուսանողներ, զոհված ազատամարտիկների ծնողներ և հարազատներ:

Սաթենիկ Աբրահամյանը հայտնեց, որ ուխտագնացությունը կազմակերպվել է կազմակերպվել է ԵՊՀ-ի և ՀՀ պաշտպանության նախարարության հետ համատեղ: Դեպի Արցախ այցն իրականացնելու համար իր աջակցությունն է ցուցաբերել նաև Արցախի հերոս Արկադի Տեր-Թադևոսյանը, ով նույնպես մասնակցում է ուխտագնացությանը:

«Վարդանանք» ռազմահայրենասիրական դաստիարակության ակումբի նախագահը նշեց, որ ուխտագնացության նպատակն է այցելել զոհված ուսանող ազատամարտիկների շիրիմներին, հանդիպել նրանց ընտանիքների անդամների հետ, լինել Արցախի տարբեր զորամասերում, շփվել նորակոչիկների հետ, նրանց համար կազմակերպել մշակութային միջոցառումներ, ինչպես նաև ակումբի անդամներին ծանոթացնել Արցախի տեսարժան վայրերին: «Այս հայրենաճանաչողական այցի նպատակն է համալսարանականներին ներկայացնել ԵՊՀ զոհված ազատամարտիկ հերոսների սխրանքները»,- հավելեց նա:

ՀՀ պաշտպանության նախարարության հետ նախապես ձեռք բերված համաձայնությամբ ակումբի անդամներն ուխտագնացության ընթացքում այցելելու են Արցախի տարբեր զորամասեր, որտեղ զինվորների համար «Վան» ազգագրական երգի-պարի համույթի անդամներն ակումբականների հետ միասին կազմակերպելու են գրական-մշակութային հանդիպում:

Նա նշեց, որ ուխտագնացության 7 օրերի ընթացքում մասնակիցներն Արցախում գիշերելու են Վանք գյուղի Գուրգեն Հայրապետյանի անվան դպրոցում, որտեղ կազմակերպելու են մշակութային մեծ միջոցառում՝ նվիրված մեծ մտավորական, բարերար Լևոն Գուրգենի Հայրապետյանի հիշատակին:

«Վարդանանք» ռազմահայրենասիրական դաստիարակության ակումբի և «Վան» ազգագրական երգի-պարի համույթի անդամները Վանք գյուղի երիտասարդների համար կազմակերպելու են մշակութային միջոցառում, որը նվիրված է լինելու «Հայաստանի առաջին Հանրապետության 100-ամյակին և Թավշյա հեղափոխության հաղթանակին» :

Տիկին Սաթենիկը պատմեց, որ ուխտագնացության ընթացքում այցելելու են ԵՊՀ իրավագիտության ֆակուլտետի զոհված ուսանող ազատամարտիկ Արա Ավանեսյանի շիրիմին, իսկ Ճարտարի նրա անունը կրող դպրոցում կազմակերպելու են հուշ-ցերեկույթ՝ նվիրված հերոսի ծննդյան 50-ամյակին: Նախատեսվում է այցելություն ԵՊՀ զոհված ուսանող ազատամարտիկ Դավիթ Սարգսյանի և Սանասար Մնացականյանի շիրիմներին, ինչպես նաև հանդիպում նրանց ընտանիքի անդամների և համայնքի բնակիչների հետ: Այցելություն է կազմակերպվելու նաև Վանք գյուղի ազատամարտիկների հուշակոթող համալիր:

Նախատեսված է Վանք գյուղի երիտասարդների համար կազմակերպել մշակութային միջոցառումներ, Գուրգեն Հայրապետյանի անվան դպրոցի աշակերտներին ուսուցանել ազգագրական պար ու երգ, անցկացնել շախմատի մրցումներ ակումբականների և գյուղի երիտասարդների միջև, ինչպես նաև հանդիպում-զրույց Արցախի հերոս Արկադի Տեր-Թադևոսյանը (Կոմանդոսի) հետ:

Երևանի Մեսրոպ Մաշտոցի անվան Մատենադարանի արցախյան մասնաճյուղում, որը տեղակայված է Գանձասարի վանքի հարակից տարածքում, կազմակերպվելու է «Հայոց ինքնության հարցեր և ազգային մշակույթ» գիտապրակտիկ գիտաժողով:

Մեկշաբաթյա ուխտագնացության ընթացքում կլինեն ճանաչողական այցելություններ Ազատամարտիկների թանգարան և Ստեփանակերտի պանթեոն, ինչպես նաև Արցախի պատմամշակութային հուշարձաններ:

 

Նադեժդա Տեր-Աբրահամյան

Այլ նորություններ
ԵՎՐՈՊԱԿԱՆ ԼԵԶՈՒՆԵՐԻ ԵՎ ՀԱՂՈՐԴԱԿՑՈՒԹՅԱՆ ՖԱԿՈՒԼՏԵՏԸ ՃԱՆԱՊԱՐՀԵՑ 2020-2021 ՈՒՍՏԱՐՎԱ ՇՐՋԱՆԱՎԱՐՏՆԵՐԻՆ
ԵՊՀ Չարենցի անվան դահլիճում այսօր տեղի է ունեցել Եվրոպական լեզուների և հաղորդակցության ֆակուլտետի բակալավրիատի շրջանավարտների դիպլոմների հանձնման հանդիսավոր արարողությունը:
«ՏԱՐԱԾԱՇՐՋԱՆԱՅԻՆ ԱՆՎՏԱՆԳՈՒԹՅՈՒՆ. ՀՀ ՍՊԱՌՆԱԼԻՔՆԵՐԸ ՀԵՏՊԱՏԵՐԱԶՄՅԱՆ ՇՐՋԱՆՈՒՄ» ԽՈՐԱԳՐՈՎ ՀԱՆԴԻՊՈՒՄ ՏԻԳՐԱՆ ԱԲՐԱՀԱՄՅԱՆԻ ՀԵՏ
ՈՒԽ Լ. Ազգալդյանի անվան մարտական ակումբն այսօր ԵՊՀ գիտխորհրդի նիստերի դահլիճում կազմակերպել էր հանդիպում «Հենակետ» վերլուծական կենտրոնի ղեկավար Տիգրան Աբրահամյանի հետ: