19.06.2018 | 
Հասարակություն
«ԺՈՂՈՎՐԴԱՎԱՐՈՒԹՅՈՒՆԸ ԿԵՆՍՈՒՆԱԿ ԼԻՆԵԼ ՉԻ ԿԱՐՈՂ ԱՌԱՆՑ ՔԱՂԱՔԱԿԱՆ ԲԱՆԱՎԵՃԻ».ԳԵՐՄԱՆԱՑԻ ՄԱՍՆԱԳԵՏ
«ԺՈՂՈՎՐԴԱՎԱՐՈՒԹՅՈՒՆԸ ԿԵՆՍՈՒՆԱԿ ԼԻՆԵԼ ՉԻ ԿԱՐՈՂ ԱՌԱՆՑ ՔԱՂԱՔԱԿԱՆ ԲԱՆԱՎԵՃԻ».ԳԵՐՄԱՆԱՑԻ ՄԱՍՆԱԳԵՏ
ԵՊՀ լրագրող Անի Պողոսյանը Գերմանիայի Բունդեսթագում մասնակցել է IPS (Միջազգային խորհրդարանական կրթաթոշակ) ծրագրի կրթաթոշակակիրների համար կազմակերպված հանդիպմանը:

Գերմանիայի «Բերտելսմանյան» հիմնադրամի տնօրեն, «Ժողովրդավարության ապագան» ծրագրի խորհրդատու Ռոբերտ Վեհրկամպը, ով իր հետազոտական թեմայի  շրջանակում ուսումնասիրում է ընտրություններին քաղաքացիների մասնակցության  ակտիվության և պասիվության  սոցիալական պատճառները, Բունդեսթագում ունեցած իր ելույթի ընթացքում անդրադարձավ մի քանի արդիական խնդիրների: Ըստ բանախոսի՝ եվրոպական ծագում ունեցող ամենամեծ քաղաքական ձեռքբերումը՝ ժողովրդավարությունը, կասկած է առաջացնում: Առանձնահատուկ անդրադարձ եղավ նաև այն դերին, որ ընդդիմությունն ունի ժողովրդավարական համակարգի կայացման գործում:

 

Գերմանիայի խորհրդարանը վերջին տարում համեմվել է ոչ միայն «Այլընտրանք Գերմանիայի համար»  աջ կուսակցությամբ, որը թունդ քննարկումներ է ծավալում Բունդեսթագում` հիմնական թիրախ ունենալով փախստականների ճգնաժամը,  այլ նաև եվրոպական քաղաքական միջավայրը սկսում է ժողովրդավարական համակարգի մոդեռնիզացման գործընթացը:

 

 «Այս պահին ժողովրդավարությունն ունի մի քանի վիճելի հարցեր, որոնց հետազոտությամբ  էլ մենք զբաղվում ենք,- իր ելույթում նշեց Ռոբերտ Վեհրկամպը,- առաջին կարևոր հարցը այն է՝ արդյոք տասնութ տարին լրացած քաղաքացին, ով արդեն իրավունք է ունենում մասնակցելու ընտրություններին, բավականաչափ   հասուն է քաղաքական որոշումներ կայացնելու համար: Հաջորդ  հարցը ընտրելու իրավունք ունեցող քաղաքացիներին է վերաբերվում, թե նրանց համար արդյոք պետք է սահմանել որոշակի չափանիշներ, որոնց համապատասխանելու դեպքում միայն քաղաքացին իրավունք կունենա մասնակցելու ընտրության:  Ժողովրդավարության սկզբունքները նժարի հավասար կողմերի վրա են դնում համալսարանի պրոֆեսորի և հովիվի ձայները: Եվ երրորդ կարևոր խնդիրն այն շեմի սահմանումն է, որն հաղթահարելու դեպքում միայն կուսակցությունները հնարավորություն կունենան մտնելու օրենսդիր մարմին»:

 

Բանախոսն իր ելույթում նշեց, որ քաղաքացիների  շրջանում կատարված հետազոտությունները ցույց են տվել, որ ընտրություններին չմասնակցող քաղաքացիները մեծամասամբ  երկու պատճառ ունեն: Առաջինը՝ քաղաքացին գոհ է իրերի դասավորությունից և իր վարած կյանքից, իսկ դժգոհների ակտիվ մասնակցությունն ընտրություններին խեղաթյուրում է հասարակական իրական տրամադրության պատկերը:

 

Հաջորդ պատճառը սոցիալական դետերմինիզմն է: Անհրաժեշտ է ուսումնասիրել սոցիալական պատճառահետևանքային այն կապերը, որոնք հանգեցնում են քաղաքացիների ցածր մասնակցությանն ընտրություններին:

«Կարևոր է շարունակել ուսումնասիրություններն այն ուղղությամբ, թե ինչպիսի սոցիալական գործոնների ազդեցության տակ է  քաղաքացին նախընտրում  տանը մնալ, այլ ոչ թե մասնակցել ընտրություններին: Ընտրություններին չմասնակցող մարդկանց մոտիվացնելը նույնպես մարտահրավեր է, որը եվրոպական ժամանակակից ընտրական համակարգը պետք է հաղթահարի»,- հավելեց բանախոսը:

 

Ելույթի ընթացքում խոսվեց նաև ժողովրդավարական համակարգում ընդդիմության զբաղեցրած դերի մասին: Ըստ բանախոսի՝ ընդդիմությունն այն այլընտրանքն է, որի իրավունքները պետք է պաշտպանված լինեն:

 

«Ժողովրդավարությունը քաղաքական բանավեճով ամրապնդվող համակարգ է,- նշեց պարոն Վեհրկամպը,- առանց քաղաքական բանավեճի այն չի կարող կենսունակ լինել, ուստի բանավեճերը, ինչպես նաև վեճերը խորհրդարանական միջավայրում անհրաժեշտությունն են: Ժամանակակից ժողովրդավարությունը պետք է ամբողջանա ընդդիմադիր մտքի ու այլակարծության շնորհիվ: Յուրաքանչյուր կարծիք, որ հնչում է խորհրդարանում պետք չէ ծաղրել կամ անտեսել, քանի որ այն կազդարարի ժողովրդավարական համակարգի վերջը»,- իր ելույթը եզրափակեց Ռոբերտ Վեհրկամպը:

 

 

 

Այլ նորություններ
50 ՏԱՐԻ ՀԱՄԱԼՍԱՐԱՆՈՒՄ.  ՊՐՈՖԵՍՈՐ  Գ.  ՀԱՋՅԱՆԸ  ԳՐԻԳՈՐ ԱԼԱՎԵՐԴՅԱՆԻ ՄԱՍԻՆ
«Հիանալի մարդ, հիանալի դասախոս, հիանալի գիտնական»: Այս խոսքերը, որով ուսանողները վերջին սոցհարցումների միջոցով գնահատել են ԵՊՀ ռադիոֆիզիկայի ֆակուլտետի ալիքային պրոցեսների տեսության և ֆիզիկայի ամբիոնի դոցենտ, ֆիզիկամաթեմատիկական գիտությունների թեկնածու, երկարամյա դասախոս Գրիգոր Ալավերդյանին, լավագույն նվերն են նրա ծննդյան 70-ամյակին:
ՍՈՑԻՈԼՈԳԻԱՅԻ ՖԱԿՈՒԼՏԵՏԸ ՆՇԵՑ ՀԻՄՆԱԴՐՄԱՆ 14-ԱՄՅԱԿԸ ԵՐԻՏԱՍԱՐԴԱԿԱՆ ԳԻՏԱԺՈՂՈՎՈՎ
ԵՊՀ սոցիոլոգիայի ֆակուլտետի ուսանողական գիտական ընկերությունը «ISTC - Innovative Solutions and Technologies Center»-ում այսօր կազմակերպել էր ամենամյա երիտասարդական գիտաժողով՝ նվիրված ֆակուլտետի հիմնադրման 14-ամյակին: