07.11.2022 | 
Կրթություն, Գիտություն
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ԳՐԱԴԱՐԱՆԸ ՀԱՄԱԼՐՎԵՑ ՄԱՍՆԱԳԻՏԱԿԱՆ ՆՈՐ ԴԱՍԱԳՐՔԵՐՈՎ
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ԳՐԱԴԱՐԱՆԸ ՀԱՄԱԼՐՎԵՑ ՄԱՍՆԱԳԻՏԱԿԱՆ ՆՈՐ ԴԱՍԱԳՐՔԵՐՈՎ
Երևանի պետական համալսարանի ԳԽ դահլիճում կայացավ ԵՊՀ իրավագիտության ֆակուլտետի քաղաքացիական դատավարության ամբիոնի հրատարակած «Քաղաքացիական դատավարություն», «Վարչական դատավարություն» և «Հողային իրավունք» առարկայական դասագրքերի շնորհանդեսը:

ԵՊՀ ռեկտոր Հովհաննես Հովհաննիսյանը, շնորհավորելով գրքերի հեղինակներին և ուսանողներին, ընդգծեց, որ Երևանի պետական համալսարանը խրախուսելով դասագրքերի լույսընծայումը, գիտական հոդվածների հրատարակումը, էլեկտրոնային շտեմարանների ստեղծումը, անում է ամեն հնարավորը «հետազոտական համալսարան» ունենալու ուղղությամբ:

 

 

Վերջին մեկ տարվա ընթացքում ԵՊՀ քաղաքացիական դատավարության ամբիոնը նախաձեռնել և մշակել էր դասագրքերի հրատարակությունը: Իր առջև դրված հիմնական խնդիրը, որն ամբիոնը լուծել է, օրենսդրության փոփոխություններին զուգահեռ՝ նոր դասագրքերի առկայությունն էր, որոնց շնորհիվ ուսանողները կկարողանան մատուցվող նյութը հեշտությամբ յուրացնել և ծանոթանալ առարկաներին:

 

 

ԵՊՀ իրավագիտության ֆակուլտետի դեկան, ի.գ.դ., պրոֆեսոր, ԳԱԱ ակադեմիկոս Գագիկ Ղազինյանը, խոսելով հրատարակված գրքերի անհրաժեշտությունից և կարևորությունից, ասաց, որ ֆակուլտետը նպատակաուղղված է շարունակելու նոր դասագրքերի հրատարակումը, որպեսզի ուսանողները ձեռքի տակ ունենան համակարգված նյութեր:

 

 

ԵՊՀ քաղաքացիական դատավարության ամբիոնի վարիչ Վահե Հովհաննիսյանը նշեց, որ դասագրքերի հեղինակային կազմում ներառված են ոչ միայն գիտությամբ զբաղվող, այլև գիտությունը և պրակտիկան համատեղող դասախոսները:

Շնորհանդեսը ևս մեկ առիթ էր համալսարանի ներսում գիտություն և պրակտիկա կապը ամրապնդելու համար, ինչպես նաև ուսանողներին հնարավորություն տալու մասնագիտական հանրույթի հետ շփվելու:

 

 

 

Վճռաբեկ դատարանի նախագահ Լիլիթ Թադևոսյանը և դատավոր Հովսեփ Բեդևյանը, կարևորելով գիտություն-պրակտիկա կապը, նշեցին, որ գիտական նվաճումների զարգացումները մշտապես կարևոր են ոչ միայն ուսանողների, այլև մասնագիտական հանրույթի համար:

 

 

Նշենք, որ շնորհանդեսին ներկա էին ԵՊՀ պրոֆեսորադասախոսական կազմի ներկայացուցիչներ, իրավագիտության ֆակուլտետի ուսանողներ, ինչպես նաև պետական գերատեսչությունների ներկայացուցիչներ՝ ԲԴԽ, ՀՀ արդարադատության նախարարության, դատախազության ներկայացուցիչներ, Սահմանադրական և վճռաբեկ դատարանների նախագահները, Քաղաքացիական և վարչական պալատների անձնակազմերը և հրավիրյալ այլ հյուրեր։

 

Այլ նորություններ
«ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ
ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:
ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ
ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի: