29.06.2017 | 
Մշակույթ
«ԼՈՒՅՍԸ ԽԱՎԱՐՈՒՄ» ԳՐՔԻ ՀԱՄԱՀԵՂԻՆԱԿՆԵՐԸ ԵՊՀ ՈՒՍԱՆՈՂՆԵՐ ԵՆ
«ԼՈՒՅՍԸ ԽԱՎԱՐՈՒՄ» ԳՐՔԻ ՀԱՄԱՀԵՂԻՆԱԿՆԵՐԸ ԵՊՀ ՈՒՍԱՆՈՂՆԵՐ ԵՆ
Հունիսի 28-ին ՀՀ Սփյուռքի նախարարությունում տեղի ունեցավ լիբանանահայ լուսանկարիչ Գաբրիել Փանոսյանի «Լույսը խավարում» պատկերագրքի շնորհանդեսը:

«Լույսը խավարում» վերտառությամբ պատկերագրքում՝ լուսանկարների կողքին, տեղ են գտել նաև ԵՊՀ իրավագիտության ֆակուլտետի ուսանողուհի Մերի Բադալյանի և Միջազգային հարաբերությունների ֆակուլտետի ուսանողուհի Գայանե Թադևոսյանի ստեղծագործությունները՝ պատմվածքներ և բանաստեղծություններ: Պատկերագիրք ստեղծելու գաղափարը ծնվել է այն ժամանակ, երբ ԵՊՀ-ում ցուցադրվում էին Գաբրիել Փանոսյանի լուսանկարները:

 

Գրքի ծնունդը շնորհավորելու էին եկել ՀՀ Սփյուռքի փոխնախարար Սերժ Սրապիոնյանը, ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, դասախոսներ, ուսանողներ և ուրիշներ:

 

««Լույսը խավարում» գիրքը պատահական մտահղացում չէ: Այս գիրքն այսօր վկայում է այն մասին, որ Գաբրիել Փանոսյանն ունի յուրահատուկ լուսանկարչական տեսողություն, սա պարզապես խավարի մեջ լույսը և լույսի շարժումը տեսնելու կարողություն չէ. հեղինակի յուրաքանչյուր լուսանկարում առկա է անհատական մոտեցում: Նայելով լուսանկարներին և ընթերցելով դրանց ուղեկցող ստեղծագործությունները՝ պարզ է դառնում գրքի առաքելությունը՝ հայտնաբերել մարդու մեջ ծվարած բանաստեղծական տաղանդը: Գիրքն այս առումով յուրահատուկ ազդակ է»,- նշեց Սփյուռքի փոխնախարար Սերժ Սրապիոնյանը:

 

Պատկերագրքի համահեղինակներ Մերի Բադալյանը և Գայանե Թադևոսյանը, լուսանկարներից ոգեշնչված, գրել են ստեղծագործություններ սիրային, խոհափիլիսոփայական, սոցիալական, բարոյահոգեբանական և այլ թեմաներով: Երիտասարդ ստեղծագործողները վստահ են՝ այս գիրքը նրանց համար նորանոր դռներ է բացելու, ինչպես նաև ստեղծագործելու խթան է լինելու: Թեև ԵՊՀ ուսանողներն իրենց գրողներ չեն համարում, սակայն վստահ են՝ դրանք ընթերցողին մտորելու տեղիք կտան:

 

 

«Պատկերագիրքը կազմվել է նոր ձևաչափով. արդեն փորձառու լուսանկարչի աշխատանքների կողքին տեղ են գտել իրենց ճանապարհը նոր-նոր հարթող տաղանդաշատ ուսանողների ստեղծագործությունները: Մերին և Գայանեն, ուսանելով Մայր բուհում, նաև ԵՊՀ մշակույթի կենտրոնի սաներ են, և նրանց միտքը հարստացել, զարգացել է նաև համալսարանական մշակութային կյանքին մասնակցելու շնորհիվ»,- ասաց ԵՊՀ պրոռեկտոր Ռուբեն Մարկոսյանը:

 

Միջոցառման ավարտին ելույթ ունեցավ նաև ԵՊՀ մշակույթի կենտրոնի տնօրեն Կարինե Դավթյանը: Կարևորելով գրքի ծնունդը՝ նա նշեց, որ համալսարանական մշակութային կառույցը մշակութային զարգացման և ինքնադրսևորման հարթակ է. «Շնորհավորում եմ գրքի հեղինակներին և համոզված եմ, որ այն հետաքրքրելու է ընթերցող լայն հասարակությանը: Այս գրքում տեղ գտած յուրաքանչյուր նկար և ստեղծագործություն իր պատմությունն ունի»:

 

Տեղեկացնենք նաև, որ շնորհանդեսի ընթացքում հնչեցին հատվածներ պատկերագրքում ընդգրկված ստեղծագործություններից, երաժշտական կատարումներով հանդես եկան ԵՊՀ մշակույթի կենտրոնի սաները և ուրիշներ:

Այլ նորություններ
«ԲԵՄԸ ՍԻՐՈՒՄ Է ՄՏԱԾՈՂ ՄԱՐԴԿԱՆՑ, ԻՍԿ ՄԱՐԻՑԱՆ ԱՅԴՊԻՍԻՆՆ Է». ԵՊՀ ՄՇԱԿՈՒՅԹԻ ԿԵՆՏՐՈՆԻ ՍԱՆԸ ՀԱՂԹԵԼ Է ՄԻՋԱԶԳԱՅԻՆ ՄՐՑՈՒՅԹՈՒՄ
Լիտվայում հուլիսի 2-4-ը տեղի է ունեցել «Baltic Voice 2021» միջազգային մանկական և երիտասարդական մրցույթը, որտեղ Հայաստանը ներկայացրել է ԵՊՀ մշակույթի կենտրոնի մեներգչուհի Մարիցա Թիլիքյանը և արժանացել ոսկե «Grand Prix» մրցանակին։ ԵՊՀ մշակույթի կենտրոնի ղեկավար Կարինե Դավթյանի և Մարիցա Թիլիքյանի հետ զրուցել ենք մրցույթի, դրան մասնակցելու գաղափարի, նախապատրաստական աշխատանքների, հաղթանակի ու հետագա անելիքների մասին:
ԵՊՀ ՄՇԱԿՈՒՅԹԻ ԿԵՆՏՐՈՆԸ 15 ՏԱՐԵԿԱՆ Է
ԵՊՀ մշակույթի կենտրոնի դահլիճում այսօր տեղի է ունեցել ԵՊՀ մշակույթի կենտրոնի հիմնադրման 15-ամյակին նվիրված հոբելյանական միջոցառումը: