17.10.2018 | 
Կրթություն
ՎԱՆԱՁՈՐԻ ԱՇԱԿԵՐՏՆԵՐԻՆ ՆԵՐԿԱՅԱՑՎԵՑԻՆ ԵՊՀ ԿՐԹԱԿԱՆ ԾՐԱԳՐԵՐԸ
ՎԱՆԱՁՈՐԻ ԱՇԱԿԵՐՏՆԵՐԻՆ ՆԵՐԿԱՅԱՑՎԵՑԻՆ ԵՊՀ ԿՐԹԱԿԱՆ ԾՐԱԳՐԵՐԸ
ԵՊՀ մաթեմատիկայի և մեխանիկայի, կենսաբանության, սոցիոլոգիայի, ֆիզիկայի և քիմիայի ֆակուլտետների պրոֆեսորադասախոսական կազմի ներկայացուցիչներն այսօր այցելել են Վանաձորի թիվ 5 և «Էվրիկա» բնագիտամաթեմատիկական թեքումով հատուկ դպրոցներ` համալսարանի կրթական ծրագրերը և ֆակուլտետները ներկայացնելու համար:

Մեզ հետ զրույցում ԵՊՀ մինչհամալսարանական կրթության վարչության դիմորդների հետ տարվող աշխատանքների բաժնի վարիչ Էմին Սանթրոսյանը նշեց, որ իրենց վարչության կողմից կազմակերպվող մարզային այցելությունների նպատակն է նպաստել ավարտական դասարանների աշակերտների մասնագիտական կողմնորոշմանը, բարձրացնել իրազեկության մակարդակը և ուղղորդել դեպի ԵՊՀ:

 

Նշենք, որ ԵՊՀ դասախոսների այցելությունները մարզերի ավագ դպրոցներ շարունակական բնույթ են կրելու:

 

Էմին Սանթրոսյանի խոսքով, Հայաստանի մարզերի շուրջ 22 ավագ դպրոցների հետ համալսարանը կնքել է համագործակցության պայմանագրեր, որոնց հետ էլ կազմակերպվում են ԵՊՀ դասախոսների մարզային այցելությունները:

 

Նա ասաց, որ այս ուստարվա ընթացքում ԵՊՀ ֆակուլտետների պրոֆեսորադասախոսական կազմի ներկայացուցիչներն արդեն եղել են Աբովյանի թիվ 4 և Եղվարդի ավագ դպրոցներում:  

 

Առաջիկայում ԵՊՀ դասախոսներն այցելելու են Գորիսի, Սիսիանի, Նոյեմբերյանի, Բերդավանի, Գյումրու, Գավառի, Մարտունու, Արմավիրի և Արտաշատի ավագ դպրոցներ:  

 

Հանդիպման ընթացքում դասախոսները համառոտ ներկայացնում են ԵՊՀ ֆակուլտետների պատմությունը, լայնածավալ գիտակրթական գործունեության հիմնական ուղղությունները, աշխատաշուկայի պահանջները: Ելույթներին հաջորդում է նաև քննարկում. ապագա դիմորդները դասախոսներին հարցեր են ուղղում ԵՊՀ տարբեր ֆակուլտետների կրթական ծրագրերի և մասնագիտացումների մասին:

 

Է. Սանթրոսյանի խոսքով, ԵՊՀ դասախոսների այցելությունների մասին ավագ դպրոցների և՛ ուսուցիչները, և՛ աշակերտները  շատ դրական են արձագանքում:

 

Նա նաև հայտնեց, որ առաջիկայում նախատեսվում է կազմակերպել Երևանի ավագ դպրոցների աշակերտների այցելությունները համալսարան. նրանք կծանոթանան տարբեր ֆակուլտետների կրթական ծրագրերին և կմասնակցեն լաբորատոր դասընթացներին:

 

Նադեժդա Տեր-Աբրահամյան 

 

        

 

 

 

Այլ նորություններ
«ՆՈՐ ՄՈՏԵՑՈՒՄՆԵՐ ՈՉ ՍՊԻՏԱԿՈՒՑԱՅԻՆ ԱՄԻՆԱԹԹՈՒՆԵՐԻ ԱՍԻՄԵՏՐԻԿ ՍԻՆԹԵԶՈՒՄ». ԴԱՍԱԽՈՍՈՒԹՅՈՒՆ ԵՊՀ-ՈՒՄ
Ֆարմացիայի ինստիտուտի և Քիմիայի ֆակուլտետի ուսանողների համար այսօր դասախոսությամբ հանդես եկավ Ռուսաստանի Ա.Նեսմեյանովի անվան էլեմենտօրգանական միացությունների ինստիտուտի ասիմետրիկ կատալիզի լաբորատորիայի ավագ գիտաշխատող, քիմ. գիտ. թեկնածու Վլադիմիր Լարիոնովը:
ԱՇԱԿԵՐՏՆԵՐԻ ԱՅՑԵՐԸ ԵՊՀ ՕԳՆՈՒՄ ԵՆ ՏԵՍԱԿԱՆ ԳԻՏԵԼԻՔՆԵՐՆ ԱՄՐԱՊՆԴԵԼ ՏԱՐԲԵՐ ԼԱԲՈՐԱՏՈՐ ՓՈՐՁԵՐՈՎ
ԵՊՀ ֆիզիկայի ֆակուլտետն այսօր հյուրընկալել էր Երևանի թիվ 148, 29 և 16 ավագ դպրոցների աշակերտներին: