16.11.2016 | 
Կրթություն
ՈՒՍԱՆՈՂՆԵՐԸ ՅՈՒՐԱՑՆՈՒՄ ԵՆ ՆԱԽԱԳԾԵՐԻ ԿԱՌԱՎԱՐՄԱՆ ԳԱՂՏՆԻՔՆԵՐԸ
ՈՒՍԱՆՈՂՆԵՐԸ ՅՈՒՐԱՑՆՈՒՄ ԵՆ ՆԱԽԱԳԾԵՐԻ ԿԱՌԱՎԱՐՄԱՆ ԳԱՂՏՆԻՔՆԵՐԸ
Այսօր ԵՊՀ-ում մեկնարկեց «Նախագծերի կառավարում» խորագրով եռօրյա սեմինար-դասընթացը:

Միջոցառումը կազմակերպվել էր ԵՊՀ շրջանավարտների և կարիերայի կենտրոնի և «ԱՅ ԷՅ ԲԻ» բիզնեսի միջազգային ակադեմիայի համագործակցության շրջանակներում: Այս և հաջորդող երկու օրերին այն անցկացվելու է «IBM» տեխնոլոգիական լուծումներով համալրված «ISTC» ինովացիոն լուծումների և տեխնոլոգիաների կենտրոնում:

 

Սեմինար-դասընթացի մասնակիցներին ողջունեցին Շրջանավարտների և կարիերայի կենտրոնի փոխտնօրեն Կարինե Նազարյանն ու«ԱՅ ԷՅ ԲԻ» բիզնեսի միջազգային ակադեմիայի գլխավոր տնօրենի տեղակալ Անի Նահապետյանը: Նրանք նշեցին, որ այս միջոցառմամբ կարևոր համագործակցության սկիզբ է դրվում, որը նպաստելու է որակյալ կադրեր վերապատրաստելու գործընթացին:

 

«Նախագծերի կառավարում» խորագրով դասընթացի առաջին օրը միջազգային որակավորված նախագծերի կառավարման մասնագետ Միքայել Նշանյանը խոսեց դասական նախագծերի կառավարման մասին, թե ինչպես պետք է հաջողության հասնել, ինչ գործիքներ կիրառել և այլն:

 

Պարոն Նշանյանն անդրադարձավ նախագծի հաջողության չափանիշներին։  Նա նշեց, որ այն պետք է ավարտել ժամանակին, չգերազանցել սահմանված բյուջեն, իրականացնել համաձայնեցված աշխատանքների ամբողջ ծավալը, ինչպես նաև ստեղծված արդյունքը պետք է գոհացնի պատվիրատուին և լինի օգտագործման համար պիտանի։

 

«Յուրաքանչյուր նախագիծ մշակելիս պետք է մտածել նաև վաղվա օրվա մասին: Նախագիծն իրականացնողն ու պատվիրատուն պետք է լուրջ բանակցեն, որպեսզի զերծ մնան հետագա խնդիրներից: Պետք է հաշվի առնել նաև շուկայի պահանջարկը, այն ներկայացնել պատվիրատուին: Նախաձեռնությունների միայն 30%-ն է ամբողջ աշխարհում հաջողության հասնում, և դա այն պարագայում, երբ աշխարհի զարգացած երկրներում կառավարումը դարձել է աշխատանքային լուրջ գործիք։ Այդ աշխատանքների արդյունավետության բարձրացմանն է միտված նաև մի քանի տասնյակ համալսարաններում մագիստրոսական ծրագրերի ստեղծումը»,- ասաց պարոն Նշանյանը:

 

Բանախոսը բերեց նաև հաջողության հասած և չհասած, ինչպես նաև նախատեսված և իրականացված ծրագրերի մի շարք օրինակներ միջազգային փորձից ՝ համեմատելով դրանք տեղական ծրագրերի հետ:

 

Նախագծերի գործնական կառավարման հիմնական և խորացված դասընթացների շրջանակներում մասնակիցներն այս և հաջորդող երկու օրերին ձեռք կբերեն նաև գործնական գիտելիքներ թիմային և անհատական նախագծերի կառավարման վերաբերյալ, կբացահայտեն հաջողված նախագծերի կառավարման գաղտնիքները, կծանոթանան դրանց կառուցվածքին, ժամանակացույցի կազմմանը, վերահսկմանը և կզարգացնեն մասնագիտական հմտությունները:

 

Տեղեկացնենք նաև, որ սեմինար-դասընթացի ամենաակտիվ մասնակիցներին ծրագրի ավարտին տրամադրվելու են հավաստագրեր:

Այլ նորություններ
ԳԻՏԱՃԱՆԱՉՈՂԱԿԱՆ ԱՅՑ՝ ՆՎԻՐՎԱԾ ՍԼԱՎՈՆԱԿԱՆ ԳՐԻ ԵՎ ՄՇԱԿՈՒՅԹԻ ՕՐՎԱՆ
ԵՊՀ ռուս բանասիրության ֆակուլտետի դասախոսներն ու ուսանողներն այցելեցին Լոռու մարզի Ֆիոլետովո գյուղ՝ ծանոթանալու Հայաստանում մոլոկան համայնքի ներկայացուցիչների կյանքին ու մշակույթին, ինչպես նաև տեղում ուսումնասիրելու նրանց բարբառի արդի լեզվավիճակը։
ԵՊՀ-ՈՒՄ ՏԵՂԻ ՈՒՆԵՑԱՎ ՎԱՉԱԳԱՆ ՄԱՆՈՒԿՅԱՆԻ ԱՆՎԱՆ ԿՐԹԱՄՐՑԱՆԱԿՆԵՐԻ ՀԱՆՁՆՄԱՆ ԱՐԱՐՈՂՈՒԹՅՈՒՆԸ
Այսօր ԵՊՀ ժուռնալիստիկայի ֆակուլտետում տեղի ունեցավ Արցախյան 44-օրյա պատերազմի հերոս, գրող-հրապարակախոս Վաչագան Մանուկյանի անվան կրթաթոշակի համար հայտարարված մրցույթի արդյունքների ամփոփումը։ «Ոսկի սերմեր․ հարգանքի և երախտիքի կրթամրցանակներ» ծրագրի շրջանակում կազմակերպված մրցանակաբաշխության ընթացքում ցուցադրվեց հերոսի մասին պատմող տեսանյութ։ Մրցույթի մասնակիցներն ստացան դրամական պարգևներ և այլ մրցանակներ։